1st Kings Chapter 18 - Paipera Tapu 1868 | Te Paipera Tapu 1868

1st Kings Chapter 18 - Paipera Tapu 1868

1
A, ka maha noa nei nga rangi, ka puta mai te kupu a Ihowa ki a Iraia i te toru o nga tau; i mea ia, Haere whakakitea atu koe ki a Ahapa; a maku e hoatu he ua ki runga ki te whenua.
2
Na, haere ana a Iraia ki te whakakite i a ia ki a Ahapa. Nui atu hoki te mate-kai o Hamaria.
3
Na ka karanga atu a Ahapa ki a Oparia, ki te kai tohutohu o tona whare. (Na, he nui te wehi o Oparia ki a Ihowa;
4
A, i ta Ietepere hautopenga atu i nga poropiti a Ihowa, na, ka mau a Oparia ki nga poropiti kotahi te rau, a, hunā ana e ia, taki rima tekau nga tangata ki te ana kotahi, a, whangainga ana ratou e ia ki te taro, ki te wai)
5
Na, ka mea a Ahapa ki a Oparia, Haere puta noa i te whenua ki nga puna wai katoa, ki nga awa katoa, tera pea tatou e kite i tetahi tarutaru e ora ai nga hoiho me nga muera; kei poto a tatou kararehe.
6
Na, ka wehea e raua te whenua hei haereerenga ma raua: haere ana a Ahapa, tona kotahi, i tetahi ara, a haere ana a Oparia, tona kotahi, i tetahi ara.
7
A, i a Oparia ano i te ara, na ko Iraia kua tutaki ki a ia, a ka mohio tera ki a ia, ka takoto tapapa, ka mea, Ko toku ariki ranei koe? ko Iraia’?
8
Ano ra ko ia ki a ia, Ko au ra. Haere, korero atu ki tou ariki, Ko Iraia tenei.
9
Na, ka mea tera, He aha ra toku hara i hoatu ai to pononga e koe ki te ringa o Ahapa kia whakamatea?
10
E ora ana a Ihowa tou Atua kahore he iwi, he kingitanga i kore nei toku ariki e tono tangata atu ki reira ki te rapu i a koe: a, ta ratou meatanga mai, Kahore nei; whakaoatitia iho e ia taua kingitanga, taua iwi ranei, me kahore ratou i kite i a koe.
11
Na, kua mea mai na koe inaianei, Haere, korero atu ki tou ariki, Ko Iraia tenei.
12
Na, akuanei kei toku mawehenga atu i a koe, ka kahakina atu koe e te Wairua o Ihowa ki te wahi e kore ai ahau e mohio; a, taku taenga atu ki te whakaatu ki a Ahapa, a ka kore nei ia e kite i a koe, katahi ahau ka patua e ia: heoi e wehi ana ano to pononga i a Ihowa, no toku tamarikitanga ake.
13
Kahore ianei i korerotia ki toku ariki taku i mea ai i ta Ietepere patunga i nga poropiti a Ihowa, taku hunanga i nga poropiti kotahi rau a Ihowa, taki rima tekau nga tangata, i roto i te ana kotahi, a whangainga ana e ahau ki te taro, ki te wai;
14
I mea mai ai koe inaianei, Haere, korero atu ki tou ariki, Ko Iraia tenei? Ka patua hoki ahau e ia.
15
Ano ra ko Iraia ki a ia, E ora ana a Ihowa o nga mano e tu nei ahau i tona aroaro, ko a tenei ra ahau puta ai ki a ia.
16
Na, haere ana a Oparia ki te whakatau i a Ahapa, a korerotia atu ana ki a ia. Na, haere mai ana a Ahapa ki te whakatau i a Iraia.
17
A, te kitenga o Ahapa i a Iraia, na, ka mea a Ahapa ki a ia, Ko koe tenei, e te kai whakararuraru o Iharaira?
18
Ano ra ko ia, Ehara i a au nana i whakararu a Iharaira, engari koe me te whare ano hoki o tou pāpā i ta koutou whakarerenga nei i nga whakahaunga a Ihowa, i a koe ano hoki ka whai nei i nga Paara.
19
Na, tikina atu aianei huihuia mai a Iharaira katoa ki a au ki Maunga Karamere, me nga poropiti e wha rau e rima tekau a Paara, me nga poropiti e wha rau o nga ngahere, e kai na ki te tepu a Ietepere.
20
Katahi ka tikina atu e Ahapa puta noa i nga tamariki katoa a Iharaira, a whakaminea mai ana aua poropiti ki Maunga Karamere.
21
Na, ko te whakatatanga mai o Iraia ki te iwi katoa, ka mea, Kia pehea te roa o ta koutou tahurihuringa ki nga tikanga e rua? ki te mea ko Ihowa te Atua, me whai ki a ia; a ki te mea ko Paara, me whai ki a ia. Heoi kahore noa iho he kupu i whakahokia mai e te iwi ki a ia.
22
Na, ka mea ano a Iraia ki te iwi, Ko ahau anake kua mahue nei o nga poropiti a Ihowa; a, e wha rau e rima tekau tangata nga poropiti a Paara.
23
Na, kia homai e ratou etahi puru ma matou, kia rua, ma ratou ano hoki e whiriwhiri tetahi puru ma ratou, ka tapatapahi ai, ka whakaeke ai ki runga ki nga wahie, kaua hoki he ahi e meatia atu: a, maku e taka tetahi puru, e whakatakoto ki runga ki nga wahie; e kore ano hoki e meatia atu he ahi.
24
A, ma koutou e karanga atu ki te ingoa o o koutou atua; maku hoki e karanga ki te ingoa o Ihowa. Na, te Atua e utua te karanga, ki te ahi, ko ia hei atua. Na, ka whakahokia mai e te iwi katoa, a ka mea, Ka pai tena kupu.
25
Na, ko te meatanga atu a Iraia ki nga poropiti a Paara, Whiriwhiria tetahi puru ma koutou, takā; ko ta koutou ki mua, he tokomaha hoki koutou; ka karanga ai ki te ingoa o o koutou atua; kaua hoki he ahi e meatia atu.
26
Na, ka tango ratou i te puru i hoatu ki a ratou, a, mahia ana e ratou; katahi ratou ka karanga atu ki te ingoa o Paara o te ata iho ano, a taea noatia te poutumarotanga; i mea, E Paara, utua mai ta matou karanga. Heoi kahore he kupu, kihai i utua mai. A tupekepeke ana ratou ki runga ki te aata i hangā nei.
27
A, te poutumarotanga, ka tawai atu a Iraia ki a ratou, i mea ia, Karanga atu, kia nui te reo; he atua hoki ia: kei te korerorero pea ia, kei te whai mea māna ranei, kei te ara ranei, tera pea kei te moe, a me whakaara.
28
Na, nui atu to ratou reo ki te karanga, ka haehae i a ratou ki nga maripi, ki nga oka, ko ta ratou tikanga hoki ia, a tarere noa nga toto ki runga ki a ratou.
29
Heoi kua tawharara te ra, na, ka poropiti ratou, a tae noa ki te whakaekenga o to te ahiahi whakahere; heoi kahore he reo, kihai i utua mai te karanga, kahore tetahi hei whakarongo mai.
30
Na, ka mea a Iraia ki te iwi katoa, Neke mai ki a au. Na, neke mai ana te iwi katoa ki a ia. Katahi ka hangā e ia te aata a Ihowa i wahia.
31
I mau hoki a Iraia ki nga kohatu kotahi tekau ma rua; rite tonu te maha ki nga iwi o nga tamariki a Hakopa, ki a ia nei te kupu a Ihowa i ki nei, Ko Iharaira hei ingoa mou.
32
Na, hangā ana e ia aua kohatu hei aata mo te ingoa o Ihowa, a keria ana he awa ki te taha o te aata, a taka noa, kia rua nga mehua purapura ka ki.
33
Na, whakapaia ana e ia nga wahie, a, tapatapahia ana te puru, whakatakotoria ana ki runga ki nga wahie. Katahi ia ka mea, Whakakiia etahi oko, kia wha, ki te wai, ka riringi ki runga ki te tahunga tinana ki runga hoki ki nga wahie.
34
I mea ano ia, Tena ano hoki. Na, ka meatia ano e ratou. I mea hoki, Kia toru nga meatanga. Na, ka tuatorutia e ratou.
35
Na, ka rere te wai ki tetahi taha o te aata, ki tetahi taha: i whakakiia ano hoki e ia te waikeri ki te wai.
36
Na, i te whakaekenga o to te ahiahi whakahere, ka whakatata mai a Iraia te poropiti, a ka mea, E Ihowa, e te Atua o Aperahama, o Ihaka, o Iharaira, kia mohiotia i tenei ra ko koe te Atua i roto i a Iharaira, ko ahau to pononga, a, nau te kupu i mea ai ahau i enei mea katoa.
37
Whakarongo mai ki a au, e Ihowa, whakarongo mai ki a au, kia mohio ai tenei iwi ko koe a Ihowa te Atua, a, e whakahoki mai ana i o ratou ngakau ki muri nei.
38
Te tino takanga iho o te ahi a Ihowa, pau ake te tahunga tinana, me nga wahie, me nga kohatu, me te puehu, mitikia ake ano hoki te wai i roto i te waikeri.
39
A, te kitenga o te iwi katoa, na, takoto tapapa ana, me te ki ake ano, Ihowa, ko ia te Atua; Ihowa, ko ia te Atua.
40
Na, ko te meatanga atu a Iraia ki a ratou, Hopukia nga poropiti a Paara: kei mawhiti atu tetahi o ratou. Na, hopukia ana ratou e ratou, a, kawea ana e Iraira ki raro ki Awa Kihona, patua iho ki reira.
41
Katahi a Iraia ka mea ki a Ahapa, Haere atu ki runga, ki te kai, ki te inu; he haruru ua hoki te rarā mai nei.
42
Na, haere ana a Ahapa ki te kai, ki te inu, ko Iraia ia i piki ki runga ki te tihi o Karamere, a, tapapa ana ki runga ki te whenua, ko tona mata i roto i ona turi.
43
Na, ka mea ia ki tana tangata, Tena, haere ki runga, tirohia atu te ritenga atu o te moana. Na, haere ana ia ki runga, titiro atu ana, a ka mea, Kahore kau he mea. Na, ka mea ano tera, Hoki atu ano, kia whitu nga hokinga.
44
A, i te whitu, ka mea ia, He kapua nohinohi tera te haere ake ra i roto i te moana; kei te kapu o te ringa tangata te rite. Na, ka mea mai tera, Haere, korero atu ki a Ahapa, Whakanohoia tou hariata, ka haere ki raro; kei araia mai koe e te ua.
45
Heoi mea rawa ake kua pouri pu te rangi i nga kapua, i te hau, nui atu hoki te ua. Na, rere ana tera a Ahapa i runga i te hariata, a haere ana ki Ietereere.
46
A, i runga ano i a Iraia te ringa o Ihowa; na, whitikiria ana e ia tona hope, a, rere ana i mua i a Ahapa, a tae noa ki Ietereere.