- 1
- Katahi te iwi katoa o Hura ka mau ki a Utia, kotahi tekau ma ono nei ona tau, a, meinga ana ia e ratou hei kingi i muri i tona pāpā i a Amatia.
- 2
- Na tenei i hanga Eroto, a, whakahokia mai ana ki a Hura, i muri iho i te moenga o te kingi ki ona mātua.
- 3
- Kotahi tekau ma ono nga tau o Utia i tona kingitanga ai; a, e rima tekau ma rua nga tau i kingi ai ia ki Hiruharama. Na, te ingoa o tona whaea, ko Iekoria, no Hiruharama.
- 4
- I tika ano tana mahi ki te titiro a Ihowa, i rite ki nga mea katoa i mea ai tona pāpā a Amatia.
- 5
- I rapua ano e ia ta te Atua i nga ra o Hakaraia; he tangata ano tenei i mohio i nga whakakitenga mai a te Atua. Na, i nga ra i rapua ai e ia ta Ihowa, ka meinga ia e te Atua kia kake.
- 6
- I haere atu ano ia ki te whawhai ki nga Pirihitini, a, wawahia ana e ia te taiepa o Kata, me te taiepa o Iapane, me te taiepa o Aharoro; i hangā ano e ia etahi pa ki nga taha o Aharoro, ki roto ano i nga Pirihitini.
- 7
- A, i awhinatia mai ano ia e te Atua i te whawhai ki nga Pirihitini, ki nga Arapi i noho ki Kuru-paara, ratou ko nga Meunimi.
- 8
- A, homai ana e nga Amoni he hakari ki a Utia; paku ana hoki tona ingoa a tae noa ki Ihipa; he nui whakaharahara hoki tona kaha.
- 9
- I hangā ano e Utia etahi pourewa ki Hiruharama ki te kuwaha i te kokonga, ki te kuwaha i te raorao, ki te koki o te taiepa, he mea hanga hoki nana kia kaha.
- 10
- I hangā ano e ia etahi pourewa ki te koraha, a, keria ana e ia etahi poka wai, he maha: he tini hoki ana kararehe i te raorao, i te mānia, me nga kai mahi whenua, i nga maunga, i Maunga Karamere ano hoki, me nga kai mahi waina: he tangata ahu whenua hoki ia.
- 11
- He ope ano hoki ta Utia, he hunga whawhai, i haere a ropu atu nei ki te whawhai, he mea whakarite tonu ki te tokomahatanga i to ratou tauanga e Teiere kai tuhituhi raua ko te kawana ko Maaheia. Te kai arahi, ko Hanania ko tetahi o nga rangatira a te kingi.
- 12
- Te tokomahatanga katoa o nga upoko o nga mātua o nga toa marohirohi, e rua nga mano e ono nga rau.
- 13
- Na, te ope hei arahi ma ratou, e toru rau nga mano e whitu nga mano e rima nga rau, he hunga i kaha rawa ta ratou whawhai, hei tuara mo te kingi ki te hoa riri.
- 14
- Kua pae noa ake i a Utia he whakangungu rakau mo ratou puta noa i te ope, he tao, he potae, he pukupuku, he kopere, he kotaha hei piu kohatu.
- 15
- I hangā ano e ia etahi mea ki Hiruharama, he mea whakaaro na nga tangata mohio, hei mea mo runga i nga pourewa i nga koki, hei kopere i nga pere, i nga kohatu nui. A, paku ana tona ingoa ki tawhiti; he hanga whakamiharo hoki tona awhinatanga mai, a kaha noa iho ia.
- 16
- Otiia i a ia ka kaha nei, ka whakakake tona ngakau, na, whakangaromia ana ia: i takahia hoki e ia ta Ihowa, ta tona Atua, a, haere ana ki te temepara o Ihowa, ki te tahu whakakakara ki runga ki te aata whakakakara.
- 17
- Na, ka haere atu i muri i a ia a Ataria te tohunga, ratou ko etahi tohunga o Ihowa, e waru tekau, he hunga maia.
- 18
- Na, ka turia atu a Utia te kingi e ratou, a ka mea ratou ki a ia, E kore e tika mau, e Utia, te tahu whakakakara ki a Ihowa; engari ma nga tohunga, ma nga tamariki a Arona, i whakatapua nei hei tahu whakakakara. Haere atu i roto i te wahi tapu; kua he hoki koe; ehara hoki i te mea e whai kororia ai koe i te Atua, i a Ihowa.
- 19
- Te tino riringa a Utia; i tona ringa ano hoki he tahu-kakara hei tahu whakakakara; a, i a ia e riri ana ki nga tohunga, ka puta ake te repera i tona rae i te aroaro o nga tohunga i roto i te whare o Ihowa, i te taha o te aata tahu whakakakara.
- 20
- Te tahuritanga mai o te tino tohunga, o Ataria, ratou ko nga tohunga katoa ki a ia, nana, he repera tera kei tona rae, peia atu ana ia e ratou i reira; ko ia ano hoki i hohoro te haere atu, no te mea kua pakia ia e Ihowa.
- 21
- Na, he repera a Utia te kingi, a taea noatia te ra i mate ai ia, a noho ana i te whare motuhake, he repera hoki ia, he mea momotu atu hoki i roto i te whare o Ihowa, a, ko tana tama ko Iotama hei rangatira mo te whare o te kingi, hei kai whakarite whakawa mo te iwi o te whenua.
- 22
- Na, era atu meatanga a Utia, o mua, o muri, kua oti te tuhituhi e Ihaia poropiti tama a Amoho.
- 23
- Na, kua moe a Utia ki ona mātua, tanumia iho ki ona mātua ki te mara i te tanumanga o nga kingi; i mea hoki ratou, He repera ia; a, ko tana tama ko Iotama hei kingi i muri i a ia.
Address: 
Phone: 
Email: