2nd Kings Chapter 11 - Paipera Tapu 1868 | Te Paipera Tapu 1868

2nd Kings Chapter 11 - Paipera Tapu 1868

1
Na, te kitenga a Ataria whaea o Ahatia kua mate tana tamaiti, na, whakatika ana ia, whakamotitia iho nga uri kingi katoa e ia.
2
Heoi i mau a Iehohepa tamahine a kingi Iorama tuahine a Ahatia ki a Ioaha tama a Ahatia; kahakina atu ana e ia i roto i nga tama a te kingi i whakamatea ra; hunā ana ia, raua ko tona kai hiki, i roto i te whare moenga, kei kitea e Ataria, a kihai tera i mate.
3
Na, i taua wahine ia i roto i te whare o Ihowa e piri ana, e ono nga tau, ko Ataria te kuini o te whenua.
4
Na, i te whitu o nga tau ka unga tangata a Iehoiara ki te tiki i nga rangatira mu, i nga tangata a te kingi, me nga kai tiaki kingi. A ka kawea mai ratou ki a ia ki roto ki te whare o Ihowa. Na, ka whakarite kawenata ia ki a ratou, ka whakaoati ano hoki i a ratou i roto i te whare o Ihowa, a, whakakitea mai ana e ia te tamaiti a te kingi ki a ratou.
5
Na, ka whakahau ia i a ratou, ka mea, Ko tenei to koutou mea e mea ai, Ko te toru o nga wehenga o koutou, o te hunga e haere mai ki roto i te hapati, hei tiaki mo te whare o te kingi.
6
Na, tetahi o nga wehenga e toru hei te kuwaha o Huru, a, te tuatoru hei te kuwaha i muri i nga kai tiaki kingi. Na, me tiaki e koutou te whare, kei wahia mai.
7
Kia rua ano hoki nga matua o koutou, o te hunga katoa e haere atu ana ki waho i te hapati, hei tiaki i te whare o Ihowa i waho ake o te kingi.
8
Na, ka karapotia e koutou te kingi i tetahi taha, i tetahi taha; hei tona ringa ano hoki te patu a tenei, a tenei; a, ki te haere tetahi ki roto i nga rarangi, me whakamate. Hei te taha ano hoki koutou o te kingi i tona haerenga atu, i tona haerenga mai.
9
Na, ka meatia e nga rangatira rau nga mea katoa i whakahaua e Iehoiara tohunga, a ka mau ratou ki ana tangata, ki ana tangata, ki nga mea e haere ana ki roto i te hapati, ki te hunga ano hoki e haere ana ki waho i te hapati, a, haere mai ana ki a Iehoiara tohunga.
10
A, i homai ano e te tohunga ki nga rangatira rau nga tao me nga whakapuru tao a Kingi Rawiri; i roto hoki aua mea i te whare o Ihowa.
11
Na, tu ana nga kai tiaki kingi, me a ratou patu i te ringa o tenei, o tenei, i te koki ki matau o te whare, tae noa ki te koki ki maui o te whare i nga taha o te aata, o te whare; karapoti tonu i te kingi.
12
Katahi ka kawea mai e ia te tama a te kingi, potaea iho e ia te karauna; homai ana e ia te whakaaturanga ki a ia. Na, whakakingitia ana ia e ratou, whakawahia ana. Na, kei te papaki i o ratou ringa, me te karanga ano, Kia ora te kingi.
13
A, te rongonga o Ataria i te reo o nga kai tiaki ratou ko te iwi, na, ka haere mai ia ki te iwi ki te whare o Ihowa.
14
Heoi tana tirohanga mai, na, ko te kingi e tu ana i te taha o te pou, ko te tikanga hoki ia, me nga rangatira, ratou ko nga kai whakatangi tētere i te taha o te kingi, me te iwi katoa ano hoki o te whenua e koa ana, e whakatangi ana i nga tētere, na, kei te haehae a Ataria i ona kakahu, ka karanga ake, He hē! he hē, te whakatakotoria nei!
15
Na, ka whakahau atu a Iehoiara tohunga ki nga rangatira rau, ratou ko nga kai tohutohu i te ope; i mea ia ki a ratou, Kawea atu ki waho i nga rarangi, a, te tangata e haere ana i muri i a ia me patu ki te hoari: i ki hoki te tohunga kia kaua ia e whakamatea i roto i te whare o Ihowa.
16
Na, ka pa o ratou ringa ki a ia, a, haere ana ia i te huarahi e haere ai nga hoiho ki te whare o te kingi; a whakamatea iho ki reira.
17
Katahi ka whakaritea e Iehoiara he kawenata, he mea na Ihowa, ki te kingi, ratou ko te iwi, kia meinga ratou hei iwi mo Ihowa, he mea hoki na te kingi ki te iwi.
18
Na, haere ana te iwi katoa o taua whenua ki te whare o Paara, wahia iho e ratou; ana aata, ona ahua, mongamonga noa i a ratou; patua iho hoki e ratou a Matana tohunga o Paara ki te ritenga atu o nga aata. I whakarite kai tirotiro ano hoki te tohunga mo te whare o Ihowa.
19
I tikina ano hoki e ia nga rangatira rau, ratou ko nga tangata o te kingi, ko nga kai tiaki kingi, me te iwi katoa o te whenua. Na, kawea ana e ratou te kingi ki raro i te whare o Ihowa, a, haere mai ana na te huarahi ki te kuwaha o nga kai tiaki ki te whare o te kingi. Na, noho ana ia i runga i te torona o nga kingi,
20
Na, koa tonu te iwi katoa o te whenua, a, marire noa iho te pa; ko Ataria hoki i whakamatea e ratou ki te hoari ki te taha o te whare kingi.
21
E whitu nga tau o Iehoaha i a ia ka kingi nei.