2nd Chronicles Chapter 27 - Paipera Tapu 1868 | Te Paipera Tapu 1868

2nd Chronicles Chapter 27 - Paipera Tapu 1868

1
E rua tekau ma rima nga tau o Iotama i tona kingitanga ai, a, kotahi tekau ma ono nga tau i kingi ai ia ki Hiruharama. Na, te ingoa o tona whaea ko Ieruha, he tamahine na Haroko.
2
A, he tika tana mahi ki ta Ihowa titiro, i rite ki nga mea katoa i mea ai a Utia tona pāpā. Otiia kihai i tapoko ki roto i te temepara o Ihowa. I mahi ano hoki te iwi i te hē.
3
Nana i hanga to runga kuwaha o te whare o Ihowa; he nui ano hoki te wahi i hangā e ia ki runga ki te taiepa i Opere,
4
I hangā ano hoki e ia etahi pa ki nga maunga o Hura; hangā ana ano e ia etahi taumaihi, etahi pourewa ki nga ngahere.
5
I whawhai ano ia ki te kingi o nga tamariki a Amona, a taea ana ratou e ia. A, homai ana e nga tamariki a Amona ki a ia i taua tau kotahi rau nga taranata hiriwa, tekau mano mehua witi, he parei ano hoki tekau nga mano. Ko nga utu enei i homai e nga tamariki a Amona ki a ia i te rua o nga tau, i te toru ano hoki.
6
Na, ka kaha haere a Iotama, no te mea i whakatikaia e ia ona huarahi i te aroaro o Ihowa, o tona Atua.
7
Na, era atu meatanga a Iotama, me ana whawhai katoa, me ona huarahi, nana, kua oti te tuhituhi ki te pukapuka o nga kingi o Iharaira raua ko Hura.
8
E rua tekau ma rima ona tau i tona kingitanga ai, a, tekau ma ono nga tau i kingi ai ia ki Hiruharama.
9
Na, kua moe a Iotama ki ona mātua, a, tanumia iho ki te pa o Rawiri, a, ko tana tama ko Ahata te kingi i muri i a ia.