- 1
- Otiia he tini nga wahine ke i aro haina e Kingi Horomona, te tamahine hoki a Parao, nga wahine ano hoki a nga Moapi, a nga Amoni, a nga Eromi, a nga Hironi, a nga Hiti;
- 2
- A nga iwi i mea ra a Ihowa ki nga tamariki a Iharaira, Kaua koutou e haere atu ki a ratou, kaua hoki ratou e haere mai ki a koutou: he pono ma ratou o koutou ngakau e whakaanga ke ki te whai i o ratou atua: piri tonu, aroha tonu e Horomona ki enei.
- 3
- Na, e whitu rau ana wahine rangatira, e toru rau nga wahine iti: a, whakaangā ketia ana tona ngakau e ana wahine.
- 4
- Na, koroheke rawa ake a Horomona, kua whakaangā ketia tona ngakau e ana wahine, kua whai i nga atua ke, kihai ano hoki tona ngakau i tapatahi ki a Ihowa, ki tona Atua, kihai i rite ki te ngakau o Rawiri, o tona pāpā.
- 5
- Heoi haere ana a Horomona, whai ana i a Ahatorete atua o nga Haironi, i to nga Amoni mea whakarihariha, i a Mirikomo.
- 6
- Na, kua he ta Horomona mahi ki te aroaro o Ihowa, kihai hoki i anga nui ki te whai i a Ihowa, kihai i pera me tona pāpā me Rawiri.
- 7
- Katahi ka hangā e Horomona he wahi tiketike mo ta Moapa mea whakarihariha, mo Kemoho, ki runga ki te maunga e anga mai ana ki Hiruharama; mo Moreke ano hoki mo ta nga tamariki a Amona mea whakarihariha.
- 8
- Pera tonu tana i mea ai mo ana wahine ke katoa, mo nga mea i tahu kakara, i patu whakahere ki o ratou atua:
- 9
- Na, ka riri a Ihowa ki a Horomona, no te mea kua anga ke tona ngakau i a Ihowa, i te Atua o Iharaira, ka rua nei ona putanga mai ki a ia.
- 10
- A, i ako ano i tenei kupu ki a ia kia kaua ia e haere ki te whai i nga atua ke: heoi kihai i mau i a ia ta Ihowa i ako ai.
- 11
- Na, ko te meatanga atu a Ihowa ki a Horomona, Na, nau nei tenei, kahore nei i mau i a koe taku kawenata me taku tikanga i akona atu e ahau ki a koe, ka haea rawatia atu e ahau te kingitanga i a koe, a ka hoatu ki to tangata.
- 12
- Otiia e kore tenei e meatia e ahau i ou ra, he whakaaro hoki ki tou pāpā, ki a Rawiri: ka haea atu e ahau i roto i te ringa o to tamaiti.
- 13
- Otiia e kore e haea atu e ahau te kingitanga katoa; kotahi te iwi e hoatu e ahau ki to tamaiti, he whakaaro ki a Rawiri ki taku pononga, ki Hiruharama ano hoki i whiriwhiria nei e ahau.
- 14
- Na, kua ara i a Ihowa he hoariri mo Horomona, a Harara te Eromi: he uri ia no te kingi i Eroma.
- 15
- I a Rawiri hoki i Eroma, i te haerenga atu o Ioapa rangatira o te ope ki te tanu i te hunga i patua, i te mea kua oti nga tane katoa o Eroma te patu e ia.
- 16
- (E ono hoki nga marama i noho ai a Ioapa, ratou ko Iharaira katoa ki reira, a, poto noa nga tane katoa o Eroma te hautope atu;)
- 17
- Na, ka rere a Harara, ratou tahi ko etahi Eromi, he tangata no tona pāpā, haere ana ki Ihipa: he tamaiti nohinohi ano hoki a Harara.
- 18
- To ratou turanga atu hoki i Miriana, kua tae ki Parana. Na, ka tangohia e ratou etahi tangata o Parana hei hoa mo ratou, a, haere ana ki Ihipa ki Parao kingi o Ihipa; a homai ana e tera he whare mona; nana ano hoki i ki iho he kai māna: i homai ano hoki e ia he whenua ki a ia,
- 19
- Na, ka manakohia nuitia a Harara e Parao, a, homai ana e ia hei wahine mana te teina o tona wahine ake, te teina o Kuini Tahapene.
- 20
- Na, ka whanau ko Kenupata, he tamaiti na raua ko taua teina, o Tahapene; a na Tahapene ano i whakamutu tana kai u i roto i te whare o Parao, na noho ana a Kenupata i te whare o Parao i roto i nga tamariki a Parao.
- 21
- A, te rongonga o Harara i Ihipa kua takoto a Rawiri ki ona matua, kua mate ano hoki a Ioapa rangatira ope, na, ka mea a Harara ki a Parao, Tukua ahau kia haere ki toku whenua.
- 22
- Na, ka mea a Parao ki a ia, I hapa koe i te aha i a koe i a au nei, i whai ai koe kia haere ki tou whenua? Na, ko tana kianga mai, kahore? he ahakoa ra tukua ahau kia haere.
- 23
- I whakaarahia ano hoki e te Atua tetahi atu hoa riri mona, a Retona, tama a Eriara i rere mai nei i tona ariki i a Hararetere kingi o Topa.
- 24
- Na, ka huihuia e ia etahi tangata, a ka meinga hei rangatira ropu, i te mea e patua ana ratou e Rawiri: na, haere ana ratou ki Ramahiku, a noho ana i reira, a ko ratou hei kingi mo Ramahiku.
- 25
- A, hei hoa riri ano ia ki a Iharaira i nga ra katoa o Horomona. Tera atu ano tetahi kino, ko ta Harara: heoi whakarihariha ana ia ki a Iharaira, ko ia ano hoki te kingi o Hiria.
- 26
- Me Ieropoama ano hoki tama a Nepata, he Eparati, no Terera, he tangata na Horomona, (te ingoa o tona whaea, Ko Terua, he wahine kua pouarutia:) i ara ano tona ringa ki te kingi.
- 27
- A ko te take tenei i ara ai tona ringa ki te kingi: E hanga ana a Horomona i Miro, e tutaki ana hoki i nga wahi pakaru o te pa o tona pāpā o Rawiri.
- 28
- Na, he tangata marohirohi a Ieropoama, he toa, a ka kite a Horomona i taua taitamariki e uaua ana ki te mahi, na, meinga ana ia e ia hei kai tirotiro mo nga mahi katoa a te whare o Hohepa.
- 29
- Na, i taua wa ka puta atu a Ieropoama i roto i Hiruharama, a ka tutaki a Ahia Hironi te poropiti ki a ia i te ara; na, he kakahu hou tona, a, ko raua tokorua anake i te parae.
- 30
- Na, ko te hopukanga atu a Ahia i tona kakahu hou, haea ana kia tekau ma rua nga wahi:
- 31
- Me te ki mai ano ki a Ieropoama, Kia tekau nga wahi e tangohia e koe mau: ko te kupu hoki tenei a Ihowa a te Atua o Iharaira, Nana, ka haea mai e ahau te kingitanga i roto i te ringa o Horomona, a, tekau nga iwi e hoatu e ahau ki a koe.
- 32
- Kotahi ano hoki te iwi māna; he whakaaro hoki ki taku pononga, ki a Rawiri, he whakaaro ana hoki ki Hiruharama, ki te pa i whiriwhiria e ahau i roto i nga iwi katoa o Iharaira:
- 33
- Mo ratou i whakarere i a au, a, koropiko ana ki a Ahatorete, atua o nga Haironi, ki a Kemoho atua o nga Moapi, ki a Mirikomo atua o nga tamariki a Amona, a, kihai i haere i oku ara, i mahi i te mea e tika ana ki taku titiro atu, i aku tikanga me aku whakaritenga, kihai i pera me tona pāpā me Rawiri.
- 34
- Otiia e kore e tangohia e ahau te kingitanga katoa i roto i tona ringaringa; engari ka whakarangatira ahau i a ia i nga ra katoa e ora ai ia, he whakaaro ki taku pononga, ki a Rawiri, i whiriwhiria nei e ahau, mona i pupuri i aku whakahaunga me aku tikanga.
- 35
- Engari ka tangohia mai e ahau te kingitanga i roto i te ringa o tana tama, a ka hoatu ki a koe, kotahi tekau nga iwi.
- 36
- Kotahi te iwi e hoatu e ahau ki tana tamaiti, hei rama ma taku pononga ma Rawiri ki toku aroaro i nga ra katoa ki Hiruharama, ki te pa i whiriwhiria e ahau hei waihotanga iho mo toku ingoa.
- 37
- Ka tangohia ano koe e ahau; a hei kingi koe; ka rite ki nga mea katoa i hiahia ai tou ngakau; hei kingi hoki koe mo Iharaira.
- 38
- Na, tenei ake, ki te rongo koe ki nga mea katoa e whakahau ai ahau ki a koe, a ka haere i oku ara, ka mahi i te mea e tika ana ki taku titiro atu, ka pupuri i aku tikanga me aku whakahaunga, ka pera ano me ta taku pononga, me ta Rawiri i mea ai, na, hei hoa ahau mou, ka hangā e ahau tou whare kia pumau, ka peratia ano me to Rawiri i hangā e ahau, ka hoatu ano hoki e ahau a Iharaira ki a koe.
- 39
- A ka whakawhiua e ahau nga uri o Rawiri mo tenei mea nei; otiia ehara i te mea mo ake tonu atu.
- 40
- Na, ka whai a Horomona kia whakamatea a Ieropoama; otiia i whakatika a Ieropoama, a, rere ana ki Ihipa ki a Hihaka kingi o Ihipa, a i Ihipa ia, a mate noa a Horomona.
- 41
- Na, era atu meatanga a Horomona, me nga mea katoa i mea ai ia, me ona whakaaro nui, kahore ianei i tuhituhia ki te pukapuka o nga meatanga a Horomona?
- 42
- Na, te roa o te kingitanga o Horomona ki Hiruharama ki a Iharaira katoa, e wha tekau nga tau.
- 43
- Na, kua moe a Horomona ki ona mātua, a tanumia ana ki te pa o Rawiri o tona pāpā, a, ko Rehopoama ko tana tama te kingi i muri i a ia.
Address: 
Phone: 
Email: