- 1
- He teka ianei he apotoro au? he teka ianei kei a au ano nga tikanga moku? kihai ianei ahau i kite i Ihu Karaiti i to tatou Ariki? ehara oti koutou i taku mahi i roto i te Ariki?
- 2
- Ahakoa ehara ahau i te apotoro ki era atu, he apotoro ano ia ahau ki a koutou: ko koutou hoki te hiri o toku apotorotanga i roto i te Ariki.
- 3
- Ko taku whakahokinga kupu tenei ki oku kai ui;
- 4
- He teka ianei kei a matou te tikanga mo te kai mo te inu?
- 5
- He teka ianei kei a matou te tikanga mo te whakahaereere i te tuahine, ara, i te hoa wahine, mo te pera me era apotoro, me nga teina o te Ariki, ratou ko Kipa?
- 6
- Ko maua anake ranei ko Panapa, kahore ranei i a maua te tikanga kia kaua e mahi?
- 7
- Ko wai ka haere hei hoia, a nona ake ano nga utu mona? ko wai e whakato ana i te māra waina, a kahore e kai i ona hua? ko wai hoki e whangai ana i te kahui, a kahore e kai i te waiu o te kahui?
- 8
- No te tikanga tangata ranei enei kupu aku? a ehara ranei i te ture enei korero?
- 9
- Kua oti hoki te tuhituhi i roto i te ture a Mohi, Kaua e whakamokatia te mangai o te kau patu witi. Ko nga kau koia ta te Atua i whakaaro ai?
- 10
- Mo tatou ranei te tino tikanga o ana korero? He whakaaro ra ki a tatou i tuhituhia ai: he tika hoki kia parau te kai parau i runga i te tumanako; a, te tangata e patu witi ana, i runga i te tumanako kia whiwhi ki tana i tumanako atu ai.
- 11
- Kua ruia atu nei e matou nga mea wairua ma koutou, a he mea nui ianei ki te kotia e matou a koutou mea o te kikokiko?
- 12
- Kua uru nei etahi atu ki tenei tikanga ki a koutou, a kauaka ranei matou? Otiia kihai matou i mea ki tenei tikanga; engari e whakamanawanui ana matou ki nga mea katoa, kei ai ta matou hei arai mo te rongo pai o te Karaiti.
- 13
- Kahore oti koutou i mātau, na, te hunga e mahi ana i nga mea tapu, e kai ana ratou i nga mea o te temepara? me nga kai tiaki o te āta ma ratou ano tetahi wahi o to te āta?
- 14
- Pera tonu ano hoki ta te Ariki i whakarite ai mo nga kai kauwhau o te rongo pai, hei runga i te rongo pai he oranga mo ratou.
- 15
- Na, kihai ahau i mea ki tetahi o enei mea: kahore hoki ahau i tuhituhi i enei mea kia pena mai ano ki a au: ki a au hoki he pai te mate, engari taku whakamanamana, kaua tetahi e whakakahore i tena.
- 16
- No te mea ahakoa kauwhau ahau i te rongo pai, kahore maku whakamana mana: kua takoto hoki tenei hei mahi maku; he aue ano hoki maku ki te kore ahau e kauwhau i te rongo pai.
- 17
- Ki te whai ngakau hoki ahau ki tenei mahi, he utu toku: a ki te kore he ngakau, he mahi tuari tenei kua tukua mai ki a au.
- 18
- Na, he aha koia te utu moku? ara, ka meinga e ahau kia kore e utua te rongo pai o te Karaiti, ina kauwhautia e ahau; kei hē i a au nga tikanga o te rongo pai kua tukua mai ki a au.
- 19
- Ehara ahau i te pononga na tetahi, heoi kua waiho ahau e ahau ano hei pononga ma te katoa, kia tokomaha atu ai e riro mai i ahau.
- 20
- Na, whaka-Hurai ana ahau ki nga Hurai, kia riro ai i a au nga Hurai; me te mea i raro ahau i te ture ki te hunga i raro o te ture, kia riro ai i ahau te hunga i raro o te ture;
- 21
- Me he tangata ture kore ahau ki te hunga ture kore, (ehara i te mea he ture kore ki te Atua, he ture nei hoki ta te Karaiti ki a au,) kia riro ai i a au te hunga ture kore.
- 22
- Me he ngoikore ahau ki te hunga ngoikore, kia riro ai i a au te hunga ngoikore; meinga ana ahau hei mea katoa ki te katoa, kia pau rawa ai taku hei whakaora i etahi.
- 23
- I meinga ai tenei e ahau he whakaaro ki te rongo pai, kia whiwhi tahi ai tatou ki tona pai.
- 24
- Kahore oti koutou i mātau ki te hunga e oma whakataetae ana, e oma katoa ana ano ratou, kotahi ano ia māna te utu whakahonore? Kia tika ano ta koutou oma, kia whiwhi ai koutou.
- 25
- A, nga tāngata katoa e whakataetae ana e whakakoromaki ana i nga hiahia katoa. Ratou, kia whiwhi ai ki te karauna pirau; tatou ia, ki te mea e kore e pirau.
- 26
- Ko ahau nei hoki, kahore i ngaro taku oma; e kuru ana ahau, kahore ia e rite ki te kai patu o te hau:
- 27
- Engari e pēhia ana e ahau toku tinana, a meinga ana hei pononga maku; kei kauwhau pea ahau ki etahi atu, a ko au ka akiritia atu.
Address: 
Phone: 
Email: