1st Corinthians Chapter 15 - Paipera Tapu 1868 | Te Paipera Tapu 1868

1st Corinthians Chapter 15 - Paipera Tapu 1868

1
Na, me whakaatu e ahau ki a koutou, e aku teina, te rongo pai i kauwhautia e ahau ki a koutou, ta koutou hoki i whakaae na, ta koutou hoki e tu na:
2
Te mea hoki e ora na koutou, ki te u koutou ki te kupu i kauwhau ai ahau ki a koutou, ki te mea ehara to koutou i te whakapono noa.
3
I hoatu na hoki e ahau ki a koutou i te tuatahi te mea i riro mai i a au, ara, i mate a te Karaiti mo o tatou hara, i pera me ta nga Karaipiture;
4
A i tanumia, i ara ake ano i te toru o nga ra, i pera me ta nga Karaipiture.
5
Na, ka kitea e Kipa, muri iho e te tekau ma rua:
6
Muri iho, ka kitea e etahi o nga hoa tokomaha ake i nga rau e rima i te kitenga kotahi; tenei ano kei te ora te nuinga o ratou, ko etahi kua moe.
7
Muri iho, ka kitea e Hemi; muri iho, e nga apotoro katoa.
8
A muri rawa iho, ka kitea e ahau ano hoki, ano he tamaiti kokoti tau.
9
Ko te iti rawa hoki ahau o nga apotoro, kahore e tau kia karangatia he apotoro, moku i whakatoi i te hahi a te Atua.
10
Heoi na te aroha noa o te Atua tenei ahua oku: kihai ano hoki tona aroha noa ki a au i maumauria; heoi nui atu taku mahi i ta ratou katoa: ehara ia i te mea naku, engari na te aroha noa a te Atua i mahi tahi me ahau.
11
Na, ahakoa naku, ahakoa na ratou, ko ta matou kauwhau tenei, ko ta koutou ano tenei i whakapono ai.
12
Na, kauwhautia nei a te Karaiti, tona aranga ake i te mate, a he pehea te kupu a etahi o koutou, kahore he aranga ake o te hunga mate?
13
Ki te kahore hoki he aranga o te hunga mate, kihai ano a te Karaiti i ara.
14
A ki te kahore a te Karaiti i ara, maumau noa ta matou kauwhau, maumau noa to koutou whakapono.
15
A e kitea ano matou he kai whakaatu teka i ta te Atua; no te mea ka whakaaturia nei e matou te Atua, tana whakaaranga ake i a te Karaiti: kihai nei i whakaarahia e ia, ki te kahore te hunga mate e ara.
16
Ki te kahore hoki te hunga mate e whakaarahia, kihai ano hoki a te Karaiti i whakaarahia:
17
A ki te kahore a te Karaiti i era, he mea hanga noa to koutou whakapono; kei roto tonu koutou i o koutou hara.
18
Me te hunga hoki kua moe atu i roto i a te Karaiti, kua ngaro ratou.
19
Ki te mea kei tenei ao anake he tumanakotanga atu ma tatou ki a te Karaiti, nui atu te pouri mo tatou i o nga tāngata katoa.
20
Ko tenei kua ara mai a te Karaiti i te mate, kua waiho hei matamua mo te hunga kua moe.
21
Na te tangata nei hoki te mate, whaihoki na te tangata te aranga mai o te hunga mate.
22
I roto hoki i a Arama ka mate katoa nga tāngata, whaihoki i roto i a te Karaiti ka whakaorangia katoatia.
23
Otiia tenei tangata tenei tangata i tona ake turanga; ko te Karaiti te matamua; muri iho ko te hunga o te Karaiti a tona haerenga mai.
24
Ko reira te mutunga, ina oti te rangatiratanga te hoatu e ia ki te Atua, ara ki te Matua; ina memeha i a ia nga kawanatanga katoa, nga mana katoa, me te kaha.
25
Kua takoto hoki te tikanga kia kingi ia, kia meinga katoatia ra ano e ia nga hoa riri ki raro ki ona waewae.
26
Te hoa riri whakamutunga e whakakahoretia ko te mate.
27
Ka oti hoki nga mea katoa te pēhi e ia ki raro i ona waewae. Otira i te kianga nei, Ka oti nga mea katoa te pēhi ki raro i a ia; e marama ana tenei kua waiho i waho te kai pēhi o nga mea katoa ki raro i a ia.
28
A ka oti nga mea katoa te pēhi e ia ki raro i a ia, ko reira ano hoki te Tama riro ai ki raro i te kai pēhi o nga mea katoa ki raro i a ia, kia katoa ai te Atua i roto i te katoa.
29
Penei ka aha te hunga e iriiria ana hei whakakapi mo te hunga mate, ki te kore rawa te hunga mate e ara? he aha hoki ratou ka iriiria ai hei whakakapi mo te hunga mate?
30
He aha ano hoki tatou ka tu wehi ai i nga wa katoa?
31
Na, taku oati, ko taku whakamanamana mo koutou i roto i a Karaiti Ihu i to tatou Ariki, ina mo te mate ahau i tenei ra i tenei ra.
32
Ha, whawhai ana ahau ki te kararehe i Epeha, pera ana me te tangata, he aha te pai ki ahau, ki te kahore te hunga mate e ara? Kia kai tatou kia inu ko apopo hoki tatou mate ai.
33
Kei whakapohehetia koutou: ki te kino nga hoa, ka heke ki te kino nga tikanga pai.
34
Oho ake ki te tika, kaua hoki e hara; kahore hoki o etahi matauranga ki te Atua: i korero ai ahau kia whakama ai koutou.
35
Otira tera tetahi e ki mai, E peheatia te whakaarahanga o te hunga mate? a he tinana aha to ratou ina haere mai?
36
Kuare! tāu e whakato na e kore e puta ki te ora, ki te kahore e mate:
37
A tāu e whakato na, ehara i te tinana e puta ake a mua tāu e whakato na, engari he kakano kau no te witi ranei, no tetahi atu mea ranei:
38
A e hoatu ana e te Atua ki taua kakano he tinana, tana hoki i pai ai, a ki tenei kakano ki tenei kakano tona ake tinana.
39
Ehara i te kikokiko kotahi nga kikokiko katoa: engari rereke to te tangata kikokiko, rereke to te kararehe kikokiko, rereke to te ika, rereke to te manu.
40
Etahi tinana no te rangi, etahi tinana no te whenua: otiia rereke te kororia o nga mea o te rangi, rereke to nga mea o te whenua.
41
He kororia ke to te ra, he kororia ke to te marama, he kororia ke to nga whetu: poka ke hoki te kororia o tetahi whetu o tetahi whetu.
42
He pera ano te aranga mai o te hunga mate. E whakatokia pirautia, ana; e whakaarahia pirau koretia ana:
43
E whakatokia honore koretia ana; e whakaarahia kororiatia ana: e whakatokia ngoikoretia ana; e whakaarahia kahatia ana:
44
E whakatokia ana he tinana maori; e whakaarahia ana he tinana wairua. Te mea maori he tinana ano, te mea wairua he tinana ano.
45
He penei hoki te mea i tuhituhia, Te tangata tuatahi a Arama i meinga hei tangata ora; te Arama whakamutunga hei wairua whakaora.
46
He ahakoa ra ehara te mea wairua i te tuatahi, engari te mea maori; no muri ko te mea wairua.
47
Te tangata tuatahi no te whenua, he mea oneone: te tangata tuarua ko te Ariki no te rangi.
48
Nga mea oneone rite tonu ki te mea oneone: nga mea o te rangi rite tonu ki te mea o te rangi.
49
Na, kua mau nei ki a tatou te ahua o to te oneone, whaihoki ka mau ano ki a tatou te ahua o to te rangi.
50
E aku teina, ko taku korero tenei, e kore e tau kia riro te rangatiratanga o te Atua i te kikokiko i te toto; e kore ano hoki te pirau-kore e riro i te pirau.
51
Na, he mea ngaro tenei e korerotia atu nei e ahau ki a koutou: E kore tatou katoa e moe, engari e whakaahuatia ketia tatou katoa;
52
E kore e aha, kimo kau te kanohi, i te tetere whakamutunga: e tangi hoki te tetere, a e whakaarahia nga tupapaku, he mea pirau-kore, na, ka whakaahuatia ketia tatou.
53
Kua takoto hoki te tikanga kia kakahuria te pirau-kore e tenei pirau, kia kakahuria hoki te mate-kore e tenei hanga matemate nei.
54
Heoi ka oti tenei pirau te whakakakahu ki te pirau-kore, me tenei hanga matemate nei te whakakakahu ki te mate-kore, ko reira rite ai te korero i tuhituhia, Horomia ake te mate e te wikitoria.
55
E te mate, kei hea tou wero? E te po, kei hea tou wikitoria?
56
Ko te hara ta te mate wero; a na te ture i kaha ai te hara.
57
Na, ki te Atua te whakawhetai, nana nei i homai te wikitoria ki a tatou, he meatanga na to tatou Ariki na Ihu Karaiti.
58
Heoi, e aku teina aroha, kia u, kei taea te whakakorikori, kia hira te mahi ki te Ariki i nga we katoa, e mātau ana hoki koutou, ehara i te maumau to koutou mauiuitanga i roto i te Ariki.