- 1
- Na, ko Kingi Horomona, te kingi o Iharaira katoa.
- 2
- Ko ana rangatira ano enei; ko Ataria tama a Haroko tohunga.
- 3
- Ko Erihorepe raua ko Ahia ko nga tama a Hiha nga kai tuhituhi, ko Iehohapata tama a Ahiruru te kai whakamaharahara.
- 4
- Ko Penaia tama a Iehoiara te rangatira ope: ko Haroko raua ko Apiatara nga tohunga:
- 5
- Ko Ataria tama a Netana te rangatira o nga kai tohutohu: ko Tapuru tama a Netana hei tino rangatira, hei takahoa mo te kingi.
- 6
- Ko Ahihara te rangatira o te whare: ko Aronirama tama a Apara to nga takoha.
- 7
- Na, kotahi tekau ma rua nga kai tohutohu a Horomona mo Iharaira katoa, hei mea kai ma te kingi ratou ko tona whare: kotahi ano te marama mea kai o tetahi, o tetahi, i te tau.
- 8
- Ko o ratou ingoa ano enei: Ko te tama a Huru i Maunga Eperaima:
- 9
- Ko te tama a Rekara i Makaha, i Haarapimi, i Pete-hemehe, i Erono-petehanana:
- 10
- Ko te tama a Hehere i Arupoto; i a ia Hokoho me te whenua katoa o Hewhere:
- 11
- Ko te tama a Apinarapa i te whenua katoa o Roro: i a ia nei a Tapata tamahine a Horomona hei wahine mana:
- 12
- Ko Paana tama a Ahiruru; i a ia nei Taanaka, Mekiro, Pete-heana katoa, tera i Taretana i raro i Ietereere, o Pete-heana atu a tae noa ki Apere-mehora, ki tua atu o Iokomeama:
- 13
- Te tama a Kepere i Ramoto-kireara: i a ia nga pa o Haira tama a Manahe i Kireara; i a ia nga wahi i Arakopa, i Pahana, e ono tekau nga pa nunui, taiepa rawa, tutaki rawa ki te parahi:
- 14
- Ko Mahanaimi i a Ahinarapa tama a Iro:
- 15
- I Napatari a Ahimaata; i tangohia ano hoki e ia a Pahemata tamahine a Horomona hei wahine mana:
- 16
- I Ahera i Aroto a Paana tama a Huhai:
- 17
- I Ihakara a Iehohapata tama a Parua:
- 18
- I Peniamine a Himei tama a Eraha:
- 19
- I te whenua a Kireara a Kepere tama a Uri, i te whenua o Hihona, kingi o nga Amori raua ko Oka kingi o Pahana; ko ia anake ano hoki te kai tohutohu o taua whenua.
- 20
- A, tini iho a Hura raua ko Iharaira, pera tonu me te onepu i te taha o te moana te tini, kai ana ratou, inu ana, a hari noa iho.
- 21
- Na, ko Horomona te kingi o nga kingitanga katoa, o te awa atu, a tae noa ki te whenua o nga Pirihitini, ki te rohe ra ano o Ihipa. I mau hakari mai ano ratou, a mahi ana i nga mahi a Horomona i nga ra katoa i ora ai ia.
- 22
- Na, te kai a Horomona o te ra kotahi, e toru tekau nga mehua paraoa pai, a e ono tekau nga mehua paraoa ke,
- 23
- Kotahi tekau nga kau, he mea momona, e rua tekau ano hoki nga kau no nga haerenga kau, kotahi rau nga hipi, apititia iho ki nga hāta, ki nga aneterope, ki te parotiri, ki nga manu whangai.
- 24
- Ko ia hoki te kingi o tenei taha katoa o te awa, o Tipiha, tae noa ki Kaha; i runga ia i nga kingi katoa o tenei taha o te awa: i mau ano hoki te rongo i nga taha katoa ona.
- 25
- A, noho hu noa iho a Hura raua ko Iharaira, tera, tera, i raro i tana waina, i tana piki, no Rana mai ano, a, Peere-hepa atu ana, i nga ra katoa o Horomona.
- 26
- A, e wha tekau mano nga turanga a Horomona mo nga hoiho o ona hariata, kotahi tekau ma rua mano nga kai eke hoiho.
- 27
- Na, aua kai tohutohu ano hoki i mea kai ma Kingi Horomona ratou ko te hunga katoa e haere mai ana ki te tepara a Kingi Horomona, tenei tangata i tona marama, tenei tangata i tona marama: kahore he mea i kore i a ratou.
- 28
- I kawea mai ano hoki e ratou he parei, he kakau witi, ma nga hoiho, ma nga muera, ki te wahi kei reira nei nga tangata, kei tana mahi, kei tana mahi.
- 29
- Na, homai ana e te Atua he mohiotanga ki a Horomona me te mahara nui whakaharahara, me te ngakau nui ano hoki, koia ano kei te onepu i te taha o te moana.
- 30
- Nui atu hoki te mohiotanga o Horomona i te mohiotanga o nga tamariki katoa o te rawhiti, i te mohiotanga katoa ano hoki o Ihipa.
- 31
- Nui atu hoki tona mohiotanga i to nga tangata katoa, i to Etana Eterahi, i to Hemana, i to Karakoro, i to Rarara, ara, i to nga tama a Mahoro; a, pakū ana tona ingoa ki nga iwi katoa i tetahi taha, i tetahi taha.
- 32
- Na, e toru mano nga whakatauki i korerotia e ia; kotahi mano ma rima ano hoki ana waiata.
- 33
- I korerotia ano hoki e ia nga rakau, te hita i Repanona, a tae iho ana ki te hihopa e tupu nei ki te taiepa: i korerotia ano hoki e ia nga kararehe, nga manu, nga mea ngoki, me nga ika.
- 34
- A ka haere mai nga tangata i roto i nga iwi katoa ki te whakarongo ki te mohiotanga o Horomona, i nga kingi katoa o te whenua i rongo nei ki tona mohiotanga.
Address: 
Phone: 
Email: