2nd Kings Chapter 18 - Paipera Tapu 1868 | Te Paipera Tapu 1868

2nd Kings Chapter 18 - Paipera Tapu 1868

1
Na, no te toru o nga tau o Hohea tāma a Eraha kingi o Iharaira i kingi ai a Hetekia tama a Ahata kingi o Hura.
2
E rua tekau ma rima ona tau i tona kingitanga ai, a, e rua tekau ma iwa nga tau i kingi ai ia ki Hiruharama; na, te ingoa o tona whaea ko Api, he tamahine na Hakaraia.
3
Na, he tika tana mahi ki te titiro a Ihowa: i rite ki nga mea katoa i mea ai a Rawiri tona tupuna.
4
Whakakahoretia ana e ia nga wahi tiketike, wahia ana nga whakapakoko, tuaina ana e ia te ngahere; mongamonga noa i a ia te nakahi parahi i hangā nei e Mohi: he tahu hoki na nga tamariki a Iharaira i te whakakakara ki taua mea, a taea noatia aua ra; huaina iho hoki e ia, ko Nehuhatana.
5
Ko Ihowa Atua o Iharaira tana i whakawhirinaki atu ai, kahore ano hoki he rite mona o nga kingi katoa o Hura i muri i a ia, o era hoki i mua i a ia.
6
Heoi piri tonu ia ki a Ihowa; kihai hoki i mahue te whai i a ia, puritia ana e ia ana whakahaunga i whakahau ai a Ihowa ki a Mohi.
7
Na, i a ia a Ihowa, a, oti pai ana tana i nga wahi katoa i haere atu ai ia. Na, ka whakakeke atu ia ki te kingi o Ahiria, a, kihai i mahi ki a ia.
8
Patua ana e ia nga Pirihitini, a tae noa ki Kaha, ki o reira rohe ano hoki, i te taumaihi o nga kai tutei, i te pa whai taiepa ano hoki.
9
Na, i te wha o nga tau o Kingi Hetekia, ara, i te whitu o nga tau o Hohea tama a Eraha kingi o Iharaira ka whakaekea mai Hamaria e Haramanehere kingi o Ahiria, a whakapaea ana e ia.
10
A horo ana a reira i a ratou i te mutunga o te toru o nga tau; no te ono o nga tau o Hetekia, ara, no te iwa o nga tau o Hohea kingi o Iharaira i horo ai Hamaria.
11
Na, whakahekea atu ana a Iharaira e te kingi o Ahiria ki Ahiria, whakanohoia ana e ia ki Hara, ki Haporo, ki te taha o Awa Kotana ki nga pa ano hoki o nga Meri.
12
Mo ratou kihai i whakarongo ki te reo o Ihowa o to ratou Atua, na, takahia ana e ratou tana kawenata me nga mea katoa i whakahaua mai e Mohi, e ta Ihowa pononga; kihai i whakarangona, kihai i mahia.
13
Na, no te tekau ma wha o nga tau o Kingi Hetekia ka whakaekea mai nga pa taiepa katoa o Hura e Henakeripi kingi o Ahiria, a horo ana i a ia.
14
Katahi a Hetekia kingi o Hura ka unga tangata ki te kingi o Ahiria ki Rakihi, ka mea atu, Kua hara ahau, hoki atu i a au. Me pikau e ahau tau pikaunga e whakapikaua mai e koe ki a au. Katahi te kingi o Ahiria ka whakarite mai ki a Hetekia kingi o Hura kia toru rau nga taranata hiriwa, a, kia toru tekau nga taranata koura.
15
Na, homai ana e Hetekia te hiriwa katoa i kitea ki te whare o Ihowa, i roto ano hoki i nga taonga o te whare o te kingi.
16
I taua wa ka tapahia mai e Hetekia te koura o nga tatau o te temepara o Ihowa, o nga pou ano hoki i whakakikoruatia nei e Hetekia kingi o Hura, a, hoatu ana e ia ki te kingi o Ahiria.
17
Na, ka ungā mai e te kingi o Ahiria a Taratana, ratou ko Rapaharihi ko Rapahake i Rakihi ki a Kingi Hetekia, ki Hiruharama, he nui ano hoki te ope. Heoi haere mai ana ratou; kua tae ki Hiruharama. Haere mai ana ratou, ka tae, tu ana ki te awakeri o to runga puna wai, ki tera i te huarahi o te mara o nga kai horoi kakahu.
18
Na, ta ratou karangatanga ki te kingi ka puta ki a ratou a Eriakimi tama a Hirikia, te rangatira o te whare, ratou ko Hepena kai tuhituhi, ko Ioaha tama a Ahapa ko te kai whakamahara.
19
Na, ko te meatanga a Rapahake ki a ratou, Tena, mea atu ki a Hetekia, Ko te kupu tenei a te kingi nui, a te kingi o Ahiria, He aha tenei whakawhirinakitanga e whakawhirinaki atu nei koe?
20
E mea na koe, (otiia he mea ngutu kau,) he ngarahu tika, he kaha toku mo te whawhai. Na, ko wai to whakawhirinakitanga, i whakakeke ai koe ki a au?
21
Na, e whakawhirinaki atu na koe ki tena kakaho whati hei tokotoko, ki Ihipa; ki te pehia iho e te tangata, ka ngoto ki roto ki tona ringa, na, kua tu. Ka pera ano a Parao kingi o Ihipa ki te hunga katoa e okioki atu ana ki a ia.
22
Na, ki te mea koutou ki a au, Ko Ihowa ko to matou atua ta matou e whakawhirinaki atu nei, he teka ianei nana nga wahi tiketike, me nga aata i whakakahoretia atu nei e Hetekia, a, mea ana ia ki a Hura raua ko Hiruharama, Hei mua i tenei aata koutou koropiko ai ki Hiruharama?
23
Na, homai aianei nga utu pupuri ki toku ariki ki te kingi o Ahiria, a ka hoatu e ahau etahi hoiho ki a koe, kia rua nga mano, ki te taea e koe te whakanoho kai eke ki runga i a ratou.
24
A me pehea e hoki ai i a koe te kanohi o tetahi rangatira, o tetahi o nga iti rawa o nga pononga a toku ariki; i a koe ka whakawhirinaki ki Ihipa ki te hariata, ki nga kai eke hoiho mau.
25
I ngaro ranei a Ihowa i toku haerenga mai ki te huna i tenei wahi? I mea mai a Ihowa ki a au, Haere atu ki tera whenua huna ai.
26
Na, ko te meatanga atu a Eriakimi tama a Hirikia, ratou ko Hepena, ko Ioaha, ki a Rapahake, Tena, korero Hiriani mai ki o pononga; e mohiotia ana hoki tena reo e matou; kaua hoki e korero reo Hurai mai ki a matou, i te mea e whakarongo ana te iwi nei i runga i te taiepa.
27
Ano ra ko Rapahake ki a ratou, I ungā mai ranei ahau e toku ariki ki tou ariki, ki a koe ranei, hei korero i enei kupu; he teka ianei ki nga tangata e noho ana i runga i te taiepa, kia kainga e ratou to ratou paru, kia inumia ia ano hoki to ratou pi, ara, e koutou tahi?
28
Na, tu ana a Rapahake, a, nui atu tona reo ki te karanga i te reo Hurai; ka korero, ka mea, Whakarongo mai ki te kupu a te kingi nui, a te kingi o Ahiria.
29
Ko te kupu tenei a te kingi, Kei tinihangatia koutou e Hetekia; e kore hoki koutou e taea e ia te whakaora i roto i tona ringa.
30
Kei meinga ano hoki koutou e Hetekia kia whakawhirinaki atu ki a Ihowa, i a ia ka ki ra, Tera tatou ka whakaorangia e Ihowa, e kore ano hoki mo tenei pa e tukua atu ki te ringa o te kingi o Ahiria.
31
Kaua e whakarongo ki a Hetekia; ko te kupu hoki tenei a te kingi o Ahiria, Whakaritea mai he kawenata ki a au i runga i te hakari; haere mai hoki ki waho ki a au, ka kai ai koutou i nga hua o tana waina o tana waina, o tana piki o tana piki, ka inu ano hoki i te wai o tana puna o tana puna:
32
Kia tae atu ra ano ahau ki te tiki i a koutou ki te whenua e penei ana me to koutou nei whenua, ki te whenua witi, waina, ki te whenua taro, mara waina, ki te whenua oriwa hinu, honi, kia ora ai koutou, kei mate; kaua hoki e whakarongo ki a Hetekia; e whakapati ana hoki ia i a koutou, e mea ana, Ma Ihowa tatou e whakaora.
33
I whakaorangia ranei e tetahi o nga Atua o nga tauiwi tona whenua i roto i te ringa o te kingi o Ahiria?
34
Kei hea nga atua o Hamata, o Arapara? kei hea nga atua o Heparawaima, o Hena, o Iwa? i whakaorangia ranei e ratou a Hamaria i roto i toku ringa?
35
Na wai o nga atua katoa o nga whenua i whakaora to ratou whenua i roto i toku ringa, e whakaorangia ai e Ihowa a Hiruharama i roto i toku ringa?
36
Heoi whakarongo kau ana tera te iwi, kihai hoki i whakahoki kupu atu ki a ia; ko ta te kingi hoki tena i whakaako ai; i ki ia, Kaua e whakahoki kupu atu ki a ia.
37
Na, haere ana a Eriakimi tama a Hirikia te rangatira o te whare, ratou ko Hepena kai tuhituhi, ko Ioaha tama a Ahapa te kai whakamahara, ki a Hetekia, he mea haehae o ratou kakahu, a, korerotia atu ana e ratou ki a ia nga kupu a Rapahake.