1st Kings Chapter 22 - Paipera Tapu 1868 | Te Paipera Tapu 1868

1st Kings Chapter 22 - Paipera Tapu 1868

1
Na, e toru o ratou tau e noho ana, a kahore he whawhai a Hiria ki a Iharaira.
2
Na, i te toru o nga tau ka haere mai a Iehohapata kingi o Hura ki raro ki te kingi o Iharaira.
3
Na, ko te meatanga mai a te kingi o Iharaira ki ana tangata, E mohio ana ranei koutou no tatou Ramoto-kireara, a e ata noho nei tatou, kahore e tangohia mai e tatou i roto i te ringa o te kingi o Hiria?
4
Katahi ia ka mea atu ki a Iehohapata, Kia haere taua ki Ramoto-kireara ki te whawhai? Ano ra ko Iehohapata ki te kingi o Iharaira, Ahau, a koe, rite tonu taua: toku iwi, tou iwi, rite tonu: oku hoiho, ou hoiho, rite tonu.
5
I mea mai ano a Iehohapata ki te kingi o Iharaira, Tena, rapua aianei tetahi kupu i a Ihowa.
6
Katahi ka huihuia nga poropiti e te kingi o Iharaira, e wha rau aua tangata. Na, ko tana meatanga atu ki a ratou, Me haere ranei ahau ki Ramoto-kireara ki te whawhai, kauaka ranei? Ano ra ko ratou; Haere; ma te Ariki hoki e hoatu ki te ringa o te kingi.
7
Na, ko te meatanga mai a Iehohapata, Kahore ranei tetahi atu i konei, tetahi poropiti a Ihowa, hei rapunga atu ma tatou?
8
Ano ra ko te kingi o Iharaira ki a Iehohapata, Tenei ano hoki tetahi, ko Mikaia tama a Imira hei rapunga atu ma tatou i ta Ihowa: otiia e kino ana ahau ki a ia; no te mea kahore ana poropiti pai moku; engari he kino. Na, ka mea mai a Iehohapata, Kaua e pena mai te kupu a te kingi.
9
Katahi te kingi o Iharaira ka karanga ki tetahi rangatira, ka mea, Kia hohoro mai a Mikaia tama a Imira.
10
Na, i runga i tona torona, i tona torona, te kingi o Iharaira raua ko Iehohapata kingi o Hura e noho ana, oti rawa o raua kakahu te kakahu, i te wahi takoto kau i te kuwaha o te kēti o Hamaria, me te poropiti ano nga poropiti katoa i to raua aroaro.
11
Na, kua oti i a Terekia tama a Kenaana etahi haona rino te hanga mana. Ko tana kupu ano tenei, Ko te kupu tenei a Ihowa, Ka werohia nga Hiriani e koe ki enei, a poto noa.
12
Me nga poropiti katoa ano hoki, pena tonu ta ratou poropiti; i mea ratou, Haere atu ki Ramoto-kireara, kia taea hoki tau; kua homai hoki e Ihowa ki te ringa o te kingi.
13
A, i korero ano te karere i haere ki te karanga i a Mikaia; i mea ki a ia, Nana, nga kupu a nga poropiti ki te kingi kotahi tonu te mangai mo te pai: na, kia rite to kupu ki te kupu a tetahi o ratou, kia pai o korero.
14
Na, ko te meatanga mai a Mikaia, E ora ana a Ihowa, ina, ko ta Ihowa e korero mai ai ki a au, ko taku tena e korero ai.
15
A, tona taenga mai ki te kingi, ka mea te kingi ki a ia, E Mikaia, me haere ranei matou ki Ramoto-kireara ki te whawhai, kaua ranei? Ano ra ko tera ki a ia. Haere, kia taea hoki tau; kua hoatu hoki e Ihowa ki te ringa o te kingi.
16
Na, ko te meatanga mai a te kingi ki a ia, Kia hia ianei aku whakaoatitanga i a koe kia kati au e korero mai ai ki a au, ko te mea pono anake, i runga i te ingoa o Ihowa?
