1st Kings Chapter 7 - Paipera Tapu 1868 | Te Paipera Tapu 1868

1st Kings Chapter 7 - Paipera Tapu 1868

1
Na, kotahi tekau ma toru nga tau o Horomona e hanga ana i tona whare ake. Na, kua oti i a ia tona whare katoa.
2
I hangā ano hoki e ia te whare o te ngahere o Repanona; tona roa, kotahi rau nga whatianga, tona whanui e rima tekau nga whatianga, tona tiketike e toru tekau nga whatianga; na, te turanga, ko nga rarangi pou e wha, he hita, a, he kurupae hita i runga i aua pou.
3
He hita ano hoki te hipoki iho, i runga ano i nga kurupae, a, i runga era i nga pou e wha tekau ma rima, kotahi tekau ma rima ki te rarangi.
4
A, e toru nga rarangi o nga matapihi; rite tonu mai tenei wini ki tenei wini; e toru nga rarangi.
5
Na, he taha wha nga tatau katoa, nga pou tatau me nga matapihi, me te anga mai ano hoki tenei matapihi ki tenei matapihi; e toru nga rarangi.
6
I hangā ano hoki e ia etahi pou hei whakamahau; e rima tekau whatianga tona roa, a, e toru tekau whatianga tona whanui: na, i mua tonu te whakamahau i era pou: i mua tonu hoki i era enei pou me te kurupae matotoru.
7
Na, ka hangā e ia he whakamahau mo te torona, mo te wahi e whakarite whakawa ai ia, ara, te whakamahau whakarite whakawa; he mea hipoki ki te hita i tetahi taha o te papa, a tae noa ki tetahi taha o te papa.
8
A, tona whare i noho ai ia, he marae ano tona i roto atu i te whakamahau, rite tonu te hanganga. I hangā ano hoki e Horomona he whare mo te tamahine a Parao i marenatia nei e ia; he mea e rite tonu ana ki tenei whakamahau.
9
He kohatu utu nui enei katoa; rite tonu ki nga ruri o nga kohatu tarai, he mea kani ki te kani, a roto, a waho, o te turanga ake ano, a, tae noa ki nga whakapaipai i runga; pera tonu i te taha ki waho whaka-te-marae nui.
10
He kohatu utu nui ano te turanga, he nunui nga kohatu, he kohatu kotahi tekau nei nga whatianga, he kohatu e waru nei nga whatianga.
11
Na, a runga, he kohatu utu nui, (rite tonu ki nga ruri o nga kohatu tarai,) he hita ano hoki.
12
Na, te marae nui, a taka noa, e toru nga rarangi kohatu, he mea tarai, kotahi hoki te rarangi o nga kurupae hita mo to roto marae o te whare o Ihowa, mo te whakamahau ano hoki o te whare.
13
A, i tono tangata ano a Kingi Horomona ki te tiki i a Hirama i Taira.
14
He tamaiti ia na tetahi pouaru o to Napatari iwi, he tangata no Taira tona pāpā, he kai mahi parahi: ki tonu ia i te tupato, i te whakaaro, i te mohio ki te mahi i nga mahi parahi katoa. Na, haere mai ana ia ki a Kingi Horomona ki te mahi i ana mahi katoa.
15
Nāna hoki i hanga nga pou parahi e rua, tekau ma waru nga whatianga te roa o tetahi, o tetahi, a tekau ma rua nga whatianga o te aho hei pae mo tetahi, mo tetahi.
16
I hangā ano hoki e ia etahi whakapaipai e rua ki te parahi whakarewa hei mea mo nga pito ki runga o nga pou; e rima nga whatianga te tiketike o tetahi whakapaipai, a, e rima nga whatianga te tiketike o tetahi whakapaipai.
17
Me nga kupenga, i rite nei te mahinga ki to te kupenga, nga awhiawhi, he mea mekameka, mo nga whakapaipai i nga pito ki runga o nga pou: e whitu mo tetahi whakapaipai, a, e whitu mo tetahi whakapaipai.
18
Heoi hangā ana e ia nga pou, me nga rarangi e rua i tetahi kupenga, a taka noa, taka noa, no ka kapi i nga pamekaranete nga whakapaipai o te pito ki runga: i pera ano ia ki te rua o nga whakapaipai.
19
Na, he rengarenga te mahi o nga whakapaipai i te pito ki runga o nga pou i te whakamahau; e wha nga whatianga.
20
He pamekaranete ano hoki i te pito ki runga o nga whakapaipai o nga pou e rua, anga tonu mai ki te puku i te taha o te kupenga; e rua rau nga pamekaranete, he mea rarangi tonu ki tetahi whakapaipai, a taka noa.
21
Na, whakaturia ana e ia nga pou ki te whakamahau o te temepara: i whakaturia ano e ia te pou ki te taha ki matau, a, huaina iho tona ingoa, Ko Iakini: i whakaturia ano e ia te pou ki maui, a, huaina iho tona ingoa, Ko Poaha.
22
He rengarenga ano hoki te mahi o te pito ki runga o nga pou: na, ka oti te mahi o nga pou.
23
I hangā ano e ia tetahi moana, he mea whakarewa, tekau nga whatianga o tetahi pareparenga ki tetahi pareparenga, he mea porotaka, e rima whatianga tona tiketike: e toru tekau nga whatianga o te aho i paea ai.
24
A, i raro iho i tona niao ko etahi puku, a taka noa, taka noa, tekau ki te whatianga kotahi; i te taha o te moana a taka noa, taka noa: e rua nga rarangi o nga puku i whakarewaina i te whakarewanga ai.
25
I runga i nga kau kotahi tekau ma rua taua moana e tu ana, e toru e anga ana ki te nota, e toru e anga ana ki te hauauru, a, e toru e anga ana ki te tonga, e toru e anga ana ki te rawhiti: na, i runga i aua kau te moana e tu ana; a, i anga whakaroto a muri o ratou.
26
A, he whanuitanga ringaringa tona matotoru, rite tonu te hanganga o tona niao ki to te niao o te kapa, he puawai rengarenga ona, e rua mano ona pati ina ki.
27
I hangā ano hoki e ia etahi turanga parahi kotahi tekau, e wha nga whatianga te roa o tetahi turanga, e wha nga whatianga tona whanui, a, e toru nga whatianga tona tiketike.
28
Ko te hanganga ano tenei o nga turanga: i whai awhi aua mea, a, i nga takiwa o nga karapiti nga awhi:
29
A, i nga awhi i nga takiwa o nga karapiti, he raiona, he kau, he kerupima; a, he turanga ano to nga karapiti he mea i timata mai i runga: a, i raro iho i nga raiona, i nga kau, ko etahi mea i tapiritia mai, he mea angiangi.
30
A, e wha nga wīra parahi o tenei turanga, o tenei turanga, me etahi pīhi parahi ano hoki, he mea paraharaha. I whai pokohiwi ano hoki ona koki e wha; i raro i te takotoranga wai nga pokohiwi, he mea whakarewa, i te taha o nga mea katoa i tapiritia ra.
31
Na, tona waha i roto i te whakapaipai, a, haere whakarunga, kotahi te whatianga, he porotaka ia tona waha, rite tonu ki te mahinga o te turanga, kotahi te whatianga me te hawhe: na he tuhi ano hoki kei tona waha, me nga awhi ano o aua tuhi, he taha wha, ehara i te mea porotaka.
32
A, e wha nga wīra i raro i nga awhi; he mea hono ano hoki ki te turanga nga kakau o nga wīra: na, te ikeike o tetahi wīra, kotahi whatianga me te hawhe whatianga.
33
A, te mahinga o nga wīra, rite tonu ki te mahinga o te wīra hariata: o ratou kakau, nga mea o waenga, o waho, me nga titoko o aua wīra, he mea whakarewa katoa.
34
A, e wha nga pokohiwi i raro i nga koki e wha o te turanga kotahi; nga pokohiwi me te turanga, kotahi tonu ratou.
35
Na, he hawhe whatianga te ikeike o te wahi porotaka i runga i te turanga: a runga o te turanga, ona karapiti, me ona awhi, kotahi tonu ratou.
36
Na, nga papa o ona karapiti, me ona awhi, tuhia iho e ia ki nga kerupima, ki nga raiona, ki nga nikau, he mea whakarite ki te wahi takoto kau o tetahi, o tetahi, ki nga mea ano hoki i tapiritia.
37
Penei tonu tana hanganga i nga turanga kotahi tekau: kotahi tonu te whakarewanga o te katoa, kotahi te nui, kotahi te ahua.
38
Katahi ka hangā e ia ki te parahi etahi oko horoi kotahi tekau: e wha tekau nga pati o te oko kotahi, ina ki: e wha nga whatianga o tetahi oko, o tetahi oko: kotahi te oko horoi i runga i tetahi, i tetahi, a nga turanga kotahi tekau.
39
A, e rima o aua turanga i whakaturia e ia ki te taha ki matau o te whare, e rima ki te taha ki maui o te whare: i whakaturia ano hoki e ia te moana ki te taha ki matau o te whare, ki te rawhiti, ki te wahi e anga mai ana ki te tonga.
40
Na, hangā ana e Hirama nga oko horoi, nga koko pungarehu, me nga peihana. A, mutu ake ta Hirama mahi i nga mahi katoa a Kingi Horomona i hangā e ia mo te whare o Ihowa:
41
I nga pou e rua, me nga mea tuā peihana nei i nga whakapaipai o nga pito ki runga o nga pou e rua, me nga kupenga e rua hei kopaki mo nga peihana e rua o nga whakapaipai i te pito ki runga o nga pou;
42
I nga pamekaranete e wha nga rau mo nga kupenga e rua, e rua nga rarangi pamekaranete mo te kupenga kotahi, hei kopaki mo nga peihana e rua o nga whakapaipai i nga pito ki runga o nga pou.
43
I nga turanga kotahi tekau, me nga oko horoi kotahi tekau i runga i nga turanga.
44
I te moana kotahi, me nga kau kotahi tekau ma rua i raro i te moana.
45
I nga pāta, me nga koko pungarehu, me nga peihana. Na, he parahi kanapa enei mea katoa i hangā nei e Hirama ma Kingi Horomona, hei mea mo te whare o Ihowa.
46
I whakarewaina aua mea e te kingi ki te mānia o Horano ki te wahi onematua i te takiwa o Hukota, o Taretana.
47
A, i waiho noa iho nga mea katoa e Horomona, no te mea he tini whakaharahara; kihai hoki i kitea te taimaha o te parahi.
48
I hangā ano hoki e Horomona nga oko katoa o te whare o Ihowa: te aata koura, me te tepara koura, tera ra i te taro aroaro.
49
Me nga turanga rama he para-kore nei te koura, e rima ki te taha ki matau, a, e rima ki te taha ki maui, i mua mai o te ahurewa, me nga puawai, me nga rama, me te kokopi koura,
50
Me nga kapa, me nga kuku, me nga peihana, me nga koko, me nga tahu-kakara he para-kore nei te koura; me nga inihi koura mo nga tatau o te whare i roto, ara, o te wahi tino tapu, mo nga tatau o te whare, ara, o te temepara.
51
A, te otinga o nga mahi katoa i mahia e Kingi Horomona mo te whare o Ihowa, na, ka kawea mai e Horomona nga mea i whakatapua e tona pāpā e Rawiri, te koura, nga oko; hoatu ana e ia ki roto ki nga taonga o te whare o Ihowa.