1st Samuel Chapter 15 - Paipera Tapu 1868 | Te Paipera Tapu 1868

1st Samuel Chapter 15 - Paipera Tapu 1868

1
Na, ko te meatanga mai a Hamuera ki a Haora, I tonoa mai ahau e Ihowa ki te whakawahi i a koe hei kingi mo tona iwi mo Iharaira: na, whakarongo mai ki te reo o nga kupu a Ihowa.
2
Ko te kupu tenei a Ihowa o nga mano, E whakaaro ana ahau ki ta Amareki i mea ai ki a Iharaira, ki tana whanganga atu i a ia i te ara i tona haerenga mai i Ihipa.
3
Na, tikina, patua a Amareki, whakangaromia rawatia a ratou mea katoa, kaua hoki ratou e tohungia; engari whakamatea ngatahitia te tangata me te wahine, te potiki me te mea ngote u, te kau me te hipi, te kamera me te kaihe.
4
Katahi ka huihuia te iwi e Haora, a, taua ana ratou e ia ki Teraimi, e rua rau nga mano, he hunga haere i raro, me nga tangata hoki o Hura, kotahi tekau nga mano.
5
Na, ko te haerenga atu o Haora ki tetahi pa o Amareki, a, whakatakoto pehipehi ana i roto i te awaawa.
6
I mea hoki a Haora ki nga Keni, Whakatika atu koutou, mawehe atu, haere atu ki raro i roto i nga Amareki, kei hunā tahitia koe e ahau me ratou; i puta hoki ta koutou atawhai ki nga tamariki katoa a Iharaira i to ratou haerenga mai i Ihipa. Na, ka mawehe atu nga Keni i roto i a Amareke.
7
Na, tukitukia ana e Haora nga Amareki i Hawira atu, a tae noa koe ki Huru, ki te ritenga atu o Ihipa.
8
Hopukia oratia ana hoki e ia a Akaka kingi o Amareki, ko te iwi katoa hoki i whakangaromia e ia ki te mata o te hoari.
9
Otiia i tohungia e Haora, ratou ko te iwi, a Akaka, me nga mea pai o nga hipi, o nga kau, o nga mea momona hoki, me nga reme, me nga mea pai katoa, kihai hoki i aro ki te whakangaro i a ratou: engari nga mea e whakaparahakotia ana, e rukea ana, ko ena a ratou i whakangaro ai.
10
Katahi ka puta te kupu a Ihowa ki a Hamuera, ka mea,
11
Kua puta ke aku whakaaro i whakakingitia ai a Haora e ahau hei kingi; nona ka hoki atu i te whai i a au, kihai ano hoki i whakamana i aku kupu. Na, ka pouri a Hamuera, a, pau katoa taua po i a ia e tangi ana.
12
Na, ka maranga wawe a Hamuera i te ata ki te whakatau i a Haora, a ka korerotia ki a Hamuera, ka meatia, Te taenga mai o Haora ki Karamere, na, whakaturia ana e ia tana tohu, a, haere awhio atu ana, kua pahemo atu, kua riro ki raro ki Kirikara.
13
Na, ka tae atu a Hamuera ki Haora, a ka mea a Haora ki a ia, Kia manaakitia koe e Ihowa, kua whakamanā e ahau te kupu a Ihowa.
14
Na, ko te meatanga atu a Hamuera, Ha, he aha tenei tangi o nga hipi i roto nei i oku taringa, me te tangi o nga kau e rongo nei au?
15
Ano ra ko Haora, He mea kawe mai e ratou no nga Amareki: i tohungia hoki e te iwi nga mea pai o nga hipi, o nga kau, hei mea patunga tapu ki a Ihowa ki tou Atua; te toenga hoki, whakangaromia iho e matou.
16
Na, ko te meatanga atu a Hamuera ki a Haora, Kati, kia korerotia atu e ahau ki a koe ta Ihowa i mea mai ai ki a au i tenei po. Ano ra ko tera, Korero.
17
Katahi a Hamuera ka mea atu, I a koe e iti ana ki tau whakaaro iho, kihai ianei koe i meinga hei upoko mo nga iwi o Iharaira, i whakawahia e Ihowa hei kingi mo Iharaira?
18
Na, ko ta Ihowa tononga i a koe kia haere, tana meatanga, Tikina, whakangaromia te hunga hara, nga Amareki, whawhai hoki ki a ratou, a poto noa ratou.
19
He aha koe tē whakarongo ai ki te reo o Ihowa, he aha koe i aurara atu ai ki nga taonga parakete, i mahi ai i te kino i te tirohanga a Ihowa?
20
Na, ka mea a Haora ki a Hamuera, Ina, i whakarongo ano ahau ki te reo o Ihowa, i haere i te ara i tonoa ai ahau e Ihowa, kua kawea mai ano hoki e ahau a Akaka kingi o Amareki; ko nga Amareki ano hoki, whakangaromia iho e ahau.
21
Na te iwi hoki i tango etahi o nga taonga, o nga hipi, o nga kau, nga tino papai o nga mea e whakangaromia ana hei mea patunga tapu ki a Ihowa ki tou Atua ki Kirikara.
22
Ano ra atu ko Hamuera, Ki ta Ihowa e pera ana ranei te pai o nga tahunga tinana o nga patunga tapu, me te whakarongo ki te reo o Ihowa? Nana, pai atu te whakarongo i te patunga tapu, te ngakau mahara i te ngako o nga hipi toa.
23
Rite tonu hoki te tutū ki te hara makutu; te tohe, ki te kino, ki te karakia whakapakoko. Kua whakaparahako nei koe ki te kupu a Ihowa, na, ka whakaparahako ano ia ki a koe hei kingi.
24
Na, ka ki mai a Haora ki a Hamuera, Kua hara ahau, i a au i takahi nei i te kupu a Ihowa i au kupu ano hoki: i wehi hoki ahau i te iwi, i whakarongo ano hoki ki to ratou reo.
25
Na, tena ra, whakarerea noatia iho toku hara, kia hoki atu taua, kia koropiko ai ahau ki a Ihowa.
26
Ano ra ko Hamuera ki a Haora, E kore ahau e hoki tahi taua; he mea hoki kua whakaparahako mai koe ki te kupu a Ihowa, a kua whakaparahako atu a Ihowa ki a koe hei kingi mo Iharaira.
27
A, te tahuritanga mai o Hamuera ki te haere, na, ka mau tera ki te pito o tona kakahu, na, kua pakaru.
28
Na, ko te meatanga mai a Hamuera ki a ia, Kua haea mai e Ihowa inaianei tou kingitanga i roto i a Iharaira, a kua oti te hoatu e ia ki tou hoa e pai atu ana i a koe.
29
E kore ano hoki te Tua-iho o Iharaira e teka; e kore ano hoki e puta ke ana whakaaro; no te mea ehara ia i te tangata e puta ke ai ana whakaaro.
30
Ano ra ko tera, Kua hara ahau: tena ra, whakahonoretia ahau aianei i te aroaro o nga kaurnatua o toku iwi, i te aroaro ano hoki o Iharaira, kia hoki tahi taua, kia koropiko ai ahau ki a Ihowa ki tou Atua.
31
Na, hoki ana a Hamuera i muri i a Haora, a, karakia ana a Haora ki a Ihowa.
32
Na, ko te meatanga ake a Hamuera, Kawea mai ki a au a Akaka kingi o Amareki. Na, ka ata hikoi mai a Akaka ki a ia. A ka mea a Akaka, He pono kua pahemo atu te ngaunga kino a te mate.
33
Ano ra atu ko Hamuera, Na to hoari i kore ai nga uri o nga wahine, ka pena ano tou whaea te uri-kore i roto i nga wahine. Na, haua iho a Akaka e Hamuera i te aroaro o Ihowa i Kirikara.
34
Na, haere ana a Hamuera ki Rama; ko Haora ia i haere ki runga ki tona whare ki Kipea o Haora.
35
Kihai hoki a Haora i tirotirohia e Hamuera i muri iho, a taea noatia te ra i mate ai ia: heoi tangihia ana a Haora e Hamuera: i puta ke ano hoki nga whakaaro a Ihowa i meinga ai e ia a Haora hei kingi mo Iharaira.