17
Katahi tera ka ki atu, I kite ahau i a Iharaira katoa e marara noa ana i runga i nga maunga, koia ano kei nga hipi kahore nei o ratou kai tiaki, a i mea ano a Ihowa, Kahore o enei ariki: kia hoki marie atu ratou ia tangata, ia tangata, ki o ratou whare.
18
Na, ko te meatanga ake a te kingi o Iharaira ki a Iehohapata, Kahore ianei ahau i ki atu ki a koe, E kore e pai tana poropititanga moku; engari he kino.
19
Katahi tera ka ki atu, Mo reira, whakarongo mai ki te kupu a Ihowa, I kite ahau i a Ihowa, e noho ana i runga i tona torona, i te mano katoa ano hoki o te rangi e tu ana i tona taha ki matau, i tona taha ki maui.
20
Na, ko te meatanga iho a Ihowa, Ko wai hei whakapati i a Ahapa kia haere atu ai ia kia hinga ai ki Ramoto-kireara? Heoi puta ke ta tenei kupu, puta ke ta tenei kupu.
21
Na, ko te putanga mai o tetahi wairua, tu ana i te aroaro o Ihowa, ka mea, Maku ia e whakapati.
22
A ka mea a Ihowa ki a ia, Me pehea? Ano ra ko tera, Me haere atu ahau, a hei wairua teka ahau i roto i nga mangai o ana poropiti katoa. Na, ko tana meatanga mai, Mau ia e whakapati, ka taea ano hoki e koe. Haere, meatia tau na.
23
Na, kua hoatu inaianei e Ihowa he wairua teka ki te mangai o enei poropiti katoa au, kua kino ano hoki ta Ihowa korero mou.
24
Katahi ka whakatata mai a Terekia tama a Kenaana, a, patua ana e ia te paparinga o Mikaia, ka mea, I na hea te haerenga atu o te wairua o Ihowa i a au ki a koe korero ai?
25
Ano ra ko Mikaia, Tera koe e kite i te ra e haere ai koe ki tetahi ruma i roto rawa piri ai.
26
Katahi te kingi o Iharaira ka mea, Kawea atu a Mikaia, whakahokia ki a Amono rangatira o te pa, ki a Ioaha ano hoki tama a te kingi;
27
Ki atu hoki, Ko te kupu tenei a te kingi, Hoatu tenei ki roto ki te whare herehere, whangaia ano hoki ki te taro o te tangihanga, ki te wai o te tangihanga, kia hoki mai ra ano ahau i runga i te rangimarie.
28
Ano ra ko Mikaia, Ki te hoki mai koe i runga i te rangimarie, ehara ahau i te kai whakapuaki i a Ihowa korero. I mea ano ia, Whakarongo mai, e nga iwi, e koutou katoa!
29
Na, haere ana te kingi o Iharaira raua ko Iehohapata kingi o Hura ki runga ki Remoto-kireara.
30
Na, ko te meatanga mai a te kingi o Iharaira ki a Iehohapata, Me whakaputa ke toku ahua, ka haere ki te whawhai; ko koe ia kakahuria ou kakahu. Na, whakaputa ke ana te kingi o Iharaira i tona ahua, a, haere ana ki te whawhai.
31
Kua oti ano i te kingi o Hiria te whakahau ana rangatira e toru tekau ma rua, nga kai whakahaere o ona hariata; i mea ia, Kaua e whawhai ki te iti, ki te rahi; engari ki te kingi anake o Iharaira.
32
A, te kitenga o nga rangatira o nga hariata i a Iehohapata, ka mea ratou, Koia ano tenei te kingi o Iharaira. Na, peka mai ana ratou ki a ia ki te whawhai ki a ia. Na, ko te hamamatanga o Iehohapata.
33
A, te kitenga o nga rangatira o nga hariata ehara ia i te kingi no Iharaira, hoki ana ratou i te whai i a ia.
34
Na, ka kumea te kopere e tetahi tangata, he mea noa iho, tu tonu atu te kingi o Iharaira i waenga pu o te hononga iho o te pukupuku. Katahi tera ka mea atu ki te kai arataki o tana hariata, Tahuri tou ringa; kawea atu ahau i roto i te ope; kua tu hoki ahau.
35
Na, ka rahi haere te whawhai i taua ra: a he mea pupuri ake te kingi i runga i te hariata kia tu tonu atu ai ia ki nga Hiriani; na, i te ahiahi ka mate: a, rere mai ana nga toto o te tūnga ki waenganui o te hariata.
36
Na, ka pa te karanga puta noa i te ope i te mea ka to te ra; ko te kupu tenei, Ki tona pa, ki tona whenua, e tera tangata, e tera tangata!
37
Na, kua mate te kingi, a ka kawea mai ki Hamaria, tanumia iho e ratou te kingi ki Hamaria!
38
A, i horoia ano te hariata ki te poka wai i Hamaria; a, mitikia ana ona toto e nga kuri: (i horoia ano hoki e ratou ana mea mo te whawhai;) he whakaritenga mo ta Ihowa kupu i korero ai.
39
Na, era atu meatanga a Ahapa, me nga mea katoa i mea ai ia, me te whare rei i hangā e ia, me nga pa katoa i hangā e ia, kahore ianei i tuhituhia ki te pukapuka o nga meatanga o nga ra o nga kingi o Iharaira?
40
Na, moe ana a Ahapa ki ona mātua, a ko tana tama ko Ahatia, hei kingi i muri i a ia.
41
No te wha o nga tau o Ahapa kingi o Iharaira i kingi ai a Iehohapata tama a Aha ki a Hura.
42
E toru tekau ma rima nga tau o Iehohapata i tona meatanga hei kingi, e rua tekau ma rima nga tau i kingi ia ki Hiruharama: na, te ingoa o tona whaea, ko Atupa he tamahine na Hirihi.
43
A, i haere ano ia i nga ara katoa o tona pāpā o Aha; kihai i peka ke atu; i mahi ia i te mea e tika ana ki ta Ihowa titiro iho: otiia kihai nga wahi tiketike i whakakahoretia; i patu whakahere ano te iwi, i tahu whakakakara ki runga ki nga wahi tiketike.
44
A, i houhia ano te rongo a Iehohapata raua ko te kingi o Iharaira.
45
Na, era atu meatanga a Iehohapata me ana mahi toa, me ana whawhaitanga, kahore ianei i tuhituhia ki te pukapuka o nga meatanga o nga ra o nga kingi o Hura?
46
I whakamotitia atu ano hoki e ia i te whenua era atu o te hunga whaka-Horoma i mahue nei i nga ra o tona pāpā o Aha.
47
Na, i taua wa kahore o Eroma kingi: he kawana te kingi.
48
A, i hangā etahi kaipuke Tarahihi e Iehohapata hei tiki koura ki Opira. Otiia kihai i rere; i pakaru hoki nga kaipuke ki Ehiono-kepere.
49
Katahi a Ahatia tama a Ahapa ka mea ki a Iehohapata, Kia eke tahi aku tangata me o tangata ki runga ki nga kaipuke. Heoi kihai a Iehohapata i pai.
50
Na, kua moe a Iehohapata ki ona mātua, a, tanumia ana ki ona mātua ki te pa o tona tupuna, o Rawiri; a, ko tana tama ko Iehorama te kingi i muri i a ia.
51
No te tekau ma whitu o nga tau o Iehohapata kingi o Hura i meatia ai a Ahatia tama a Ahapa hei kingi mo Iharaira, i Hamaria; a e rua nga tau i kingi ai ia ki a Iharaira.
52
A, i kino tana mahi ki te aroaro o Ihowa, i haere hoki i te ara o tona matua, i te ara o tona whaea, i te ara ano hoki o Ieropoama tama a Nepata i mea nei i a Iharaira kia hara:
53
I mahi hoki ki a Paara, a, koropiko ana ki a ia; i whakapataritari i a Ihowa Atua o Iharaira: rite tonu tana ki nga mea katoa i mea ai tona pāpā.