1st Corinthians Chapter 2 - Paipera Tapu 1868 | Te Paipera Tapu 1868

1st Corinthians Chapter 2 - Paipera Tapu 1868

1
I a au ano hoki, e aku teina, i haere atu ki a koutou, kihai au i haere atu me te pai kupu, me te hua ranei o te whakaaro, i taku kauwhautanga atu ki a koutou i te whakaaturanga a te Atua.
2
I takoto hoki taku whakaaro kia kaua ahau e mātau ki tetahi mea i roto i a koutou, ko Ihu Karaiti anake, ko ia hoki i ripekatia.
3
I a au ano i a koutou, i runga ahau i te ngoikore, i te wehi, i te wiri nui.
4
Taku kupu hoki me taku kauwhau, ehara i te kupu whakapati no a te tangata whakaaro nui, engari he whakakitenga na te Wairua, na te kaha:
5
Kei mau hoki to koutou whakapono i runga i o te tangata whakaaro nui, engari i to te Atua kaha.
6
Ki te hunga tino tika ano ia e whai whakaaro ana ano ta matou korero: ehara ia i te whakaaro mohio no tenei ao, no nga rangatira ranei o tenei ao ka memeha nei:
7
Engari e korerotia ana e matou nga whakaaro nui o te Atua i roto i te mea ngaro, era i hunā ra, a te Atua i whakatakoto ai i mua o te ao, hei whakakororia mo tatou.
8
Kihai nei i mātau i tetahi o nga rangatira o tenei ao: me i mātau hoki, kihai i ripekatia e ratou te Ariki o te kororia.
9
Heoi ka rite ki te mea kua oti te tuhituhi, Kahore nei te kanohi i kite, kahore te taringa i rongo, kahore ano hoki i tapoko noa ki te ngakau o te tangata, nga mea kua rite mai i te Atua ma te hunga e aroha ana ki a ia,
10
Heoi kua whakakitea mai ki a tatou e te Atua, ara, e tona Wairua: e rapu ana hoki te Wairua i nga mea katoa, i nga mea hohonu o te Atua.
11
Ko wai hoki te tangata e mātau ana ki nga mea a te tangata? ko te wairua anake o te tangata i roto i a ia: whaihoki ko nga mea a te Atua, e kore e matauria e tetahi, engari e te Wairua o te Atua.
12
Ehara i te ao te wairua kua riro mai nei i a tatou, engari ko te Wairua e ahu mai nei i te Atua; kia mātau ai tatou ki nga mea kua oti nei te homai ki a tatou e te Atua.
13
A i a matou ka korero nei i aua mea, ehara nga kupu i te mea whakaako e te whakaaro mohio o te tangata, engari he mea whakaako na te Wairua Tapu; e whakariterite ana i nga mea wairua ki nga mea wairua.
14
E kore ia te tangata i te ngakau maori e tango i nga mea o te Wairua o te Atua: he mea kuare hoki ki a ia: e kore ano hoki e ahei te mātau, ma te Wairua hoki ka kitea ai.
15
Otiia ki te mea kei tetahi te Wairua, ka kitea e ia nga mea katoa, e kore ano ia e kitea e tetahi.
16
Ko wai hoki te mātau ana ki te hinengaro o te Ariki, e whakaako ai ia i a ia? Kei a tatou ia te hinengaro o te Karaiti.