2nd Corinthians Chapter 12 - Paipera Tapu 1868 | Te Paipera Tapu 1868

2nd Corinthians Chapter 12 - Paipera Tapu 1868

1
Ehara hoki i te mea pai kia whakamanamana ahau. Na, me neke atu ahau ki nga putanga mai, ki nga whakakitenga mai a te Ariki.
2
E mātau ana ahau ki tetahi tangata i roto i a te Karaiti, ka tekau ma wha enei tau, (i roto ranei i te tinana, kahore ahau e mātau; i waho ranei o te tinana, kahore ahau e mātau: ko te Atua te mātau ana;) kahakina atu ana taua tangata taea noatia te tuatoru o nga rangi.
3
Heoi mātau tonu ahau ki taua tangata, (i roto i te tinana ranei, i waho ranei o te tinana, kahore ahau e mātau: ko te Atua te mātau ana;)
4
Kahakina ana ia ki pararaiha, a rongo ana i nga mea e kore e taea te korero, e kore ano e tika kia korerotia e te tangata.
5
Ka whakamanamana ahau ki taua tangata: otiia e kore ahau e whakamanamana ki a au ake, engari ki oku ngoi-koretanga.
6
Na, ahakoa mea noa ahau kia whakamanamana, kahore oku wairangi; he korero pono hoki taku: heoi me whakamutu, kei nui atu ta tetahi e whakaaro ai ki ahau, i tana e kite nei i a au, i tana ranei e rongo ai moku.
7
Na, kua homai ki a au he koikoi i te kikokiko, kei kake rawa ake ahau i te nui rawa o nga whakakitenga mai, he anahera na Hatana hei kuru i a au, kei kake rawa ahau.
8
E toru aku inoinga ki te Ariki mo tenei, kia neke atu i a au.
9
A ka mea mai ia ki a au, E ranea ana taku atawhai hei mea mau: mana tonu hoki toku kaha i runga i te ngoi-kore. Na, engari te whakamanamana ki oku ngoikoretanga pai tonu ki a au, kia ai te kaha o te Karaiti hei taupoki moku.
10
Mo reira ahuareka tonu atu ahau ki nga ngoikoretanga, ki nga whakatupukinotanga, ki nga aitua, ki nga whakatoinga, ki nga rarunga, mo te Karaiti; i a au hoki e ngoikore ana, ko reira ahau kaha ai.
11
Kua wairangi nei ahau i a au e whakamanamana nei; he kaha no ta koutou ki a au: i tika hoki kia whakapaingia ahau e koutou: kahore hoki au i hoki iho i nga tino apotoro i te aha i te aha, ahakoa he kahore noa iho ahau nei.
12
Kua mahia na hoki i roto i a koutou nga tohu o te apotoro, pau rawa ano hoki te manawanui, i runga i nga tohu, i nga mea whakamiharo, i nga merekara.
13
He aha koia te mea i iti iho ai koutou i era atu hahi, ko tenei anake, ko toku korenga e taimaha ki a koutou? whakarerea noatia iho tenei hē oku.
14
Na, ko te toru tenei o nga wa ka takatu nei au ki te haere atu ki a koutou; e kore ano hoki koutou e pehia e ahau ki tetahi mea maku: ehara hoki i te mea ko ta koutou taku e rapu nei, engari ko koutou: ehara hoki i te tikanga ko nga tamariki kia kohi taonga ma nga mātua, engari ko nga mātua ma nga tamariki.
15
Heoi pai tonu ahau ki te whakapau i aku mea, kia whakapaua ano hoki ahau i nga meatanga ki o koutou wairua; otiia i toku aroha ka hira rawa nei ki a koutou, e hoki iho ana te aroha ki a au.
16
Ae ra, kihai au i taimaha ki a koutou: heoi, ki ta ratou, he tangata hangareka ahau, a hopukina ana koutou e ahau he mea tinihanga.
17
I meinga ranei e au tetahi o te hunga i tonoa atu e ahau ki a koutou hei whakapati i o koutou taonga maku?
18
I whakahaua atu e ahau a Taituha, i tonoa ano hoki tetahi teina hei hoa mona. I whakapati ranei a Taituha i ā koutou taonga māna? he teka ianei i runga i te wairua kotahi ta maua haere? he teka ianei ko aua tapuwae ra ano?
19
Tenei ano tetahi, ki ta koutou, he whakatikatika i a matou ta matou ki a koutou? kei te aroaro o te Atua matou i roto i a te Karaiti e korero ana: ko enei mea katoa, e oku hoa aroha, hei pai mo koutou, hei hanga mo te whare.
20
E wehi ana hoki ahau, kei rokohanga atu koutou e ahau, ina tae atu, kahore e rite ki taku e pai nei, a kei kitea ahau e koutou, kahore e rite ki ta koutou e pai ai: kei rokohanga atu he whawhai, he hae, he riri, he totohe, he ngautuara, he kowhetewhete, he whakaputa, he tutū:
21
Kei whakaititia ano pea ahau e taku Atua i roto i a koutou, ina tae atu ano ahau, a he tokomaha e tangihia e ahau o te hunga i hara i mua, a kahore ano i ripeneta mo te poke, mo te puremu, mo te hiahia taikaha, i mahia nei e ratou.