1st Chronicles Chapter 15 - Paipera Tapu 1868 | Te Paipera Tapu 1868

1st Chronicles Chapter 15 - Paipera Tapu 1868

1
Na, ka hangā e Rawiri etahi whare mona ki te pa o Rawiri; i whakapaia ano e ia he wahi mo te aaka o te Atua, whakaturia ana hoki e ia he teneti mo taua aaka.
2
Katahi a Rawiri ka mea, E kore e pai kia kawea te aaka o te Atua e tetahi atu; engari ma nga Riwaiti; ko ratou hoki ta Ihowa i whiriwhiri ai hei mau i te aaka a te Atua, hei mahi hoki ki a ia i nga wa katoa.
3
Na, ka huihuia e Rawiri a Iharaira katoa ki Hiruharama ki te kawe i te aaka o Ihowa ki tona wahi i whakapaia e ia mona.
4
I huihuia mai ano e Rawiri nga tamariki a Arona ratou ko nga Riwaiti.
5
O nga tamariki a Kohata; ko Uriere ko te rangatira, ratou ko ona teina kotahi rau e rua tekau:
6
O nga tamariki a Merari; ko Ahaia ko te rangatira, ratou ko ona teina e rua rau e rua tekau:
7
O nga tamariki a Kerehoma; ko Hoere ko te rangatira, ratou ko ona teina kotahi rau e toru tekau:
8
O nga tamariki a Eritapana; ko Hemaia ko te rangatira, ratou ko ona teina e rua rau:
9
O nga tamariki a Heperona; ko Eriere ko te rangatira, ratou ko ona teina e waru tekau:
10
O nga tamariki a Utiere; ko Aminarapa ko te rangatira, ratou ko ona teina kotahi rau kotahi tekau ma rua.
11
A, i karangatia atu ano e Rawiri a Haroko raua ko Apiatara nga tohunga, ratou ko nga Riwaiti, ko Uriere, ko Ahaia, ko Hoere, ko Hemaia, ko Eriere, ko Aminarapa,
12
I mea atu ia ki a ratou, Ko koutou nga rangatira o nga mātua o nga Riwaiti: whakatapua koutou, koutou, me o koutou teina. Ma koutou hoki e kawe te aaka o Ihowa o te Atua o Iharaira ki te wahi i whakapaia e ahau mona.
13
Kihai hoki i maua e koutou i mua; no reira i torere mai ai a Ihowa to tatou Atua, ki a tatou, no te mea kihai i rite ki te tikanga ta tatou rapunga i a ia.
14
Na, kei te whakatapu nga tohunga ratou ko nga Riwaiti i a ratou, kia kawea ai e ratou te aaka o Ihowa Atua o Iharaira.
15
Na, ka amohia e nga tamariki a nga Riwaiti te aaka o te Atua, ka pera ano ratou me ta Mohi i whakahau ai, me ta Ihowa i korero ai; ko nga amo i runga i o ratou pokohiwi.
16
A, i korero ano a Rawiri ki nga rangatira o nga Riwaiti kia whakaritea o ratou teina hei kai waiata i runga i nga mea waiata, i nga hatere, i nga hāpa, i nga himipora, he mea e rangona, he reo koa hoki e whakarahia ana e ratou.
17
Na, ka whakaritea e nga Riwaiti, ko Hemana tama a Hoere; a, o ona teina, ko Ahapa tama a Perekia, na, o o ratou teina o nga tamariki a Merari, Etana tama a Kuhaia;
18
Na, o ratou teina hei tuarua mo ratou, ko Hakaraia, ko Pene, ko Taatiere, ko Hemiramoto, ko Tehiere, ko Uni, ko Eriapa, ko Penaia, ko Maaheia, ko Matitia, ko Eriperehe, ko Mikineia, ko Opere-eroma, ko Teiere; he kai tiaki kuwaha ratou.
19
Na, ko nga kai waiata, ko Hemana, ko Ahapa, ko Etana, hei whakatangi i nga himipora parahi;
20
Ratou ko Hakaraia, ko Atiere, ko Hemiramoto, ko Tehiere, ko Uni, ko Eriapa, ko Maaheia, ko Penaia, he mea i runga i nga hatere, he mea Aramoto;
21
Me Matitia ano hoki, ratou ko Eriperehe, ko Mikineia, ko Opere-eroma, ko Teiere, ko Atatia, i runga i nga hāpa, he mea Heminiti, kia pai rawa ai.
22
Ko Kenania ano hoki, ko te upoko o nga Riwaiti, hei whakahua: i whakaako ano ia ki te whakahua waiata; he mohio hoki ia.
23
Ko Perekia raua ko Erekana nga kai tiaki tatau mo te aaka.
24
Ko nga tohunga ano hoki ko Hepania, ko Iohapata, ko Netaneere, ko Amahai, ko Hakaraia, ko Penaia, ko Erietere, hei whakatangi i nga tētere ki mua i te aaka o te Atua. Ko Opere-eroma ano hoki raua ko Iahia nga kai tiaki tatau mo te aaka.
25
Na, haere ana a Rawiri ratou ko nga kaumatua o Iharaira ko nga rangatira o nga mano ki te kawe mai i te aaka o te kawenata o Ihowa i te whare o Opere-eroma, he mahi koa na ratou.
26
Na, i te Atua ka riro mai nei hei noa mo nga Riwaiti, mo nga kai amo o te aaka o te kawenata o Ihowa, ka patua te whakahere e ratou, e whitu nga puru, e whitu nga hipi toa.
27
Na, he koroka rinena pai te kakahu o Rawiri, o nga Riwaiti katoa ano hoki i amohia ai te aaka, o nga kai waiata, o Kenania ano o te rangatira o te whakahua waiata, o nga kai waiata. He epora rinena ano hoki to Rawiri.
28
Na, kei te kawe a Iharaira katoa i te aaka o te kawenata o Ihowa, me te hamama ano ratou, me te tangi ano te korenete, te tētere, te himipora: pakū ana te rongo o nga hatere o nga hāpa.
29
Na, te taenga mai o te aaka o te kawenata o Ihowa ki te pa o Rawiri, ka titiro mai a Mikara tamahine a Haora i te matapihi, a ka kite i a Kingi Rawiri e kanikani ana, e takaro ana: na, ka whakahawea mai ia ki a ia i roto i tona ngakau.