- 1
- Kua pakū noa atu te rongo he puremu kei roto i a koutou, he puremu ano ia kahore nei e whakahuatia i roto i nga tauiwi, ara kua riro i tetahi te wahine a tona pāpā.
- 2
- A e whakapehapeha ana koutou, tē pouri koutou, tē mea kia tangohia i roto i a koutou te tangata, nana tenei mahi.
- 3
- Ko ahau ia, ahakoa kei tawhiti toku tinana, kei kona ano toku wairua, a kua whakahe noa ake i te kai mahi o tenei mea, me te mea kei kona ano ahau;
- 4
- Me huihui koutou me toku wairua ano hoki, i runga i te ingoa o to tatou Ariki o Ihu Karaiti, i runga i te kaha o to tatou Ariki o Ihu Karaiti,
- 5
- Ka tuku ai i taua tu tangata ki a Hatana, hei whakangaro mo te kikokiko, kia ora ai te wairua i te ra o te Ariki o Ihu.
- 6
- Kahore e pai ta koutou whakapehapeha. Kahore koutou e mātau he iti nei te rewena, rewenatia ake te puranga katoa?
- 7
- Mo konei ra tahia ki waho te rewena tawhito, kia meatia ai koutou hei puranga hou, me koutou hoki e rewena kore na. Kua patua hoki mo tatou a te Karaiti ta tatou Kapenga:
- 8
- Na, kia kai tatou i te hakari, auaka te rewena tawhito, auaka ano hoki te rewena o te mauahara, o te kino, engari hei te rewena kore, ara, hei te tinihanga kore, hei te pono.
- 9
- I tuhituhi atu nei ahau ki a koutou i roto i te pukapuka, kia kaua koutou e whakahoatia atu ki nga tāngata puremu:
- 10
- Ehara ia i te mea rawa ki te hunga puremu o tenei ao, ki te hunga apo, ki te hunga hao taonga, ki te hunga karakia ki nga whakapakoko; penei me haere atu koutou i roto i te ao.
- 11
- Na, ka tuhituhi atu nei ano ahau ki a koutou, kia kaua e whakahoatia atu, ki te mea he tangata puremu tetahi e karangatia ana he teina, ki te mea he tangata apo ia, e karakia ana ranei ki te whakapakoko, he tangata taunu, he tangata whakahaurangi i a ia, he tangata hao taonga; kaua rawa koutou ko taua tu tangata e kai tahi.
- 12
- Hei aha ra maku te whakawa i te hunga ano hoki o waho? e kore koia koutou e whakawa i te hunga o roto?
- 13
- Te hunga ia o waho ma te Atua ratou e whakawa. Na, motuhia atu taua tangata kino i roto i a koutou.
Address: 
Phone: 
Email: