- 1
- Na, ko Iehohapata ko tana tama hei kingi i muri i a ia, a ka tupu tona kaha ki te whawhai ki a Iharaira.
- 2
- I whakanohoia ano e ia he hoia ki nga pa taiepa katoa o Hura; whakanohoia ana ano e ia he hoia tiaki ki te whenua o Hura, ki nga pa ano o Eperaima i tangohia nei e tona pāpā, e Aha.
- 3
- Na, i a Iehohapata ano a Ihowa; no te mea i haere ia i nga ara tuatahi o tona pāpā, o Rawiri, kihai hoki i rapu i ta nga Paara;
- 4
- Heoi rapua ana e ia ta te Atua a tona pāpā, haere ana ia i runga i ana whakahaunga; kihai tana i rite ki te mahi a Iharaira.
- 5
- Mo reira whakatuturutia ana e Ihowa te kingitanga ki tona ringa; a, i homai ano he hakari e Hura katoa ki a Iehohapata; he nui hoki ona taonga, tona kororia.
- 6
- I nui ano hoki tona ngakau i runga i nga ara o Ihowa: i whakakahoretia atu ano hoki e ia nga wahi tiketike, me nga ngahere i roto i a Hura.
- 7
- Na, i te toru o nga tau o tona kingitanga ka tono tangata ia ki ana rangatira, ki a Pene-haira, ki a Oparia, ki a Tekaria, ki a Netaneere, ki a Mikaia, kia whakaako i roto i nga pa o Hura.
- 8
- A, hei hoa mo ratou ko nga Riwaiti, ko Hemaia, ko Netania, ko Teparia, ko Atahere, ko Hemiramoto, ko Honatana, ko Aronia, ko Topia, ko Topoaronia, he Riwaiti ratou; a, hei hoa mo ratou ko Erihama, ko Iehorama, he tohunga enei.
- 9
- Na, kei te whakaako ratou i roto i a Hura: i a ratou ano hoki te pukapuka o te ture a Ihowa; i haereerea ano hoki e ratou nga pa katoa o Hura, a taka noa, whakaako ai i te iwi.
- 10
- A, i runga te wehi o Ihowa i nga kingitanga katoa o nga whenua i tetahi taha o Hura i tetahi taha; a, kihai ratou i whawhai ki a Iehohapata.
- 11
- I mauria mai ano e etahi o nga Pirihitini he hakari ki a Iehohapata, me te hiriwa hei takoha. I kawea mai ano hoki e nga Arapi he hipi ki a ia, e whitu mano, e whitu rau nga hipi toa, me nga koati toa e whitu nga mano e whitu nga rau.
- 12
- Na, ka tino nui haere a Iehohapata. I hangā hoki etahi taumaihi e ia ki Hura, me etahi pa taonga.
- 13
- Na, he nui tana mahi ki nga pa o Hura; a, nga tangata whawhai, nga toa marohirohi, i Hiruharama ratou.
- 14
- Ko to ratou tokomahatanga ano tenei, he mea whakarite ki te whare o o ratou mātua: O Hura, ko nga rangatira mano; ko Arana te rangatira, a, ona hoa, e toru rau mano nga toa marohirohi.
- 15
- Na, i tona taha ko Iehohanana, ko te rangatira; a, ona hoa e rua rau e waru tekau nga mano.
- 16
- A, i to tera taha, ko Amahia tama a Tikiri; he mea hihiko noa mai ia ki a Ihowa; ona hoa e rua rau mano nga toa marohirohi.
- 17
- Na, o Peniamine; ko Eriara, he toa marohirohi ia, a, ona hoa, he hunga hapai i te kopere, i te whakangungu rakau, e rua rau nga mano.
- 18
- Na i tona taha ko Iehotapara; a, ona hoa, kotahi rau e waru tekau nga mano, he hunga rite rawa i te patu mo te whawhai.
- 19
- I mahi enei ki te kingi, ratou ano ko a te kingi i whakanoho ai ki nga pa taiepa puta noa i a Hura.
Address: 
Phone: 
Email: