- 1
- Na, i tetahi o aua ra ka mea a Honatana, tama a Haora, ki te taitamariki e mau ana i ana mea mo te patu, Haere mai, taua ka whiti atu ki nga hoia pupuri a nga Pirihitini i tawahi atu ra. Otiia kihai i korerotia e ia ki tona pāpā.
- 2
- A i tera pito o Kipea a Haora e noho ana i raro i tetahi pamekaranete i Mikirono: tata tonu ana tangata ki te ono o nga rau;
- 3
- Me Ahia ano hoki, tama a Ahitupu, tuakana o Ikaporo, tama a Pinehaha, tama a Eri tohunga o Ihowa i Hiro, ko te kai kakahu ia o te epora. Na, kihai te iwi i mohio kua riro a Honatana.
- 4
- Na, a waenga o nga whitinga atu i whai ai a Honatana hei whitinga atu mana, ki nga hoia pupuri a nga Pirihitini, tetahi taha he kohatu keokeo, tetahi taha he kohatu keokeo: te ingoa o tetahi ko Potete, te ingoa o tetahi ko Henehe.
- 5
- I te taha ki te nota tetahi keokeonga e tu ana, i te ritenga atu o Mikimaha; i te taha ki te tonga tetahi, i te ritenga atu o Kipea.
- 6
- Na, ko te meatanga atu a Honatana ki te taitamariki e mau ana i ana mea mo te patu, Haere mai, taua ka haere atu ki nga hoia o enei kokoti-kore: tera pea a Ihowa e mahi i ta taua mahi: kahore hoki he whakakahore mo Ihowa kei meinga e ia te tokomaha, te tokotorutoru ranei, hei whakaora.
- 7
- Ano ra ko te kai mau o ana patu ki a ia, Meatia nga mea katoa e paingia ana e tou ngakau: anga atu, tenei au hei hoa mou, hei pera me ta tou ngakau e pai ai.
- 8
- Ano ra ko Honatana, Nana, me haere atu taua ki nga tangata ra, me whakaputa atu hoki ki a ratou.
- 9
- Ki te penei mai to ratou ki ki a taua, Tu marie, kia tae atu ra ano matou ki a korua; na, me tu taua i to taua turanga, e kore ano hoki e piki atu ki a ratou.
- 10
- Ko tenei, ka penei ta ratou ki mai, Piki ake ki a matou, ko reira taua piki atu ai; no te mea kua homai ratou e Ihowa ki o taua ringa: a ko tenei hei tohu ki a taua.
- 11
- Na, ko te whakaputanga atu o raua tokorua ki nga hoia pupuri a nga Pirihitini: katahi ka mea nga Pirihitini, Nana, ko nga Hiperu e puta mai ana i roto i nga rua i piri ai ratou.
- 12
- Na, ka oho mai nga hoia pupuri ki a Honatana raua ko tana kai mau patu, ka mea, Piki ake ki a matou kia whakakitea ai tetahi mea e matou ki a korua. Na, ko te meatanga atu a Honatana ki te kai mau o ana patu, Piki ake i muri i a au; kua homai hoki ratou e Ihowa ki te ringa o Iharaira.
- 13
- Katahi ka piki atu a Honatana, he mea ngoki atu, me te kai mau o ana patu i muri i a ia: na, hinga ana ratou i a Honatana, me te whakamate ano te kai mau o ana patu i muri i a ia.
- 14
- Na, te patunga tuatahi i patu ai a Honatana raua ko te kai mau o ana patu, tata tonu ki te rua tekau o nga tangata, te nui o taua wahi, kei te hawhe o te whenua e parautia e nga okiha e rua.
- 15
- Na, ka pa te wiri ki te puni, ki era i te parae, ki te iwi katoa ano hoki: ko nga hoia, me nga kai pahua, i wiri ano hoki ratou; i ru ano te whenua: nui whakaharahara te wiri.
- 16
- A, te tirohanga mai a nga tutei a Haora i Kipea o Peniamine, na, kua papahoro te ope, me te patu haere ano i a ratou whaka-ratou.
- 17
- Na, ko te kianga a Haora ki ana tangata, Tirotirohia iho, kia kite ko wai o tatou kua riro. A, ta ratou tirohanga iho, na, kahore a Honatana raua ko te kai mau o ana patu.
- 18
- Katahi a Haora ka mea atu ki a Ahia, Kawea mai te aaka a te Atua. I nga tamariki hoki a Iharaira te aaka a te Atua i taua wa.
- 19
- A, i a Haora ano e korero ana ki te tohunga, na ka tino nui haere te ngangau i te puni o nga Pirihitini: katahi a Haora ka ki atu ki te tohunga, Pepeke ake tou ringa.
- 20
- Katahi ka huihui a Haora ratou ko tona nuinga, a, haere ana ki te whawhai: na, e anga mai ana tera te hoari a tetahi, a tetahi ki tona hoa, ki tona hoa: he nui whakaharahara te matenga.
- 21
- Na, nga Hiperu i roto i nga Pirihitini i mua ake nei, i haere tahi mai nei ratou ki te puni i tetahi taha, i tetahi taha, uru ana ano hoki ratou ki roto ki a Iharaira, ki nga hoa o Haora raua ko Honatana.
- 22
- Me nga tangata katoa ano hoki o Iharaira i piri nei ki Maunga Eperaima, to ratou rongonga ka whati nga Pirihitini, na, kei te whai mai ano i a ratou, whawhai ai.
- 23
- Na, whakaorangia ana a Iharaira i taua ra e Ihowa: puta ke ana te whawhai ki Pete-awene.
- 24
- Otiia i raru nga tangata o Iharaira i taua ra: he whakaoati hoki na Haora i te iwi: i mea ia, Ki te kai tetahi tangata i te kai, a ahiahi noa, ka kangā, kia whai utu ra ano ahau i oku hoa riri. Na, kihai tetahi o te iwi i anga ki te kai.
- 25
- Na, ko te haerenga mai o nga tangata katoa o te whenua ki tetahi ngahere; a he honi kei runga i te whenua.
- 26
- A, te taenga mai o te iwi ki te ngahere, na, e tuturu iho ana te honi; otiia kihai i pa te ringa o tetahi tangata ki tona waha; i wehi hoki te iwi i te oati.
- 27
- Ko Honatana ia kihai i rongo i te whakaoatitanga a tona pāpā i te iwi: na, ka whatorona mai e ia te pito o te tokotoko i tona ringa, a toua ana ki roto ki te honikoma, na, whakahokia ana e ia tona ringa ki tona waha, a ka mārama ona kanohi.
- 28
- Katahi ka oho mai tetahi o te iwi, a ka mea, I tino whakaoatitia te iwi e tou papa; i mea ia, Kia kangā te tangata e kai ana i tetahi kai aianei. A hemo iho te iwi.
- 29
- Na, ko te meatanga ake a Honatana, Raru ana te whenua nei i toku pāpā: titiro hoki, kua mārama oku kanohi, noku ka kai atu nei i tetahi wahi iti o te honi nei.
- 30
- Tera noa ake me i kai te iwi inaianei i nga mea i pahuatia mai i o ratou hoa riri i tupono atu ai ratou: pena e kore ianei e rahi atu te parekura o nga Pirihitini?
- 31
- Na, patua iho e ratou nga Pirihitini i taua rangi i Mikimaha atu, a tae noa ki Atarono: a hemo noa iho te iwi.
- 32
- Heoi ka rere atu te iwi ki nga taonga. Kua mau ki nga hipi, ki nga kau, ki nga kuao kau, patua iho ki te whenua, kainga tahitia ana e te iwi me nga toto.
- 33
- Na, ka korerotia ki a Haora ka meatia, Nana, kua hara te iwi ki a Ihowa, e kainga tahitia ana ta ratou kai me nga toto. Na, ko tana meatanga ake, He mahi tinihanga ta koutou: hurihia mai he kohatu nui ki a au aianei.
- 34
- Na, ko te meatanga atu a Haora, Wawa noa atu koutou ki roto ki te iwi, mea atu hoki ki a ratou, Kawea mai ki a au, e tera tangata, e tera tangata, tana kau, tana hipi, ka patu ai ki konei hei kai ma koutou; kaua hoki e hara ki a Ihowa, e kai i te toto. Katahi ka kawea mai tana kau, tana kau, e te iwi katoa i taua po, a, patua iho ki reira.
- 35
- Na, ka hangā e Haora he aata ma Ihowa. Ko te timatanga tenei o tana hanga aata ma Ihowa.
- 36
- Katahi ka mea a Haora, Tatou ka haere ki raro, ka whai po i nga Pirihitini, ka pahua i a ratou, a mārama noa te ata; kaua ano hoki e waiho e tatou tetahi tangata o ratou. Na, ko ta ratou meatanga mai, Meatia ra nga mea katoa e pai ana ki tau whakaaro iho. Na, ka mea ake te tohunga, Kia whakatata atu tatou ki a Ihowa.
- 37
- Na, ka uia atu te Atua e Haora, Me haere ranei ahau ki raro ki te whai i nga Pirihitini? e homai ranei ratou e koe ki te ringa o Iharaira? Heoi kahore he kupu i whakahokia mai ki a ia i taua ra.
- 38
- Katahi a Haora ka mea ake, Neke mai, e nga rangatira katoa o te iwi: kia mohio ai, kia kite ai koutou no hea tenei hara inaianei.
- 39
- Ta te mea, e ora ana a Ihowa e whakaora nei i a Iharaira, ahakoa no taku tama no Honatana, ka mate ia, mate rawa. Heoi kahore he tangata o te iwi katoa hei whakahoki kupu mai ki a ia.
- 40
- I mea ano ia ki a Iharaira katoa, Ko koutou, hei tetahi taha koutou, a ko maua ko taku tama ko Honatana ki tetahi taha. Na, ko te meatanga mai a te iwi ki a Haora, Meatia ra te mea e pai ana ki tau whakaaro iho.
- 41
- Katahi a Haora ka mea ki a Ihowa ki te Atua o Iharaira, Kia tika te homaitanga o te rota. Na, ka mau ko Honatana raua ko Haora; i mawhiti hoki te iwi.
- 42
- Na ka mea a Haora, makā te rota mo maua ko taku tama ko Honatana. Na, ka mau ko Honatana.
- 43
- Na, ko te meatanga atu a Haora ki a Honatana, Whakaaturia mai ki a au, i aha koe. Katahi ka whakaaturia mai e Honatana ki a ia, a ka mea, He whakamatautau kau atu taku i tetahi wahi iti o te honi ki te pito o te tokotoko i toku ringa. Na, ka mate nei au.
- 44
- Ano ra ko Haora, Kia meatia tenei e te Atua, etahi atu mea ano hoki, ki te kahore koe e tino mate rawa, e Honatana.
- 45
- Na, ko te meatanga mai a te iwi ki a Haora, Kia mate a Honatana nāna nei tenei whakaoranga nui i roto i Iharaira! Kahore ra hoki. E ora ana a Ihowa, e kore e taka tetahi makawe o tona mātenga ki te whenua; i te mahi tahi nei hoki ia me te Atua i tenei ra. Na, whakaorangia ana a Honatana e te iwi, a kihai i mate.
- 46
- Na, haere atu ana a Haora, kihai i whai i nga Pirihitini; a haere ana nga Pirihitini ki to ratou wahi.
- 47
- Na, ka riro i a Haora te kingitanga o Iharaira, a ka whawhai ki ona hoa riri katoa i tetahi taha, i tetahi taha, ki a Moapa, ki nga tamariki a Amona, ki a Eroma, ki nga kingi ano hoki o Topa, ki nga Pirihitini, a he ana ratou i a ia i nga wahi katoa i tahuri ai ia.
- 48
- I whakawahā ano e ia he ope, a, patua ana nga Amareki, whakaorangia ake hoki a Iharaira e ia i te ringa o ona kai pahua.
- 49
- Na, nga tama a Haora, ko Honatana, ko Ihui, ko Marikihua, a ko nga ingoa enei o ana tamahine tokorua; te ingoa o te matamua ko Merapa, te ingoa o to muri iho ko Mikara.
- 50
- A, te ingoa o te wahine a Haora ko Ahinoama, he tamahine na Ahimaata: te ingoa hoki o te rangatira o tana ope ko Apanere, tama a Nere, a te matua kēkē o Haora.
- 51
- Ko Kihi hoki te pāpā o Haora; he tama na Apiere a Nere pāpā o Apanere.
- 52
- A he nui te whawhai ki nga Pirihitini i nga ra katoa o Haora: a ka kite a Haora i tetahi tangata kaha, i tetahi tangata maia, na, ka tangohia mai e ia mana.
Address: 
Phone: 
Email: