2nd Chronicles Chapter 7 - Paipera Tapu 1868 | Te Paipera Tapu 1868

2nd Chronicles Chapter 7 - Paipera Tapu 1868

1
A, te mutunga o ta Horomona inoi, ka heke iho te ahi i te rangi; pau ake te tahunga tinana, me nga patunga tapu; a, ki tonu te whare i te kororia o Ihowa.
2
A, kihai i ahei i nga tohunga te haere mai ki te whare o Ihowa; ki tonu hoki te whare o Ihowa i te kororia o Ihowa.
3
A, te kitenga o nga tamariki katoa a Iharaira i te heketanga iho o te ahi, i te kororia ano hoki o Ihowa i runga i te whare, na, kua piko iho o ratou kanohi ki te whenua ki runga ki nga papa, a koropiko ana ratou, whakamoemiti ana ki a Ihowa, no te mea e pai ana ia, a, e mau tonu ana tana mahi tohu.
4
Na, kei te patu te kingi ratou ko te iwi katoa i nga patunga tapu ki te aroaro o Ihowa.
5
Te patunga tapu i patua e Kingi Horomona, e rua tekau ma rua mano nga kau, kotahi rau e rua tekau mano nga hipi. Na, kua taia te kawa o te whare o te Atua e te kingi ratou ko te iwi katoa.
6
Tu ana tera nga tohunga ki ā ratou mahi, ratou ko nga Riwaiti e mau ana i nga mea rangi waiata a Ihowa i hangā nei e Kingi Rawiri hei whakawhetai ki a Ihowa, (no te mea e mau tonu ana tana mahi tohu,) i nga wa e meinga ai ratou e Rawiri hei kai whakamoemiti mana. Na, whakatangi ana nga tohunga i nga tētere ki to ratou aroaro, me te tu ano a Iharaira katoa.
7
I whakatapua ano hoki e Horomona a waenganui o te marae i mua i te whare o Ihowa; i tukua hoki e ia ki reira nga tahunga tinana, me te ngako o nga whakamarietanga: he iti hoki no te aata parahi i hangā e Horomona hei meatanga mo nga tahunga tinana, mo nga whakahere toto-kore, mo nga ngako.
8
I whakaritea ano hoki te hakari i taua wa e Horomona ratou ko Iharaira katoa, e whitu nga ra, nui atu te huihui, no te haerenga atu ki Hamata tae noa ki te awa o Ihipa.
9
Na, i te waru o nga ra he huihuinga nui na ratou: e whitu hoki nga ra i taia ai e ratou te kawa o te aata, a, e whitu nga ra o te hakari.
10
I te rua tekau ma toru o nga ra o te whitu o nga marama ka ungā atu e ia te iwi ki o ratou teneti, koa tonu ratou, pai tonu nga ngakau i te pai i meinga e Ihowa ki a Rawiri, ki a Horomona, ki tona iwi ano hoki ki a Iharaira.
11
Na, kua oti i a Horomona te whare o Ihowa, me te whare o te kingi, na, nga mea katoa i puta mai ki te ngakau o Horomona kia mahia i roto i te whare o Ihowa, ki tona whare ake ano hoki, oti pai ana i a ia.
12
Na, ka puta mai a Ihowa ki a Horomona i te po, a ka mea ki a ia, Kua rongo ahau i to inoi, kua whiriwhiria ano e ahau tenei wahi maku, hei whare patunga tapu.
13
Ki te tutakina e ahau te rangi, a kahore he ua, ki te whakahaua ranei e ahau nga mawhitiwhiti kia kai i te whenua, ki te ungā ranei e ahau tetahi mate uruta ki roto ki toku iwi;
14
Heoi ki te whakaiti toku iwi i a ratou, (he mea karanga nei hoki ratou ki toku ingoa,) ki te inoi mai, a ka rapu i toku mata, ka tahuri mai i o ratou ara he; katahi ahau ka whakarongo mai i te rangi, ka muru i to ratou hara, ka whakaora i te mate o to ratou whenua.
15
Ko tenei ka titiro mai oku kanohi, ka tahuri mai ano oku taringa ki nga mea e inoia ana ki tenei wahi.
16
He mea whiriwhiri nei hoki, he mea whakatapu naku inaianei tenei whare, hei waihotanga iho mo toku ingoa, a, ake ake ake; ko reira ano hoki oku kanohi, me toku ngakau, i nga ra katoa.
17
Na, ko koe, ki te rite tou haere ki toku aroaro ki te haere o to pāpā o Rawiri, ki te mahia nga mea katoa i whakahaua atu nei e ahau ki a koe, ki te puritia e koe aku tikanga me aku whakaritenga,
18
Katahi ahau ka whakapumau i te torona o tou kingitanga, ka pera ano me taku kawenata ki to pāpā ki a Rawiri, i a au ra i mea, E kore e whakakorea he tangata mau hei kawana mo Iharaira.
19
Tena ko tenei ka tahuri atu koutou, a ka whakarere i aku tikanga, me aku whakahaunga ka hoatu nei e ahau ki to koutou aroaro, a ka haere koutou, ka mahi ki nga atua ke, ka koropiko hoki ki a ratou;
20
Katahi o ratou pakiaka ka unuhia ake e ahau i toku oneone i hoatu nei e ahau ki a ratou, a, tenei whare i whakatapua nei e ahau mo toku ingoa, ka akiritia atu e ahau i toku aroaro, a ka meinga hei whakatauki, hei taunutanga i roto i nga iwi katoa.
21
Na, tenei whare e tiketike nei, ka ai hei miharotanga ma nga tangata katoa e haere ana i tona taha; a ka mea ratou, Na te aha tenei mea i meatia ai e Ihowa ki tenei whenua, ki tenei whare?
22
Na, ka korerotia mai, Mo ratou i whakarere i a Ihowa i te Atua o o ratou mātua i whakaputa mai nei i a ratou i te whenua o Ihipa, mo ratou i tango ki nga atua ke, a koropiko ana ki a ratou, mahi ana ki a ratou: no reira i kawea mai ai e ia tenei he katoa ki a ratou.