1st Samuel Chapter 6 - Paipera Tapu 1868 | Te Paipera Tapu 1868

1st Samuel Chapter 6 - Paipera Tapu 1868

1
A, e whitu nga marama o te aaka a Ihowa ki te whenua o nga Pirihitini.
2
Katahi ka karanga nga Pirihitini ki nga tohunga karakia, ratou ko nga tohunga tuaahu, ka mea, Me aha e matou te aaka a Ihowa? whakaaturia mai ki a matou hei te aha he mea ma matou ina kawea atu taua mea ki tona wahi.
3
Na, ko ta ratou meatanga mai, Ki te mea koutou kia kawea atu te aaka a te Atua o Iharaira, kei ngarea kautia atu e koutou; engari me hoatu tetahi whakahere mo te he, hei whakahokinga atu ma koutou ki a ia: ko reira koutou ora ai, a ka mohio koutou na te aha tona ringa tē neke atu ai i a koutou.
4
Ano ra ko era, He aha te whakahere mo te he hei whakahokinga atu ki a ia? Na, ka mea mai ratou, Kia rima nga puku koura, kia rite ki te tokomaha o nga rangatira o nga Pirihitini, kia rima hoki nga kiore koura; kotahi tonu nei hoki te mate o koutou katoa, o o koutou rangatira ano hoki.
5
Na, me hanga e koutou nga ahua o o koutou puku, me nga ahua o a koutou kiore i ngaro ai te whenua, ka hoatu kororia ano ki te Atua o Iharaira; tera pea e māmā iho tona ringa ki a koutou, ki o koutou atua, ki to koutou whenua.
6
Na te aha koutou i whakapakeke ai i o koutou ngakau, i pera ai me nga Ihipiana ratou ko Parao i whakapakeke nei i o ratou ngakau? I tana mahinga i nga mea nui i roto i a ratou, kihai ianei ratou i tuku i te iwi, a, haere ana ratou?
7
Na, tikina, hangā he kāta hou kia kotahi, kia rua hoki nga kau waiu, he mea kahore nei i iokatia noatia, ka here ai i nga kau ki te kāta; me whakahoki mai ano hoki a raua kuao ki te whare.
8
Katahi koutou ka tiki i te aaka a Ihowa, ka hoatu ai ki runga ki te kāta, me nga mea koura, ta koutou nei whakahere mo te he, hei whakahokinga atu ki a ia: hei tona taha enei; me whawhao ki te pouaka. Katahi ka tukua atu kia haere.
9
Ko reira tirohia atu ai e koutou; ki te haere na te ara o tana rohe ki runga ki Pete-hemehe, nāna tenei kino nui i mea ki a tatou: a ki te kahore, katahi tatou ka mohio, ehara i a ia te ringa i patua ai tatou; he mea tupono noa mai taua mea i pa mai nei ki a tatou.
10
Na, pera ana aua tangata. Heoi tikina ana e ratou nga kau waiu e rua, a herea ana ki te kāta, ko a raua kuao ia i tutakina ki roto ki te whare.
11
A, whakanohoia ana e ratou te aaka a Ihowa ki runga ki te kāta, me te pouaka, me nga kiore koura, me nga ahua o o ratou puku.
12
A, tika tonu atu nga kau i te ara ki te huarahi ki Pete-hemehe; i haere ki te huarahi kotahi, me te tangi haere, kihai hoki i peka atu ki matau, ki maui, me te aru ano nga rangatira o nga Pirihitini i a raua, a tae noa ki te rohe ki Pete-hemehe.
13
Na, i te kokoti witi nga tangata o Pete-hemehe i te raorao, a, te marangatanga ake o o ratou kanohi, ka kite i te aaka, na, koa ana ratou i te kitenga atu.
14
Na, haere tonu tera te kāta ki te mara a Hohua, a tetahi Pete-hemehe, a tu ana i reira, kei reira ano hoki tetahi kohatu nui: na, tatangia ana e ratou te rakau o te kāta, a whakaekea ana nga kau hei tahunga tinana ki a Ihowa.
15
I tangohia iho ano hoki e nga Riwaiti te aaka a Ihowa, me te pouaka i tona taha, (tera kei roto na nga mea koura,) a whakatakotoria ana ki runga ki te kohatu nui: i whakaeke tahunga tinana ano hoki, i patu patunga tapu nga tangata o Pete-hemehe i taua ra ki a Ihowa.
16
A, te kitenga o nga rangatira e rima o nga Pirihitini, hoki ana ki Ekerono i taua rangi ano.
17
Ko nga puku koura ano enei i hoatu nei e nga Pirihitini hei whakahokinga atu, hei whakahere mo te he ki a Ihowa; na Aharoro kotahi, na Kaha kotahi, na Ahakerono kotahi, na Kata kotahi, na Ekerono kotahi.
18
Me nga kiore koura; rite tonu nei te maha ki nga pa katoa o nga Pirihitini, i nga rangatira tokorima, he mea na nga pa taiepa, na nga pa koraha hoki, a tae noa ki te kohatu nui, ki Apere, whakatakotoria ai te aaka a Ihowa ki runga. E takoto na ano taua kohatu i te mara a Hohua Pete-hemehi a taea noatia tenei ra.
19
Na, ka patua nga tangata o Pete-hemehe, mo ratou i titiro ki roto ki te aaka a Ihowa; koia i patua ai e ia nga tangata o te iwi, e rima tekau nga mano me nga tekau ano e whitu. Na, ka tangi te iwi mo te patunga nui i patua ai te iwi e Ihowa.
20
Na, ko te meatanga ake a nga tangata o Pete-hemehe, Ko wai hei tu ki te aroaro o Ihowa, o tenei Atua tapu? me haere atu ano hoki ia i roto i a tatou ki a wai?
21
Katahi ratou ka tono tangata atu ki nga tangata o Kiriata-tearimi, hei mea atu, Kua whakahokia mai te aaka a Ihowa e nga Pirihitini; haere mauria atu ki a koutou.