- 1
- Na, muri iho i tenei ka patua nga Pirihitini e Rawiri, hinga ana ratou i a ia; tangohia mai ana e ia a Kata me ona pa ririki i te ringa o nga Pirihitini.
- 2
- I patua ano e ia a Moapa: na, kua waiho nga Moapi hei pononga ma Rawiri, a homai ana he hakari e ratou.
- 3
- I patua ano hoki e Rawiri a Hararetere kingi o Topa a tae noa ki Hamata, i tona haerenga ki te whakapumau i tana rohe ki Awa Uparati.
- 4
- Na, kotahi mano o ana hariata i riro mai i a Rawiri, e whitu mano ano hoki o nga hoia eke hoiho, e rua tekau mano o nga tangata haere i raro. I whakangongea ano e Rawiri nga hoiho katoa o nga hariata: ko tahi ia rau o aua hariata i whakatoea e ia.
- 5
- A, te haerenga mai o nga Hiriani o Ramahiku ki te whakauru i a Hararetere kingi o Topa, na, patua iho e Rawiri o nga Hiriani e rua tekau ma rua mano tangata.
- 6
- I whakanohoia ano e Rawiri etahi hoia pupuri ki Hiria i Ramahiku: a ka waiho nga Hiriani hei pononga homai hakari ma Rawiri. Na, whakaorangia ana a Rawiri e Ihowa i ana haerenga katoatanga.
- 7
- I tangohia ano e Rawiri nga whakangungu-rakau koura o nga tangata o Hararetere, a kawea mai ana ki Hiruharama.
- 8
- A, nui whakaharahara te parahi i tangohia mai e Rawiri i roto i Tipihata, i Kunu, i nga pa o Hararetere; no reira te moana parahi, nga pou, me nga oko parahi i hangā nei e Horomona.
- 9
- A, te rongonga o Tohu kingi o Hamata kua patua e Rawiri te ope katoa a Hararetere kingi o Topa;
- 10
- Na, ka tonoa mai e ia a Hatorama tana tamaiti ki a Kingi Rawiri ki te oha ki a ia, ki te manaaki hoki i a ia, mona i whawhai ki a Hararetere, i patu hoki i a ia: (he hoa riri hoki a Hararetere no Tohu:) hei mau mai ano hoki i nga tu oko katoa, i nga mea koura, i nga mea hiriwa, i nga mea parahi.
- 11
- Whakatapua ake ano hoki era e Kingi Rawiri ma Ihowa hei tapiri mo te hiriwa, mo te koura, i maua mai e ia i enei iwi katoa; i nga Eromi, i nga Moapi, i nga tamariki a Amona, i nga Pirihitini, i nga Amareki.
- 12
- I patua ano hoki e Apihai tama a Teruia etahi o nga Eromi ki te raorao tote, kotahi tekau ma waru nga mano.
- 13
- I whakanohoia ano e ia etahi hoia pupuri ki Eroma: a ka meinga nga Eromi katoa hei pononga ma Rawiri. A, whakaorangia ana a Rawiri e Ihowa i ana haerenga katoatanga.
- 14
- Na, ko Rawiri te kingi o Iharaira katoa; i mahi ano ia i te whakarite whakawa, i te tika mo tona iwi katoa.
- 15
- A, ko Ioapa tama a Teruia te rangatira ope, ko Iehohapata tama a Ahiruru te kai whakamaharahara.
- 16
- Ko Haroko tama a Ahitupu raua ko Apimereke tama a Apiatara nga tohunga; ko Hawaha hoki te kai tuhituhi.
- 17
- A, ko Penaia tama a Iehoiara te rangatira mo nga Kereti, mo nga Pereti; ko nga tama ia a Rawiri nga tino rangatira i te taha o te kingi.
Address: 
Phone: 
Email: