- 1
- Na, kua tae iho te wairua o Ihowa ki runga ki a Atahia tama a Orere.
- 2
- Na, ko tana haerenga atu ki te whakatau i a Aha, ka mea ki a ia, Whakarongo mai ki a au, e Aha ratou ko Hura katoa, ko Peniamine; Kei a koutou a Ihowa i te mea ko koutou kei a ia. Ki te rapua hoki ia e koutou, e kitea ano ia e koutou. Ki te whakarerea ano ia e koutou ka whakarerea ano koutou e ia.
- 3
- Na, ka maha nei nga ra kahore nei te Atua pono i a Iharaira, kahore he tohunga hei whakaako, kahore he ture.
- 4
- Heoi i a ratou i te mate, ka tahuri ratou ki a Ihowa Atua o Iharaira, rapu ana ratou i a ia, a kitea ana ia e ratou.
- 5
- Kahore hoki he maunga rongo i aua wa, e haere atu ai tetahi, e haere mai ai ranei; he nui hoki nga whakararuraru o nga tangata katoa o nga whenua.
- 6
- I tukitukia hoki tetahi iwi e tetahi iwi, tetahi pa e tetahi pa; na te Atua hoki ratou i whakararu ki nga aitua katoa.
- 7
- Ko koutou ia, kia kaha; kaua o koutou ringa e whakangoikore, no te mea ka whai utu ano ta koutou mahi.
- 8
- Te rongonga o Aha i enei kupu, i te poropititanga ano hoki a Orere poropiti, ka maia. Whakakahoretia atu ana e ia nga whakapakoko whakarihariha puta noa i te whenua o Hura raua ko Peniamine, i nga pa ano hoki o Maunga Eperaima i riro mai i a ia. I whakahoutia ano hoki e ia te aata i mua i te whakamahau o Ihowa.
- 9
- Huihuia mai ana ano e ia a Hura katoa raua ko Peniamine, me nga manene e noho ana i a ratou o roto o Eperaima, o Manahe, o Himeona: i papahoro mai hoki enei ki a ia, tona tini, i roto i a Iharaira, i to ratou kitenga kei a ia a Ihowa tona Atua.
- 10
- Na, huihui mai ana ratou ki Hiruharama i te toru o nga marama o te tekau ma rima o nga tau o te kingitanga o Aha.
- 11
- Patua iho e ratou i taua wa ano hei whakahere ma Ihowa etahi o nga mea i riro mai i a ratou i te parekura, e whitu rau nga kau, a, e whitu mano nga hipi.
- 12
- Na, ka uru ratou ki te kawenata kia whakapaua o ratou ngakau o ratou wairua ki te rapu i a Ihowa, i te Atua o o ratou mātua.
- 13
- A, te tangata e kore e rapu i a Ihowa Atua o Iharaira, kia whakamatea, ahakoa iti, ahakoa rahi, ahakoa tama, ahakoa wahine.
- 14
- Nui atu to ratou reo ki te oati ki a Ihowa; hamama ana, tangi ana nga tētere me nga koronete.
- 15
- Na, koa katoa a Hura ki taua oati; i whakapaua hoki o ratou ngakau ki te oati; riro pu ano hoki to ratou hiahia ki te rapu i a ia. A, i kitea ano ia e ratou, a ka meinga e Ihowa kia ta o ratou manawa i tetahi taha, i tetahi taha.
- 16
- Ko Maaka ano hoki ko te whaea o Kingi Aha, whakamutua ake e ia tona kuinitanga, mona i hanga i te whakapakoko ki te ngahere; tapahia iho hoki e Aha tana whakapakoko, tukia ana kia ririki, tahuna ake ki te taha o Awa Kitirono.
- 17
- Otiia kihai i whakakorea nga wahi tiketike i roto i a Iharaira. He ahakoa ra, i tapatahi ano te ngakau o Aha i ona ra katoa.
- 18
- I kawea hoki e ia ki te whare o te Atua nga mea i whakatapua e tona pāpā, me nga mea i whakatapua e ia ano, te hiriwa, te koura, me nga oko.
- 19
- Na, kore ake he whawhai, a tae noa ki te toru tekau ma rima o nga tau o te kingitanga a Aha.
Address: 
Phone: 
Email: