2nd Chronicles Chapter 5 - Paipera Tapu 1868 | Te Paipera Tapu 1868

2nd Chronicles Chapter 5 - Paipera Tapu 1868

1
Na, kua oti katoa te mahi i mahia e Horomona mo te whare o Ihowa. A ka kawea mai e Horomona nga mea i whakatapua e tona pāpā e Rawiri: na, te hiriwa, te koura, nga oko katoa, hoatu ana e ia ki roto ki nga taonga o te whare o te Atua.
2
Katahi ka huihuia mai e Horomona nga kaumatua o Iharaira, ratou ko nga upoko katoa o nga iwi, nga rangatira o nga mātua o nga tamariki a Iharaira, ki Hiruharama ki te mau ake i te aaka o te kawenata o Ihowa i roto i te pa o Rawiri, ara, i Hiona.
3
Na, ka huihuia mai ki te kingi nga tangata katoa o Iharaira i te hakari i te whitu o nga marama.
4
Te haerenga mai o nga kaumatua katoa o Iharaira, na, ka hapainga ake te aaka e nga Riwaiti.
5
Kawea mai ana e ratou te aaka, me te tapenakara o te whakaminenga, me nga oko tapu katoa i roto i te tapenakara; kawea mai ana aua mea e nga tohunga ratou ko nga Riwaiti.
6
Katahi a Kingi Horomona ratou ko te huihui katoa o Iharaira i huihui mai nei ki a ia ki mua i te aaka, ka patu i nga hipi, i nga kau, e kore nei e taea te korero, te tatau ranei, i te tini.
7
A, na nga tohunga i kawe te aaka o te kawenata a Ihowa ki tona wahi, ki te ahurewa o te whare, ki te wahi tino tapu, ki raro i nga parirau o nga kerupima.
8
A, roha tonu nga parirau o nga kerupima ki runga i te wahi i te aaka, a, hipokina iho a runga o te aaka, me ona amo, e nga kerupima.
9
A, i whakapurerotia mai e ratou nga amo, kia kitea mai ai i te aaka nga pito o nga amo i te ritenga atu o te ahurewa; otiia kihai i kitea ki waho; a, kei reira na ano aua mea, a tae noa ki tenei ra.
10
Kahore he mea i roto i te aaka, ko nga papa e rua anake i whaowhina nei ki reira e Mohi i Horepa i to Ihowa whakaritenga kawenata ki nga tamariki a Iharaira i to ratou putanga mai i Ihipa.
11
A, te putanga mai o nga tohunga i roto i te wahi tapu, (i whakatapua hoki nga tohunga katoa i kitea ki reira; kihai hoki nga tikanga mo nga wehenga i mau i taua ra.
12
Na, nga Riwaiti, nga kai waiata, era katoa i a Ahapa, i a Hemana, i a Ierutunu, me a ratou tamariki, me o ratou teina, he rinena ma o ratou kakahu; he himipora ano hoki ā ratou, he hatere, he hāpa; tu ana ratou ki te taha ki te rawhiti o te aata, ratou ko nga tohunga kotahi rau e rua tekau e whakatangi ana i nga tētere.)
13
Na, me te mea kotahi tonu nga kai whakatangi tētere, nga kai waiata, ki te mea i te reo kotahi kia rangona, ara, te whakamoemiti, te whakawhetai ki a Ihowa; a ka whakarahia to ratou reo, me to nga tētere, me to nga himipora, me to nga mea rangi waiata, ka whakamoemiti ki a Ihowa, (no te mea e pai ana ia e mau tonu ana hoki tana mahi tohu, ake ake ake:) na, kua ki te whare i te kapua, ara, te whare o Ihowa;
14
A kihai i ahei i nga tohunga te tu ki te minita, i te kapua hoki; i ki hoki te whare o te Atua i te kororia o Ihowa.