1st Kings Chapter 9 - Paipera Tapu 1868 | Te Paipera Tapu 1868

1st Kings Chapter 9 - Paipera Tapu 1868

1
A ka mutu ta Horomona hanga i te whare o Ihowa, i te whare ano hoki o te kingi, i nga mea katoa ano hoki i hiahia ai a Horomona, i pai ai kia mahia;
2
Na, ko te rua o nga putanga mai o Ihowa ki a Horomona, pera ana ano ia me tona putanga ki a ia ki Kipeono.
3
Na, ko te meatanga a Ihowa ki a ia, Kua rongo ahau i to inoi, i to karanga i karanga ai koe ki toku aroaro; kua oti i a au te whakatapu tenei whare kua hangā nei e koe, hei waihotanga iho mo toku ingoa, a, ake ake ake, ka tau mai ano hoki oku kanohi, me toku ngakau, ki konei i nga ra katoa.
4
Na, ki te mea ka rite tou haere i toku aroaro ki te haere o tou pāpā o Rawiri, ki te mea ka tapatahi, ka tika te ngakau, ki te mahi nga mea katoa i whakahau ai ahau ki a koe, ki te pupuri koe i aku tikanga i aku whakaritenga.
5
Katahi ahau ka whakapumau i te torona o tou kingitanga ki a Iharaira, a, ake ake ake, ka pera ano me taku i korero ai ki tou pāpā ki a Rawiri, i a au i ki ra, E kore e whakakorea he tangata mau mo runga i te torona o Iharaira.
6
Ki te anga koutou ko a koutou tamariki ki te tahuri ke, a kahore e whai i a au, e pupuri i aku whakahaunga, i aku tikanga, i hoatu e ahau ki to koutou aroaro, a ka haere, ka mahi ki nga Atua ke, ka koropiko ki a ratou,
7
Katahi ka hautopea atu e ahau a Iharaira, i runga i te mata o te whenua i hoatu e ahau ki a ratou; a, tenei whare i whakatapua nei e ahau mo toku ingoa, ka akiritia atu e ahau i toku aroaro, a ka waiho a Iharaira hei whakatauki, hei taunutanga i roto i nga iwi katoa.
8
Na, tenei whare e tiketike nei, ka miharo nga tangata katoa e haere ana na konei, ka whakahi mai, ka mea, Na te aha tenei mahi a Ihowa ki tenei whenua, ki tenei whare?
9
Katahi ka korerotia mai, Mo ratou i whakarere i a Ihowa, i to ratou Atua, i whakaputa mai nei i o ratou mātua i te whenua o Ihipa, mo ratou i tango ki nga atua ke, a koropiko ana ki a ratou, mahi ana ki a ratou, no reira i taria mai ai e Ihowa tenei kino katoa, ki runga ki a ratou.
10
Na, i te mutunga o nga tau e rua tekau, i te mea, ka oti te hanga e Horomona nga whare e rua, te whare o Ihowa, me te whare o te kingi,
11
(Na, i homai e Hirama kingi o Taira he rakau hita ki a Horomona, he rakau kauri, he koura, ana katoa i pai ai,) na, hoatu ana e Kingi Horomona ki a Hirama e rua tekau nga pa i te whenua o Kariri.
12
A, te haerenga atu o Hirama i Taira kia kite i nga pa i homai nei e Horomona ki a ia, na, kihai i rite ki tana titiro iho.
13
Na, ko tana meatanga mai, Hei aha enei pa i homai nei e koe ki a au, e toku tuakana? Na, huaina iho e ia Ko te whenua o Kapuru, e mau nei ano a tae noa ki tenei ra.
14
Kotahi hoki rau e rua tekau nga taranata koura, i homai e Hirama ki te kingi.
15
Na, ko te mea tenei i tangohia ai te takoha e Kingi Horomona; hei hanga i te whare o Ihowa, i tona whare ano hoki, i Miro, i te taiepa o Hiruhamama, i Hatoro, i Mekiro, i Ketere.
16
I haere mai hoki a Parao kingi o Ihipa, a horo ana a Ketere i a ia, tahuna ana e ia ki te ahi, patua iho hoki nga Kanaani e noho ana i te pa, a homai ana hei kaipakuha ki tana tamahine ki te wahine a Horomona.
17
Na, hangā ana a Ketere e Horomona me Pete-horono ki raro.
18
Me Paarata, me Taramoro i te koraha, i taua whenua,
19
Me nga pa taonga katoa o Horomona, me nga pa mo nga hariata, me nga pa mo nga kai eke hoiho, me to Horomona i hiahia ai kia hangā ki Hiruharama, ki Repanona, ki te whenua katoa ano hoki o tona kingitanga.
20
Ko nga oranga katoa o nga Amori, o nga Hiti, o nga Perihi, o nga Hiwi, o nga Iepuhi ehara nei i nga tamariki a Iharaira.
21
Ko a ratou tamariki i mahue i muri i a ratou i te whenua, kihai nei i taea e nga tamariki a Iharaira te huna rawa, na, whakatakohatia ana ratou e Horomona, he mahi te takoha, a tae noa ki tenei ra.
22
Ko nga tamariki ia a Iharaira, kihai i meinga e Horomona hei kai mahi; ko ratou hoki hei tangata whawhai, hei tangata hoki mana, hei rangatira mana, hei kai whakahauhau mana, hei rangatira ano hoki mo ana hariata, mo ana kai eke hoiho.
23
Ko nga rangatira enei o nga kai tohutohu, o nga rangatira o te mahi a Horomona, e rima rau e rima tekau, he rangatira mo nga kai mahi i te mahi.
24
Na, kua riro atu te tamahine a Parao i roto i te pa o Rawiri ki runga ki te whare i hangā nei e ia mona: katahi a Miro ka hangā e ia.
25
Na, i te tau kotahi e toru nga whakaekenga a Horomona i nga tahunga tinana i nga whakamarietanga ki runga ki te aata i hangā e ia ma Ihowa: i tahuna ano hoki e ia te whakakakara ki tera i te aroaro o Ihowa. Heoi kua oti te whare i a ia.
26
He maha ano hoki nga kaipuke i hangā e Kingi Horomona ki Ehionokepere, ki tera i Eroto i te taha o te Moana Whero i te whenua o Eroma.
27
A, tonoa ana e Hirama ana tangata ki runga ki nga kaipuke, he kai mahi kaipuke he mohio ratou ki te moana, hei hoa mo nga tangata a Horomona.
28
Na, ka rere atu ratou ki Opira, a utaina mai ana he koura i reira, e wha rau e rua tekau nga taranata, a, kawea mai ana ki a Kingi Horomona.