- 1
- Na, i tangi tetahi o nga wahine a nga tama a nga poropiti ki Eriha, i mea, Kua mate to pononga taku tahu, e mohio ana ano koe i wehi to pononga i a Ihowa: na, kua tae mai te kai whakatarewa moni ki te tango i aku tamariki tokorua hei pononga mana.
- 2
- Na, ka mea mai a Eriha ki a ia, Ko te aha kia meatia e ahau mau? whakaaturia mai he aha tau i roto i te whare? Ano ra ko tera, Kahore rawa he mea a to pononga i roto i te whare; kotahi tonu te pāta hinu.
- 3
- Na, ko tana meatanga mai, Tikina, tonoa etahi oko mau i waho, i ou hoa tata katoa; hei nga oko takoto kau; kei torutoru.
- 4
- A ka tae koe ki roto, tutakina te tatau ki a koutou ko o tamariki; katahi ka riringi atu ki roto ki aua oko katoa: me hapai atu ano hoki te mea kua ki.
- 5
- Na, haere atu ana ia, a, tutakina atu ana te tatau ki a ia ratou ko ana tamariki. Ko ratou hei kawe mai ki a ia, a, ko ia hei riringi ki roto.
- 6
- A ka ki nga oko, na, ka mea ia ki tana tama, Mauria mai ano he oko ki a au. A ka mea tera ki a ia, Kahore atu ano he oko. Na, mutu ake te hinu.
- 7
- Na, haere ana ia, korerotia atu ana ki to te Atua tangata. Ano ra ko tera, Haere, hokona taua hinu, utua to moni tarewa; a ko te toenga hei oranga mo koutou ko o tamariki.
- 8
- Na, he ra ano ka haere atu a Eriha ki Huneme. A, kei reira tetahi wahine nui: na, ka tohe tera ki a ia, kia kai taro: na, i nga wa katoa i tika ai ia na reira, ka peka atu ia ki te kai taro.
- 9
- Na, ko te meatanga a tera ki tona tahu, Nana, e mohio ana ano ahau he tangata tapu na te Atua tenei e haereere tonu nei na to tatou wahi.
- 10
- Na, kia hangā e tatou tetahi ruma nohinohi ki runga i te taiepa, kia waiho e tatou he moenga mona ki reira, he tepara, he nohoanga, he rama, mo tana haere mai ki a tatou, na, ka peka atu ia ki reira.
- 11
- Na, i tetahi o aua ra ka tae ia ki reira; a, peka atu ana ki taua ruma, takoto ana i reira.
- 12
- Na, ko tana meatanga ake ki tana tangata ki a Kehati, Karangatia te Hunami nei. Na, karangatia ana ia e ia, a, tu ana tera ki tona aroaro.
- 13
- Na, ko tana kianga atu ki te tangata, Mea atu ki a ia, Nau katoa enei whakaaro i whakaaro mai ki a maua. Ko te aha kia meatia mau? e mea ana ranei koe kia korerotia koe ki te kingi, ki te rangatira ope ranei? Ano ra ko tera, Kei waenganui nei au i toku iwi e noho ana.
- 14
- Na, ka mea ake ia, Ko te aha ra kia meatia mana? Ano ra ko Kehati, Hore rawa ana tama, he koroheke ano hoki tona tahu.
- 15
- Na, ka mea ake ia, Karangatia, Na, karangatia ana ia e ia, tu ana tera i te kuwaha.
- 16
- Katahi ia ka mea atu, Kei tenei wa nei ano, kei te wa o to te tangata oranga e rite ai, ka awhi koe i te tamaiti. Ano ra ko tera, Kaua, e taku ariki, he tangata na te Atua hoki koe, kaua e teka ki to pononga wahine.
- 17
- Na, ka hapu taua wahine, a ka whanau he tamaiti i taua wa ano, i te wa o to te tangata oranga i rite ai, i tera i kiia mai e Eriha ki a ia.
- 18
- A, te kaumatuatanga ake o taua tamaiti, i tetahi o aua ra ka haere atu ia ki tona pāpā ki nga kai kokoti.
- 19
- Na, ko tana meatanga atu ki tona pāpā, Taku mātenga! taku mātenga! Na ka mea tera ki tetahi tamaiti, Kawea atu ki tona whaea.
- 20
- Na, hapainga ana e ia, a kawea atu ana ki tona whaea. Na, noho ana ki runga i ona turi, a poutumaro noa te ra. Katahi ka mate.
- 21
- Na, haere ana ia ki runga, whakatakotoria ana ia ki runga ki te moenga o te tangata a te Atua; na, kua tutakina atu tera e ia ki roto, puta mai ana ki waho.
- 22
- Na, ko tana karangatanga atu ki tona tahu, ka mea, Tena, ungā mai tetahi o nga taitamariki na ki a au, me tetahi o nga kaihe, kia rere ai ahau ki te tangata a te Atua, ka hoki mai ai.
- 23
- Ano ra ko tera, He aha koe i haere ai ki a ia inaianei? ehara nei hoki i te kowhititanga marama, i te hapati ranei. Ka mea mai ano ia, E pai ana ano.
- 24
- Na, whakanohoia ana e ia te kaihe, a ka mea ki tana tangata, Arahina atu, Haere tonu. Kaua e whakamutua to rere, kaua e whakaaro mai ki a au, kia mea ra ano ahau ki a koe.
- 25
- Na, haere ana ia, a ka tae ki te tangata a te Atua ki Maunga Karamere. A, te kitenga atu o te tangata a te Atua i a ia i tawhiti, ka mea ia ki tana tangata ki a Kehati, Nana, te Hunami ra!
- 26
- Na, tena, rere atu ki te whakatau i a ia, ka mea atu ki a ia, Kei te pai ranei koe; kei te pai ranei tou tahu; kei te pai ranei te tamaiti? Ano ra ko ia, Kei te pai.
- 27
- Na, ko tana haerenga mai ki te tangata a te Atua, ki te maunga, hopukia atu ana e ia ona waewae. Na, ka haere mai a Kehati ki te pana atu i a ia. Heoi ka mea te tangata a te Atua, Waiho ra, e mamae ana hoki tona ngakau; hunā hoki tenei e Ihowa ki a au, kihai hoki i whakaaturia mai e ia ki a au.
- 28
- Na, ko te meatanga ake a tera, I tonoa ranei e ahau tetahi tamaiti i toku ariki? kihai ianei ahau i mea, Kaua ahau e tinihangatia.
- 29
- Katahi ia ka mea ki a Kehati, Whitikiria tou hope, maua atu hoki toku tokotoko i tou ringa, a haere: ki te tutaki koe ki te tangata, kaua e owha atu ki a ia; a, ki te owha mai tetahi ki a koe, kaua e whakahoki kupu atu ki a ia; kia whakatakotoria ra ano e koe toku tokotoko ki runga ki te mata o te tamaiti.
- 30
- Na, ko te meatanga ake a te whaea o te tamaiti, E ora ana a Ihowa, e ora ana hoki tou wairua, e kore ahau e whakarere i a koe. Na, whakatika ana ia, haere ana i muri i te wahine.
- 31
- Na, ko Kehati kua pahemo atu ki mua i a raua, a, whakatakotoria ana e ia te tokotoko ki runga ki te mata o te tamaiti. Heoi kahore he reo, kahore hoki he ohonga ake. Na, hoki mai ana ia ki te whakatau i a ia, A ka korero atu ki a ia, ka mea, Kihai i korikori te tamaiti.
- 32
- Heoi haere mai ana a Eriha ki te whare. Na, ko te tamaiti e takoto ana i runga i tona moenga, mate tonu.
- 33
- Na, haere ana ia ki roto, tutakina ana e ia te tatau ki a raua tokorua. Kei te inoi ki a Ihowa.
- 34
- Na, piki ana ia ki runga, takoto ana ki runga ki te tamaiti; meatia iho e ia tona mangai ki runga ki to tera mangai, ona kanohi ki runga ki o tera kanohi, ona ringa ki runga ki o tera ringa; tapapa tonu ia ki runga ki a ia: na kua mahana nga kiko o te tamaiti.
- 35
- Na, hoki iho ana ia, a kopikopiko noa ana i roto i te whare. Na, piki ana ano ia ki runga, a tapapa ana ki runga ki a ia. Na, kua tihe te tamaiti, e whitu nga tihenga. Na, kua titiro nga kanohi o te tamaiti.
- 36
- Katahi tera ka karanga atu ki a Kehati, ka mea, Karangatia taua Hunami. Na, karangatia ana e ia, a haere mai ana tera ki a ia, ka mea atu ia, Tangohia atu to tamaiti.
- 37
- Na, haere mai ana tera, a, hinga ana ki ona waewae, piko ana ki te whenua. Na, tangohia ana e ia tana tamaiti, a haere ana.
- 38
- Na, hoki ana a Eriha ki Kirikara: a, he mate-kai ano kei te whenua. Na, kei tona aroaro nga tamariki a nga poropiti e noho ana. A ka mea ia ki tana tangata, Whakaekea te kohua nui, kohuatia he kai ma nga tamariki a nga poropiti.
- 39
- Na, te haerenga atu o tetahi ki te parae ki te kohi puwha, kua kitea e ia tetahi rakau maori tuā waina nei; na, whakiia ana e ia etahi o ona hua maori; ki tonu tona kakahu; haere mai ana ia, katokatohia iho ki roto ki te kohua, ki nga mea i kohuatia ra: kihai hoki i mohiotia e ratou.
- 40
- Na, ringitia ana e ratou hei kai ma nga tangata, a, ta ratou kainga iho i te mea i kohuatia ra, na, ka karanga ratou, ka mea, He mate kei roto i te kohua, e te tangata a te Atua! Na, kihai i taea e ratou te kai.
- 41
- Na, ko tana meatanga ake, Tena, kawea mai he paraoa. Na, makā ana e ia ki roto ki te kohua. Katahi ia ka mea, Ringitia ma te hunga nei, hei kai ma ratou. Na, kua kore noa iho he hē i roto i te kohua.
- 42
- Na, ka tae mai tetahi tangata o Paara-hariha, a, kawea mai ana e ia etahi taro matamua ma te tangata a te Atua, e rua tekau nga taro, he mea parei, me etahi hua witi i roto i te kopaki. Na, ka mea ia, Hoatu ki te hunga nei, hei kai ma ratou.
- 43
- Ano ra ko tana tuari, Ha, me hoatu ranei tenei e ahau ma nga tangata kotahi rau? Ano ra ko ia, Hoatu ma te hunga nei, hei kai ma ratou, ko ta Ihowa kupu hoki tenei, Ka kainga, a toe ake.
- 44
- Na, hoatu ana e ia ki to ratou aroaro, a kainga ana e ratou, toe ake; i rite tonu ki ta Ihowa kupu.
Address: 
Phone: 
Email: