- 1
- Na, naku ake na Paora tenei tohe ki a koutou, whakaaroa te tikanga māhaki te ngakau ngawari o te Karaiti, he mea iti nei hoki ahau i ahau i kona i roto i a koutou, i tawhiti ia e maia ana ki a koutou:
- 2
- Na, ko taku tenei e tohe nei, kia kaua au e maia ina tae atu, kei māro kei pera me taku e mea nei kia maia ki etahi, e mea nei ki a matou no te kikokiko ta matou whakahaere.
- 3
- No te mea ahakoa haereere matou i roto i te kikokiko, ehara i te mea no te kikokiko ta matou whawhai:
- 4
- (Ehara hoki nga mea whawhai o ta matou pakanga i te mea no te kikokiko, heoi e kaha ana i roto i te Atua hei whakahoro i nga pa kaha:)
- 5
- Horo ana i a matou nga whakaaroaronga, me nga mea ikeike katoa e whakakake ana ki te matauranga ki te Atua, a riro pārau mai ana i a matou nga whakaaro katoa, ka meinga kia ngohengohe ki a te Karaiti;
- 6
- Kua rite noa ake ano hoki i a matou te whakapakanga riri mo nga mahi tutū katoa, ina tino ngohengohe rawa koutou.
- 7
- Ko te ahua o waho ta koutou e titiro ai? Ki te u te whakaaro a tetahi no te Karaiti ia, māna ake ano e mahara ki tenei mea ano hoki, no te Karaiti ia, me matou ano hoki no te Karaiti.
- 8
- Ahakoa hira ake taku whakamanamana ki nga tikanga i a matou, kua homai nei ki a matou e te Ariki hei hanga i te whare, ehara i te mea hei wahi i a koutou, e kore ahau e whakama:
- 9
- Kei kiia mai au e whakawehi ana i a koutou ki nga pukapuka.
- 10
- Ko ana pukapuka hoki, e ai ki ta ratou, e nunui ana e kaha ana; ko tona tinana ia i a ia i konei e ngoikore ana, ko tana korero he korekore noa iho.
- 11
- Kia mahara taua tu tangata ki tenei, na, te tikanga a matou e ngaro mai nei, ara, o a matou kupu pukapuka, ka pera tonu hoki te mahi ina tae atu.
- 12
- E kore hoki matou e maia ki te whakauru atu, ki te whakariterite ranei i a matou ki etahi e whakapai ana ki a ratou ano: na, i a ratou e mehua nei i a ratou ki a ratou ano, a e whakariterite nei i a ratou ki a ratou ano, kahore o ratou matauranga.
- 13
- Ta matou whakamanamana ia e kore e neke ake i te mehua, engari ka rite ki te mehua o te rūri i wehea mai ma matou e te Atua, he mehua e tae atu ai ki a koutou.
- 14
- Kahore hoki a matou totoro pokanoa atu, e kiia ai kahore he taenga atu ma matou ki a koutou: kua tae noa atu hoki matou ki a koutou kauwhau ai i te rongo pai o te Karaiti:
- 15
- E kore hoki matou e neke ake i te mehua, e whakamanamana ki nga mahi a era atu; engari e u ana ta matou whakaaro, ka tupu to koutou whakapono, ka ai koutou hei whakanui i a matou, e tino rite rawa ai ki ta matou rūri;
- 16
- Kia kauwhautia te rongo pai ki nga wahi i ko atu i a koutou, kia kaua e whakamanamana i runga i ta te tangata ke rūri ki nga mea kua rite noa ake.
- 17
- Ki te whakamanamana ia tetahi, me whakamanamana ki te Ariki.
- 18
- He teka hoki ko te tangata e whakapai ana ki a ia ano ko ia e tikangatia, engari ko ta te Ariki e whakapai ai.
Address: 
Phone: 
Email: