- 1
- Kaua e whakatupehupehu ki te kaumatua, engari ata korerotia atu, ano he matua; nga taitamariki hoki, ano he teina;
- 2
- Nga ruruhi, ano he whaea; nga wāhine taitamariki, ano he tuahine, i runga i nga whakaaro ma katoa.
- 3
- Whakahonoretia nga pouaru, ara, nga tino pouaru.
- 4
- Ki te mea ia he tamariki he mokopuna ranei a tetahi pouaru, kia whakaakona ratou i te tuatahi kia whakaaro tika ki to ratou whare ake, kia utua hoki ta nga mātua, he mea pai hoki nei he mea e manakohia ana i te aroaro o te Atua.
- 5
- Na, te tino pouaru te mea mokemoke, e tumanako ana ia ki te Atua, mau tonu ki nga inoi ki nga karakia i te po, te ao.
- 6
- A ki te whai tetahi ki ā te tinana whakaahuareka, ahakoa ora kei te mate.
- 7
- Akona atu enei mea, kei ekengia ratou e te kupu.
- 8
- Na, ki te kore tetahi e whakaaro ki ona ake, ki te hunga rawa ano ia o tona whare, kua whakakahoretia e ia te whakapono, kino atu tana i ta te tangata whakapono kore.
- 9
- Kaua te pouaru e tangohia ki roto, i te mea kahore ano i ono tekau noa ona tau, hei te wahine i tūturu ki te tāne kotahi,
- 10
- Hei te mea e whakaaetia ana āna mahi pai; ki te mea i whakatupu tamariki, ki te mea i atawhai manuhiri, ki te mea i horoi i nga waewae o te hunga tapu, ki te mea i atawhai i te hunga e tukinotia ana, ki te mea i whaia e ia nga mahi pai katoa.
- 11
- Nga pouaru taitamariki ia me whakarere: kia ngau ke hoki to ratou ngakau taikaha i ta te Karaiti, ka hiahia ki te marena;
- 12
- Ka whai hē ratou, no te mea kua whakarerea e ratou to ratou whakapono tuatahi.
- 13
- Ka ako ano hoki ratou ki te noho mangere, ki te haereere noa ki nga whare: a ehara i te mea ko te mangere kau, he mate korerorero ano ia to ratou, he pokanoa ki ta tera ki ta tera, ta ratou e korero ai ko nga mea e kore e tika.
- 14
- Koia ahau ka mea ai kia marena nga pouaru taitamariki, kia whanau tamariki, kia tohutohu i nga mea o te whare, kia kaua e hoatu ki te hoa riri tetahi take tawai.
- 15
- Kua tahuri ke nei hoki etahi ki te whai i a Hatana.
- 16
- Ki te mea he pouaru a tetahi tangata whakapono, a tetahi wahine whakapono ranei, māna ano ratou e atawhai, kaua hoki te hahi e whakataimahatia; ko ana hoki e atawhai ai ko nga tino pouaru.
- 17
- Kia nui ake te honore mo nga kaumatua e tohutohu pai ana; engari rawa ia mo te hunga ko ta ratou nei mahi ko te kupu ko te whakaako.
- 18
- E mea ana hoki te Karaipiture, Kaua e whakamokatia te mangai o te kau patu witi: Me tenei hoki, Ka tika te utu mo te kai mahi.
- 19
- Kaua e whakarongo ki te whakawa no te kaumatua, engari hei te aroaro o nga kai whakaatu tokorua tokotoru ranei.
- 20
- Te hunga hara, riria i te aroaro o te katoa, kia mataku ai era atu hoki.
- 21
- Ko taku kupu nui tenei ki a koe i te aroaro o te Atua, o te Ariki hoki o Ihu Karaiti, o nga anahera whiriwhiri ano hoki, puritia enei mea, kaua e pokaia he tikanga, kaua e whakahipahipaia.
- 22
- Kei whakapakia wawetia nga ringaringa ki tetahi tangata, kaua ano e uru ki nga hara o te tangata ke: kia mau tou hara kore.
- 23
- Kāti tou inu wai, engari hei te waina māu kia iti, hei mea mo tou puku mo ou mate e honohono na.
- 24
- Nga hara o etahi tāngata, mārama noa ake, e tae wawe ana ki te whakawakanga: o etahi ia e whai mai ana i muri i a ratou.
- 25
- Whaihoki ko nga mahi pai e mārama noa ake ana; a, nga mea e rereke ana e kore e taea te huna.
Address: 
Phone: 
Email: