1st Samuel Chapter 7 - Paipera Tapu 1868 | Te Paipera Tapu 1868

1st Samuel Chapter 7 - Paipera Tapu 1868

1
Katahi ka haere atu nga tangata o Kiriata-tearimi ki te tiki i te aaka o Ihowa, a kawea ana e ratou ki te whare o Apinarapa i te pukepuke; i whakatapua ano hoki e ratou a Ereatara tana tama hei tiaki i te aaka a Ihowa.
2
A i te nohoanga o te aaka ki Kiriata-tearimi, i te mea kua maha nga ra; (e rua tekau hoki nga tau;) na, ka tangi te whare katoa o Iharaira ki a Ihowa.
3
Katahi ka korero a Hamuera ki te whare katoa o Iharaira, ka mea, Ki te mea e hoki katoa ana o koutou ngakau ki a Ihowa, whakarerea atu nga atua ke i roto i a koutou, me Ahataroto ano hoki; whakapumautia hoki o koutou ngakau ki a Ihowa, me mahi hoki ki a ia anake, a mana koutou e whakaora i roto i te ringa o nga Pirihitini.
4
Na, ka whakarerea atu e nga tamariki a Iharaira nga Paara me Ahataroto, a mahi ana ki a Ihowa anake.
5
Katahi ka mea a Hamuera, Huihuia mai a Iharaira katoa ki Mitipa, a ka inoi ahau ki a Ihowa mo koutou.
6
Na, ka huihui mai ratou ki Mitipa, a utuhia mai ana he wai, ringitia ana ki te aroaro o Ihowa, i noho puku ano hoki i te kai i taua ra, a ka mea i reira, Kua hara matou ki a Ihowa. Na, ka whakarite whakawa a Hamuera mo nga tamariki a Iharaira ki Mitipa.
7
A, te rongonga o nga Pirihitini kua huihui nga tamariki a Iharaira ki Mitipa, na, ka haere mai nga rangatira o nga Pirihitini ki a Iharaira. A ka rongo nga tamariki a Iharaira, na, ka wehi ratou i nga Pirihitini.
8
Na, ko te meatanga mai a nga tamariki a Iharaira ki a Hamuera, Kei whakamutua to karanga ki a Ihowa ki to tatou Atua mo matou, kia whakaorangia matou e ia i te ringa o nga Pirihitini.
9
Na, tikina ana e Hamuera tetahi reme, he mea ngote u, a whakaekea katoatia ana hei tahunga tinana ki a Ihowa. Na, ka karanga a Hamuera ki a Ihowa mo Iharaira, a ka whakarongo mai a Ihowa ki a ia.
10
A, i a Hamuera e whakaeke ana i te tahunga tinana, ka whakatata mai nga Pirihitini ki te whawhai ki a Iharaira: na, nui atu te papātanga o ta Ihowa whatitiri i taua ra ki runga ki nga Pirihitini, a hinga ana ratou; patua iho hoki i te aroaro o Iharaira.
11
Na, ka puta mai nga tangata o Iharaira i roto i Mitipa, a whaia ana nga Pirihitini, tukitukia ana, a tae noa ki raro ki Pete-kara.
12
Na ka mau a Hamuera ki tetahi kohatu nui, a whakatakotoria ana ki te takiwa o Mitipa, o Hene, a huaina iho tona ingoa, Ko Epene-etere; i mea hoki, Ko Ihowa to matou kai awhina a tae noa mai ki tenei wahi.
13
Na, kua taea nga Pirihitini, kihai ano hoki i haere mai i muri iho ki te rohe a Iharaira: i runga hoki i nga Pirihitini te ringa o Ihowa i nga ra katoa o Hamuera.
14
A i whakahokia mai ano ki a Iharaira nga pa i tangohia e nga Pirihitini i a Iharaira, o Ekerono atu, a tae noa ki Kata; i tangohia ano hoki nga rohe o ena pa e Iharaira i roto i te ringa o nga Pirihitini. I mau ano hoki ta Iharaira rongo ki nga Amori.
15
A i whakarite whakawa a Hamuera mo Iharaira i nga ra katoa i ora ai ia.
16
I taiawhio haere hoki ia i tenei tau, i tenei tau, ki Pete-ere, ki Kirikara, ki Mitipa, i whakarite whakawa ano hoki mo Iharaira i aua wahi katoa.
17
A hoki ana ki Rama; i reira hoki tona whare, a whakarite whakawa ana ia mo Iharaira ki reira; i hangā hoki e ia tetahi aata ma Ihowa ki reira.