- 1
- Na, ka tonoa mai ana tangata e Hirama kingi o Taira ki a Horomona; i rongo hoki ia kua oti ia te whakawahi hei kingi i muri i tona pāpā: he aroha mau tonu hoki to Hirama ki a Rawiri.
- 2
- A ka tono tangata atu ano a Horomona ki a Hirama, hei ki atu,
- 3
- E mohio ana koe kihai i taea e toku pāpā e Rawiri te hanga whare mo te ingoa o Ihowa, o tona Atua; i nga whawhai hoki i tetahi taha ona, i tetahi taha, a taea noatia te hoatutanga o ratou e Ihowa ki raro i nga kapu o ona waewae.
- 4
- Ko tenei, kua mea nei a Ihowa toku Atua kia okioki ahau i tetahi taha, i tetahi taha; kahore he hoa riri, kahore hoki he kino e pa mai ana.
- 5
- Na, e mea ana tenei ahau kia hangā he whare mo te ingoa o Ihowa, o toku Atua, kia whakaritea te kupu a Ihowa ki toku pāpā ki a Rawiri, tana i mea ai, Ko to tama e hoatu e ahau i muri i a koe ki runga ki to torona, mana e hanga te whare mo toku ingoa.
- 6
- Na, mau e whakahau kia tapahia mai he hita maku i Repanona, a ko oku tangata hei hoa mo o tangata, me hoatu ano hoki e ahau ki a koe he utu mo o tangata; ka rite ki nga mea katoa e ki mai ai koe; e mohio ana hoki koe kahore o matou tangata hei rite mo nga Haironi te mohio ki te tapahi rakau.
- 7
- A, te rongonga o Hirama i nga kupu a Horomona, nui atu te koa, a ka mea, Kia whakapaingia a Ihowa i tenei ra, Nana nei i homai ki a Rawiri he tamaiti mohio hei rangatira mo tenei iwi nui.
- 8
- Na, ka tono tangata atu a Hirama ki a Horomona hei ki atu, Kua whakaaroa e ahau au mea i tono mai ai koe ki a au: maku e mea tau e pai ai, ara, nga rakau, te hita, me te kauri.
- 9
- Ma aku tangata e taritari mai i runga i Repanona ki te moana: a, maku e whakatere atu i te moana ki te wahi e whakarite ai koe ki a au, maku hoki e mea kia rukea ki uta ki reira, ka tiki mai ai e koe: e meatia ano hoki e koe taku e pai ai, ki te homai e koe he kai ma toku whare.
- 10
- Na, homai ana e Hirama nga hita me nga kauri ki a Horomona, ana rakau i pai ai.
- 11
- A hoatu ana e Horomona ki a Hirama e rua tekau mano nga mehua witi hei kai ma tona whare, e rua tekau nga mehua hinu, o te mea i tukia; ko ta Horomona tenei i hoatu ai ki a Hirama i tenei tau, i tenei tau.
- 12
- A, homai ana e Ihowa ki a Horomona he mohiotanga, pera ana ia me tana i korero ai ki a ia: mau tonu te rongo o Hirama raua ko Horomona; i whakarite kawenata ano hoki raua.
- 13
- Na, ka tangohia mai e Horomona etahi tangata hei takoha i roto i a Iharaira katoa; e toru tekau mano tangata taua takoha.
- 14
- A ungā atu ana e ia ki Repanona, tekau nga mano i te marama kotahi, he mea whakawhitiwhiti: kotahi to ratou marama i Repanona, e rua nga marama i te kāinga: a, ko Aronirama te rangatira o taua takoha.
- 15
- Na, e whitu tekau mano nga tangata a Horomona hei mau kawenga, a e waru tekau mano hei tarai i runga i te maunga;
- 16
- Hāunga nga rangatira o nga kai tohutohu a Horomona i whakahau nei i te mahi, e toru mano e toru rau aua kai whakahau i nga kai mahi i te mahi.
- 17
- A, i whakahau ano te kingi, a ka kawea mai e ratou etahi kohatu nui, etahi kohatu utu nui, etahi kohatu hahau hei tutanga mo te whare.
- 18
- Na, taraia ana e nga kai hanga a Horomona ratou ko nga kai hanga a Hirama, ko nga Kipiri ano hoki, whakapaia ana e ratou nga rakau me nga kohatu hei hanga mo te whare.
Address: 
Phone: 
Email: