- 1
- Na, he korero mārama rawa ta te Wairua, ko a nga wa whakamutunga etahi kotiti ke atu ai i te whakapono, tahuri ai ki nga wairua tinihanga, ki nga whakaakoranga rewera;
- 2
- He mea na te hianga o te hunga korero teka; o ratou hinengaro, ano he mea tahu ki te rino wera;
- 3
- E riri ana kia kaua e marena, kia kaua e pa ki nga kai i hangā e te Atua hei mea ma te hunga e whakapono ana, e mātau ana hoki ki te pono; me te whakawhetai ano ia ratou.
- 4
- He pai hoki nga mea katoa i hangā e te Atua, ehara hoki i te mea hei rukenga, ki te mea e tangohia ana i runga i te whakawhetai:
- 5
- E tapu ana hoki, he mea na te kupu a te Atua na te inoi.
- 6
- Ki te whakamahara koe i nga teina ki enei mea, he minita pai koe na Ihu Karaiti, he mea whakatupu ake i runga i nga kupu o te whakapono, o te whakaakoranga pai kua whaia nei e koe.
- 7
- Na, nga korero tito noa, nga mea whakarihariha a te ruruhi, whakarerea, a, te mahi māu, ko nga mea o te ngakau karakia.
- 8
- Te whakamahinga hoki i te tinana, he iti te pai: ko te ngakau karakia ia pai tonu mo nga mea katoa, kei reira hoki nga korero mo te oranga inaianei, mo tera hoki a mua.
- 9
- He pono tenei korero, e pai ana hoki kia tangohia rawatia.
- 10
- Koia hoki matou ka mamahi ai ka tawaia ai, no te mea ka u ta matou whakaaro ki te Atua ora, ko ia nei te Kai whakaora o nga tāngata katoa, tera noa ake ia o te hunga whakapono.
- 11
- Me kauwhau enei mea e koe me whakaako.
- 12
- Kei whakahawea tetahi ki tou taitamarikitanga; engari hei tauira koe ki te hunga whakapono, to kupu, to whakahaere, to aroha, to wairua, to whakapono, to ngakau ma.
- 13
- Kia pumau koe ki te korero pukapuke, ki te whakahau, ki te whakaako, kia tae atu ra ano ahau.
- 14
- Kei waiho kia takoto noa te mea homai noa i roto na i a koe, i homai ra ki a koe he mea poropiti i nga ringaringa ano o nga kaumatua i whakapangia atu ra.
- 15
- Whakaaroa enei mea; anga nui ki enei mea; kia kitea ai tou nekehanga ake i nga mea katoa.
- 16
- Kia mahara ki a koe ano, ki te whakaakoranga hoki: kia u ki enei mea, ki te mea hoki koe i tenei, ka whakaora koe i a koe ano, i te hunga ano hoki e whakarongo ana ki a koe.
Address: 
Phone: 
Email: