- 1
- Na, ka korero a Haora ki a Honatana ki tana tamaiti, ratou ko ana tangata katoa, kia whakamatea a Rawiri.
- 2
- Otiia nui whakaharahara te whakaahuareka o Honatana, tama a Haora, ki a Rawiri. Na, ka korero a Honatana ki a Rawiri, ka mea, E whai ana toku pāpā a Haora kia whakamatea koe: na, kia tupato ra i te ata; me noho ki te wahi ngaro, piri ai;
- 3
- A ka puta mai ahau, ka tu ki te taha o toku pāpā ki te mara e noho ai koe, na, ka korerotia koe e ahau ki toku pāpā, a taku e kite ai ka korerotia e ahau ki a koe.
- 4
- Na, ka korerotia paitia a Rawiri e Honatana ki tona pāpā ki a Haora; i mea ia ki a ia, Kei hara te kingi ki tana pononga ki a Rawiri; kahore hoki ona hara ki a koe, he nui rawa ano hoki te pai o ana mahi ki a koe.
- 5
- I whakamomori atu na hoki ia ki te mate, a patua iho te Pirihitini, na, he nui te whakaoranga i whakaora ai a Ihowa i a Iharaira katoa: i kite koe, i koa hoki, a na te aha ra koe ka hara ai ki nga toto hara-kore, ka whakamate pakupaku ai i a Rawiri?
- 6
- Heoi ka whakarongo a Haora ki te reo o Honatana; na, ka oati a Haora; E ora ana a Ihowa, e kore ia e whakamatea.
- 7
- Katahi ka karangatia a Rawiri e Honatana, a korerotia atu ana e Honatana enei kupu katoa ki a ia. Na, kawea ana a Rawiri e Honatana ki a Haora; a noho ana ia ki tona aroaro, pera ana me era rangi ake.
- 8
- Na, he whawhai ano hoki tena: a haere ana a Rawiri ki te whawhai ki nga Pirihitini, a patua iho ratou e ia, he nui te parekura, a whati ana ratou i tona aroaro.
- 9
- Na, kua puta te wairua kino a Ihowa ki runga ki a Haora, a i te whare ia e noho ana, me tana tao i tona ringa, me te whakatangi hāpa ano te ringa o Rawiri.
- 10
- Na, ka whai a Haora kia werohia atu a Rawiri ki te tao, a titi pu ki te pakitara; otiia i whakahipa atu ia i te aroaro o Haora, a akina kautia ana e tera te tao ki te pakitara; ko Rawiri ia i rere, i mawhiti atu i taua po ano.
- 11
- Na, ka tono tangata atu a Haora ki te whare o Rawiri, ki te whanga ki a ia, kia whakamatea ai ia i te ata. Na, ka korerotia ki a Rawiri e Mikara e tana wahine; i mea ia, Ki te kahore koe e whakaora i a koe i tenei po, apopo koe whakamatea ai.
- 12
- Katahi ka tukua iho a Rawiri e Mikara, na te matapihi: a ka haere ia, ka rere, ka ora.
- 13
- Na, ka mau a Mikara ki tetahi whakapakoko, a whakatakotoria ana e ia ki te moenga, i whakatakotoria iho ano e ia tetahi urunga huruhuru koati ki tona urunga, hipokina iho ki te kakaho.
- 14
- A, te tononga mai a Haora i nga tangata ki te tiki i a Rawiri, ka mea tera, E mate ana ia.
- 15
- Na, ka tono mai ano a Haora i nga tangata kia kite i a Rawiri, ka mea, Kawea mai ki a au i runga i te moenga, kia whakamatea.
- 16
- A, te taenga mai o nga tangata, na, ko te whakapakoko kei te moenga, me te urunga huruhuru koati hei urunga mona.
- 17
- Na, ko te meatanga mai a Haora ki a Mikara, Na te aha koe i tinihanga nei ki a au, i tuku nei i toku hoa riri kia haere, a mawhiti atu ana ia. Ano ra ko Mikara ki a Haora, Nāna ra i ki mai ki a au, Tukua ahau kia haere; kia whakamate ahau i a koe hei aha?
- 18
- Na, ka rere a Rawiri, a mawhiti atu ana; tae tonu atu ki a Hamuera ki Rama, a korerotia atu ana e ia ki a ia nga mea katoa i mea ai a Haora ki a ia. Katahi ia ka haere, raua ko Hamuera, a noho ana raua ki Naioto.
- 19
- A ka korerotia mai te korero ki a Haora, ko Rawiri tera kei Naioto o Rama e noho ana:
- 20
- Na, ka tono tangata a Haora ki te hopu i a Rawiri: heoi te kitenga i te ropu poropiti e poropiti ana, me Hamuera ano hoki e tu ana hei kai tohutohu mo ratou, na, ka puta mai te wairua o te Atua ki runga ki nga tangata o Haora a poropiti ana ano hoki ratou.
- 21
- A, te korerotanga ki a Haora, na, ka tono ia i etahi atu tangata, a ka poropiti ano ratou. Na, ka toru ano hoki nga tononga tangata a Haora, a ka poropiti ano ratou.
- 22
- Na, ka haere ano hoki ia ki Rama, a, te taenga mai ki te puna nui i Heku ka ui ia, ka mea, Kei hea a Hamuera raua ko Rawiri? na, ka meatia mai, Na, kei Naioto o Rama.
- 23
- Katahi ia ka haere ki reira ki Naioto o Rama; a i puta mai ano hoki te wairua o te Atua ki runga ki a ia; na, ka haere ia, me te poropiti haere, a tae noa ki Naioto o Rama.
- 24
- I whakarerea ano hoki e ia ona kakahu, a poropiti ana ano ia i te aroaro o Hamuera; kotahi ra tūturu, kotahi ano po tūturu i takoto tahanga ai ia. Na reira ta ratou kupu, Kei roto ano hoki a Haora i nga poropiti?
Address: 
Phone: 
Email: