2nd Chronicles Chapter 36 - Paipera Tapu 1868 | Te Paipera Tapu 1868

2nd Chronicles Chapter 36 - Paipera Tapu 1868

1
Katahi ka mau te iwi o te whenua ki a Iehoahata tama a Hohia, a, meinga ana ia e ratou hei kingi i muri i tona pāpā ki Hiruharama.
2
E rua tekau ma toru nga tau o Iehoahata i tona kingitanga ai, a, e toru nga marama i kingi ai ia ki Hiruharama.
3
Na, ka whakatakā ia e te kingi o Ihipa i Hiruharama; a, tangohia ana e tera i taua whenua, hei utu he, kotahi rau nga taranata hiriwa me te taranata koura.
4
I meinga ano tona tuakana a Eriakimi e te kingi o Ihipa hei kingi mo Hura, mo Hiruharama: whakawhitia ketia ake tona ingoa ko Iehoiakimi. Na, tangohia atu ana to tenei teina, a Iehoahata, e Neko, kawea atu ana e ia ki Ihipa.
5
E rua tekau ma rima nga tau o Iehoiakimi i tona kingitanga ai, a, kotahi tekau ma tahi nga tau i kingi ai ia ki Hiruharama; he kino ano hoki tana mahi ki te titiro a Ihowa, a tona Atua.
6
Heoi whakaekea mai ana ia e Nepukaneha kingi o Papurona, herea iho ki nga mekameka, he mea kia kawea ia ki Papurona.
7
I tangohia atu ano e Nepukaneha nga oko o te whare o Ihowa ki Papurona, hoatu ana e ia ki roto ki tona temepara i Papurona.
8
Na, era atu meatanga a Iehoiakimi, me ana mea whakarihariha i mea ai, me ana tikanga i kitea, nana, kei te tuhituhi i roto i te pukapuka o nga kingi o Iharaira raua ko Hura: a, ko tana tama ko Iehoiakini hei kingi i muri i a ia.
9
E waru nga tau o Iehoiakini i tona kingitanga ai, e toru nga marama tekau nga ra i kingi ai ia ki Hiruharama. He kino ano hoki tana mahi ki ta Ihowa titiro.
10
Na, i te takanga o te tau, ka tono tangata mai a Kingi Nepukaneha, a, kawea atu ana ia ki Papurona, me nga oko papai ano hoki o te whare o Ihowa; a, meinga ana e ia tona tuakana a Terekia hei kingi mo Hura, mo Hiruharama.
11
E rua tekau ma tahi nga tau o Terekia i tona kingitanga ai, a, kotahi tekau ma tahi nga tau i kingi ai ia ki Hiruharama.
12
A, he kino tana mahi ki te titiro a Ihowa, a tona Atua; kihai hoki ia i whakaiti i a ia i te aroaro o te poropiti o Heremaia e korero mai ana i ta te mangai o Ihowa,
13
I whakakeke ano hoki ia ki a Kingi Nepukaneha, nana nei ia i whakaoati ki te Atua; heoi whakamarokia ana e ia tona kaki, whakapakeketia ana e ia tona ngakau, kihai i tahuri atu ki a Ihowa, ki te Atua o Iharaira.
14
Me nga rangatira ano hoki o nga tohunga, o te iwi, nui noa atu ta ratou kino; i rite tonu ki nga mea whakarihariha katoa o nga tauiwi; whakapokea iho ano hoki e ratou te whare o Ihowa i whakatapua nei e ia ki Hiruharama.
15
A, i ungā mai ano e Ihowa, e te Atua o o ratou mātua ana karere ki a ratou hei whakapuaki i tana kupu; maranga wawe ana ia ki te tono, he tohu hoki nana i tona iwi, i tona nohoanga.
16
Heoi tawaia iho e ratou nga karere a te Atua, whakahaweatia ana āna kupu, tukinotia ana āna poropiti, a ara noa te riri a Ihowa ki tona iwi; a, kahore noa iho he whakaoranga.
17
Na, kawea mai ana e ia te kingi o nga Karari ki a ratou, a, patua iho e ia a ratou taitamariki ki te hoari i roto i te whare o to ratou wahi tapu; kihai i tohungia e ia te taitama, te kotiro, te kaumatua, te koroheke tuara-piko; hoatu katoa ana e ia ki tona ringa.
18
Na, nga oko katoa o te whare o te Atua, nga mea nui, nga mea iti, nga taonga o te whare o Ihowa, me nga taonga o te kingi ratou ko ona rangatira; kawea katoatia ana e ia ki Papurona.
19
Tahuna ake e ratou te whare o te Atua, wahia iho e ratou te taiepa o Hiruharama, tahuna ana e ratou nga whare papai katoa ki te ahi, ngaro rawa i a ratou nga oko katoa e matenuitia ana.
20
Whakahekea atu ana hoki e ia te hunga i toe i te hoari ki Papurona, a, hei pononga ratou mana, ma ana tamariki, a taea noatia te kingitanga o Pahia.
21
Hei whakaritenga mo te kupu a Ihowa i whakapuakina e Heremaia; kia koa ra ano te whenua i ona hapati: he hapati hoki āna i nga ra katoa o te whakangaromanga; kia rite ra ano nga tau e whitu tekau.
22
Na, i te tuatahi o nga tau o Hairuha kingi o Pahia ka whakamanā te kupu a Ihowa i whakapuakina e Heremaia, ka whakaohokia e Ihowa te wairua o Hairuha kingi o Pahia. Na, ka tukua atu e tera tana karanga puta noa i tona kingitanga; he mea tuhituhi ano nana; i mea ia,
23
Ko te kupu tenei a Hairuha kingi o Pahia, Kua oti nga kingitanga katoa o te whenua te homai ki a au e Ihowa, e te Atua o nga rangi; kua whakahaua mai ano hoki ahau e ia kia hangā he whare mona ki Hiruharama, ki tera i Hura. Ko wai tenei o koutou o tona iwi katoa? Ko Ihowa ko tona Atua hei hoa mona, a, mana e haere.