2nd Kings Chapter 13 - Paipera Tapu 1868 | Te Paipera Tapu 1868

2nd Kings Chapter 13 - Paipera Tapu 1868

1
No te rua tekau ma toru o nga tau o Ioaha tama a Ahatia kingi o Hura i kingi ai a Iehoahata tama a Iehu ki a Iharaira ki Hamaria, tekau ma whitu nga tau.
2
A, he kino tana mahi ki te titiro a Ihowa; i whai hoki ia i nga hara o Ieropoama tama a Nepata i mea nei i a Iharaira kia hara. Kihai ena i mahue i a ia.
3
Na, ka mura te riri a Ihowa ki a Iharaira, a, hoatu ana ratou e ia ki te ringa o Hataere kingi o Hiria, ki te ringa ano hoki o Pene-harara tama a Hataere i o raua ra katoa.
4
Na, ka inoi a Iehoahata ki a Ihowa, a ka whakarongo mai a Ihowa ki a ia: i kite hoki ia i te tukinotanga o Iharaira; i tukinotia hoki ratou e te kingi o Hiria.
5
(Na, homai ana e Ihowa he kai whakaora ki a Iharaira, a ka puta ake ratou i raro i te ringa o nga Hiriani. Na, noho ana nga tamariki a Iharaira ki o ratou teneti, pera ana ratou me mua.
6
Otiia kihai i mahue i a ratou nga hara o te whare o Ieropoama i mea nei i a Iharaira kia hara, heoi haere ana ratou i reira; tu tonu ano hoki te ngahere i Hamaria.)
7
Heoi ano hoki o te iwi i mahue i a ia ki a Iehoahata, e rima tekau nga kai eke hoiho, tekau nga hariata, kotahi tekau mano o nga hoia haere i raro; i hunā hoki ratou e te kingi o Hiria, a, meinga ana kia rite ki te puehu i te patunga witi.
8
Na, era atu meatanga a Iehoahata, me ana mahi katoa, me ana mahi toa, kihai ianei ena i tuhituhia ki te pukapuka o nga meatanga o nga ra o nga kingi o Iharaira?
9
Na, kua moe a Iehoahata ki ona mātua, a, tanumia iho e ratou ki Hamaria, a, ko tana tama ko Ioaha hei kingi i muri i a ia.
10
No te toru tekau ma whitu o nga tau o Ioaha kingi o Hura i kingi ai a Iehoaha tama a Iehoahata ki a Iharaira ki Hamaria, tekau ma ono nga tau.
11
A, he kino tana mahi ki te titiro a Ihowa. Kihai i mahue i a ia tetahi o nga hara o Ieropoama tama a Nepata i mea nei i a Iharaira kia hara. Haere ana ano ia i reira.
12
Na, era atu meatanga a Ioaha, me ana mahi katoa, me ana mahi toa i tana whawhaitanga ki a Amatia kingi o Hura, kihai ianei era i tuhituhia ki te pukapuka o nga meatanga o nga ra o nga kingi o Iharaira?
13
Na, kua moe a Ioaha ki ona mātua, a, noho ana a Ieropoama i runga i tona torona: i tanumia ano a Ioaha ki Hamaria ki nga kingi o Iharaira.
14
Na, i te mate a Eriha, tona matenga e mate rawa ai ia, a, haere mai ana a Ioaha kingi o Iharaira ki raro ki a ia, tangi ana i runga i tona mata, ka mea, E toku pāpā, e toku pāpā, e te hariata o Iharaira, e ona kai eke hoiho.
15
Na, ko te meatanga mai a Eriha ki a ia, E mau ki te kopere, ki nga pere. Na, kua mau ia ki te kopere ki nga pere.
16
Na, ko tana meatanga atu ki te kingi o Iharaira, Kia pupuri tou ringa i te kopere. Na, kua puritia e tona ringa, me te whakapa ano a Eriha i ona ringa ki nga ringa o te kingi.
17
Katahi tera ka ki mai, Wahia te matapihi whaka-te-rawhiti. Na, wahia ana e ia. Katahi a Eriha ka ki mai, Koperea. Na, koperea ana e ia; me te ki mai ano tera, Te pere o ta Ihowa whakaoranga, te pere hoki e ora ai i a Hiria; ka patua ano hoki e koe nga Hiriani ki Apeke, a poto noa.
18
I mea ano ia, E mau ki nga pere. Na, kua riro mai i a ia. Katahi tera ka mea ki te kingi o Iharaira, Patua ki te whenua. Na, patua ana e ia, e toru nga patunga, a tu ana.
19
Te tino riringa a te tangata a te Atua ki a ia, ka mea, Me i rima, me i ono au patunga, kua patua a Hiria e koe, a poto noa; ko tenei e toru nga wa e patu ai koe i a Hiria.
20
Na, kua mate a Eriha, a, tanumia iho e ratou. A, i te aranga o te tau ka haere mai nga taua a nga Moapi ki te whenua.
21
Heoi i te tanu tupapaku etahi tangata, na, to ratou kitenga i te taua, makā ana e ratou taua tangata ki to Eriha rua. Te tatutanga iho o taua tangata, te pānga atu ki nga wheua o Eriha, kua ora, tu ana ona waewae ki runga.
22
A, i tukinotia ano a Iharaira e Hataere kingi o Hiria i nga ra katoa o Iehoahata.
23
Heoi i atawhai mai a Ihowa ki a ratou, i aroha ki a ratou, i tahuri mai ano ki a ratou; he whakaaro hoki ki tana kawenata ki a Aperahama, ki a Ihaka, ki a Hakopa, kihai hoki ia i pai kia hunā ratou, kiano hoki ratou i makā noatia atu e ia i tona aroaro,
24
Na, ka mate a Hataere kingi o Hiria, a, ko Pene-harara ko tana tama hei kingi i muri i a ia.
25
Na, ka tangohia mai ano e Iehoaha tama a Iehoahata i roto i te ringa o Pene-harara tama a Hataere nga pa i tangohia atu i te ringa o Iehoahata o tona pāpā i te whawhaitanga. E toru nga patunga a Ioaha, a, whakahokia mai ana e ia nga pa o Iharaira.