- 1
- A ka mutu tana korero ki a Haora, na, piri pu te wairua o Honatana ki te wairua o Rawiri, a, aroha ana a Honatana ki a ia me te mea ko tona wairua ake.
- 2
- Na, ka puritia ia e Haora i taua ra, kihai hoki i tukua kia hoki atu ki tona pāpā.
- 3
- I whakarite kawanata ano a Honatana raua ko Rawiri; i arohaina hoki ia e ia, me te mea ko tona wairua ake.
- 4
- I tangohia mai ano e Honatana tona koroka, a, hoatu ana ki a Rawiri, me ona kakahu, me tana hoari, me tana kopere, me tona whitiki.
- 5
- Na, ka haere a Rawiri ki nga wahi katoa i tonoa ai ia e Haora, ka mahi tupato ano hoki, a ka meinga ia e Haora hei rangatira mo nga tangata whawhai, a, pai tonu ia ki te titiro mai a te iwi katoa, ki te titiro mai ano hoki a nga tangata a Haora.
- 6
- Na, i to ratou haerenga i te hokinga mai o Rawiri i te patu i te Pirihitini, ka puta mai nga wahine i roto i nga pa katoa o Iharaira, me te waiata, me te kanikani, me nga timipera, me te koa, me nga mea whakatangi, ki te whakatau i a kingi Haora.
- 7
- Na, ka waiata whakatene nga wahine i a ratou e takaro ana, a ka mea, Na Haora ana mano, na Rawiri ana tekau mano i patu.
- 8
- Na, nui rawa te riri a Haora; he mea kino hoki taua kupu ki tana whakaaro iho. Na, ka mea ia, Tekau a ratou mano i hoatu ai ki a Rawiri, he mano kau nei a ratou e homai nei ki a au: a, ko te aha ake mana ki te kahore te kingitanga?
- 9
- Na, tau ana te kanohi o Haora ki a Rawiri no taua rangi tonu iho.
- 10
- Na, i te aonga ake ka puta mai taua wairua kino a te Atua ki a Haora, a ka poropiti ia i waenganui o te whare: katahi ka whakatangi te ringa o Rawiri i te hāpa, ka pera me era rangi ake: he tao ano hoki kei te ringa o Haora.
- 11
- Te tino werohanga mai a Haora i te tao; i mea hoki, Me patu a Rawiri e ahau, titi pu atu ki te pakitara. Na, karohia ana e Rawiri: e rua nga mawhititanga mai i tona aroaro.
- 12
- Na, ka wehi a Haora i a Rawiri, no te mea kua whakahoatia ia e Ihowa, a ko Haora kua whakarerea.
- 13
- Katahi a Haora ka mea kia mawehe atu ia i a ia, a, meinga ana ia e ia hei rangatira mano: na, ka haere atu ia, ka haere mai i te aroaro o te iwi.
- 14
- Heoi tupato tonu te whakahaere a Rawiri i ana ara katoa: i a ia ano hoki a Ihowa.
- 15
- A, te kitenga o Haora he tangata tupato rawa ia, na, ka wehi ia i a ia.
- 16
- A, i aroha a Iharaira katoa, ratou ko Hura, ki a Rawiri, no te mea, i haere atu ia, i haere mai i to ratou aroaro.
- 17
- Na, ka mea a Haora ki a Rawiri, Nana, taku tamahine kaumatua, a Merapa, me hoatu ia e ahau hei wahine mau, otiia ko koe hei toa maku, hei whawhai i nga whawhai a Ihowa. I mea hoki a Haora, Kaua toku ringa e pa ki a ia; engari kia pa te ringa o nga Pirihitini ki a ia.
- 18
- Na, ko te meatanga mai a Rawiri ki a Haora, Ko wai ahau, he oranga aha hoki toku, he hapu aha to toku papa i roto i a Iharaira, e meinga ai ahau hei hunaonga ma te kingi?
- 19
- Na, i te wa e homai ai a Merapa te tamahine a Haora ma Rawiri, ka hoatu ia hei wahine ma Atariere o Mehora.
- 20
- Otiia i aroha a Mikara te tamahine a Haora ki a Rawiri, a ka korerotia ki a Haora, a, he mea tika tena ki tana whakaaro iho.
- 21
- Na, ka mea a Haora, Me hoatu e ahau ki a ia, a, hei rore ia mona e pa ai te ringa o nga Pirihitini ki a ia. Koia a Haora i mea ai ki a Rawiri, Ma tetahi o te tokorua e meinga ai koe hei hunaonga ki a au aianei.
- 22
- Katahi a Haora ka whakahau atu ki ana tangata, Korero puku atu ki a Rawiri, mea atu, Nana, e whakaahuareka ana te kingi ki a koe, e aroha ana hoki ana tangata katoa ki a koe: na, aianei koe meinga ai hei hunaonga ma te kingi.
- 23
- Na, korerotia ana aua kupu e nga tangata o Haora ki nga taringa o Rawiri. A ka mea a Rawiri, He mea noa ake koia ki a koutou kia meinga hei hunaonga ma te kingi? ko au ia he rawa-kore, he ware.
- 24
- Na, ka korero nga tangata o Haora ki a ia, ka mea, Ko nga kupu enei i puaki mai i a Rawiri.
- 25
- Katahi a Haora ka mea atu, Kia penei ta koutou ki atu ki a Rawiri, Kahore o te kingi ngakau ki te kai-pakuha; engari ki nga kiri matamata kotahi rau o nga Pirihitini; kia riro mai ai he utu i nga hoa riri o te kingi. I mea hoki a Haora, Ka hinga a Rawiri i te ringa o nga Pirihitini.
- 26
- A, te korerotanga a ana tangata i aua kupu ki a Rawiri, na, tika tonu taua mea ki te whakaaro a Rawiri, ara kia meinga ia hei hunaonga ma te kingi: kahore ano hoki nga ra kia rite noa.
- 27
- Katahi a Rawiri ka whakatika, haere ana, ratou ko ana tangata. Na, patua iho e ia o nga Pirihitini e rua nga tangata; a, kawea ana e Rawiri o ratou kiri matamata; na, maha tonu ratou i homai ai ki te kingi, hei mea mona kia meinga hei hunaonga ma te kingi. Katahi ka homai e Haora a Mikara tana tamahine hei wahine māna.
- 28
- A i kite a Haora, i mohio, kei a Rawiri a Ihowa; a, e aroha ana a Mikara te tamahine a Haora ki a ia.
- 29
- Katahi ka nui ake te wehi o Haora i a Rawiri, hei hoa riri a Haora ki a Rawiri i nga ra katoa.
- 30
- Na, ka puta mai nga rangatira o nga Pirihitini; a, i o ratou putanga mai, nui atu te tika o te ngarahu o Rawiri i to nga tangata katoa o Haora; koia i matenuitia rawatia ai tona ingoa.
Address: 
Phone: 
Email: