- 1
- Na, ka haere mai nga Tiwhi ki a Haora ki Kipea, a ka mea, He teka ianei kei te piri a Rawiri ki Maunga Hakira, ki te wahi e anga atu ana ki Hehimono?
- 2
- Katahi a Haora ka whakatika, haere ana ki raro ki te koraha o Tiwhi, e toru hoki mano ana tangata, he hunga whiriwhiri i roto i a Iharaira, ki te rapu i a Rawiri i te koraha o Tiwhi.
- 3
- A i noho a Haora ki Maunga Hakira, ki tera e anga atu ana ki Hehimono, ki te huarahi: ko Rawiri ia i noho ki te koraha; tona kitenga kua tae mai a Haora ki te koraha ki te whai i a ia;
- 4
- Na, ka tonoa etahi tutei e Rawiri a ka mohio ia he tika rawa te haerenga mai o Haora.
- 5
- I whakatika ano hoki a Rawiri, i haere mai ki te wahi i noho ai a Haora: na, ka titiro iho a Rawiri ki te takotoranga o Haora, raua ko Apanere tama a Nere ko te rangatira o tana ope; na, kei te takoto a Haora i te parepare, tetahi taha ano hoki ona, i tetahi taha, nga puni o te nuinga.
- 6
- Na, ka oho mai a Rawiri ki a Ahimereke Hiti, raua ko Apihai tama a Teruia ko te teina o Ioapa, ka mea, Ko wai e haere hei hoa moku ki raro ki a Haora ki te puni ra? Na, ka mea a Apihai, Taua e haere.
- 7
- Na, ko te haerenga mai o Rawiri raua ko Apihai ki te iwi i te po: na, kei te takoto ano tera a Haora i te parepare me tana tao, pou rawa ki te whenua i te taha o tona urunga: a i tetahi taha ona, i tetahi taha, a Apanere ratou ko te iwi e takoto ana.
- 8
- Na, ko te meatanga ake a Apihai ki a Rawiri, Kua tukua putia nei e te Atua tou hoa riri inaianei ki roto ki tou ringa: na, kia werohia ia e ahau aianei ki te tao a titi pu ki te whenua; kia kotahi ano meatanga, e kore ano hoki e tuaruatia taku ki a ia.
- 9
- Ano ra ko Rawiri ki a Apihai, Kaua ia e whakangaromia: ko wai hoki e hara-kore, ki te totoro atu tona ringa ki ta Ihowa i whakawahi ai?
- 10
- I mea ano a Rawiri, E ora ana a Ihowa, ma Ihowa ano ia e patu; tera e tae mai tona ra e mate ai; ka uru ranei ia ki te whawhai, a ka ngaro.
- 11
- Kaua ahau, e Ihowa, e tukua kia totoro atu toku ringa ki ta Ihowa i whakawahi ai. Engari tangohia te tao i tona urunga, me te ipu wai, a kia haere taua.
- 12
- Na, tangohia ana e Rawiri te tao me te ipu wai i te urunga o Haora; a haere ana raua; kihai hoki tetahi i kite, kihai i mohio, kihai hoki i oho: i te moe katoa hoki ratou; na Ihowa hoki i mea kia au ta ratou moe.
- 13
- Katahi a Rawiri ka haere atu ki tera taha, a tu ana i runga i te tihi o tetahi puke i tawhiti; he nui te takiwa atu ki a ratou.
- 14
- Na, ka karanga atu a Rawiri ki te iwi, ki a Apanere hoki tama a Nere, ka mea, E kore ranei koe e o mai e Apanere? Na, ko te whakahokinga mai a Apanere, Ko wai koe e karanga mai na ki te kingi?
- 15
- Katahi a Rawiri ka mea mai ki a Apanere, He teka ianei he toa koe, a ko wai hei rite mou i roto i a Iharaira? He aha koe tē tiaki ai i tou ariki i te kingi? I haere atu hoki tetahi o te iwi ki te whakangaro i te kingi, i tou ariki.
- 16
- Ehara tenei i te mea pai i meatia nei e koe. E ora ana a Ihowa, ka tika te mate mo koutou, kihai hoki koutou i tiaki i to koutou ariki, i ta Ihowa i whakawahi ai. Na, tirohia iho kei hea te tao a te kingi, me te ipu wai i tona urunga?
- 17
- Na, kua mohio a Haora ki te reo a Rawiri, a ka mea, Nou tena reo, e taku tamaiti, e Rawiri? Ano ra ko Rawiri, Noku te reo, e toku ariki, e te kingi.
- 18
- I mea ano ia, Na te aha tenei whainga a toku ariki i tana pononga, i aha hoki ahau? he aha hoki te he a toku ringa?
- 19
- Na, kia rongo mai toku ariki te kingi ki nga kupu a tana pononga, Ki te mea na Ihowa koe i whakahihiri mai ki a au, kia aro mai ia ki te whakahere: tena ko tenei, na nga tamariki a te tangata, kia kangā ratou i te aroaro o Ihowa; mo ratou i pei nei i a au kei tata ki to Ihowa wahi tupu, mo te kianga mai, Haere, e mahi ki nga atua ke.
- 20
- Na, kaua oku toto e maringi ki te whenua i mua i te aroaro o Ihowa: i haere mai hoki te kingi o Iharaira ki te rapu i tetahi puruhi, me te mea ko tetahi e whai ana i te patiri i runga i nga maunga.
- 21
- Na, ko te meatanga mai a Haora, Kua hara ahau, hoki atu, e taku tama, e Rawiri; e kore hoki ahau e kino ki a koe i nga wa e takoto ake nei, no te mea he taonga nui ki tou whakaaro iho toku wairua inaianei. Nana, he mahi kuare taku, he nui whakaharahara toku he.
- 22
- Na, ka whakahokia atu e Rawiri, i mea ia, Te tao nei a te kingi! kia haere mai tetahi o nga tamariki ki te tiki.
- 23
- A, ma Ihowa e whakahoki iho ta tera mahi tika, ta tera mahi pono, ki a ia, ki a ia; kua homai nei hoki koe e Ihowa i tenei ra ki toku ringa, a kihai ahau i pai kia totoro atu toku ringa ki ta Ihowa i whakawahi ai.
- 24
- Nana, i nui tou wairua ki taku titiro iho inaianei, na, kia pera ano te nui o toku wairua ki ta Ihowa titiro, a kia whakaorangia ahau e ia i nga mate katoa.
- 25
- Katahi a Haora ka mea ki a Rawiri, Kia manaakitia koe, e taku tamaiti, e Rawiri: tera e nui au mahi, ka whai mana ano hoki koe. Na, haere ana a Rawiri i tana haere; a hoki ana hoki a Haora ki tona wahi.
Address: 
Phone: 
Email: