- 1
- Na, he tangata nui i te aroaro o tona ariki a Naamana rangatira ope o te kingi o Hiria, e whakanuia ana hoki; no te mea i waiho ia e Ihowa hei kai homai i te oranga ki a Hiria. He tangata marohirohi ano hoki ia, he toa; otiia he repera.
- 2
- Na, i haere atu nga torohe a nga Hiriani, a, riro parau mai ana i a ratou tetahi kotiro iti i te whenua o Iharaira; na, ka waiho ia ma te wahine a Naamana.
- 3
- Na, ko te meatanga ake a tera ki tona rangatira, Aue! me i tata toku ariki ki te poropiti i Hamaria! Katahi ano he kai whakaora mo tona repera.
- 4
- Na, kua haere tetahi, kua korero ki tona ariki, kua mea, Ko nga korero tenei a te kotiro i riro mai i te whenua o Iharaira.
- 5
- Na, ko te meatanga ake a te kingi o Hiria, Haere mai, haere, me tuku pukapuka atu e ahau ki te kingi o Iharaira. Heoi haere ana ia, a, maua atu ana e tona ringa tekau nga taranata hiriwa, e ono mano nga koura, tekau nga whakarua kakahu.
- 6
- Na, kawea ana e ia te pukapuka ki te kingi o Iharaira; ko te korero tenei. Na, ka tae tenei pukapuka ki a koe, ko taku tangata tera ko Naamana kua ungā atu e ahau ki a koe, kia whakaorangia e koe tona repera.
- 7
- A, te korerotanga a te kingi o Iharaira i te pukapuka, na, haea ana e ia ona kakahu, ka mea, He atua ianei ahau hei whakamate, hei whakaora, i tono mai ai tenei tangata ki a au kia whakaorangia te repera o te tangata? Na, kia mohio mai koutou, kia kite e rapu ana ia i te take riri ki a au.
- 8
- A, te rongonga o Eriha tangata a te Atua kua haea e te kingi o Iharaira ona kakahu, na, ka unga tangata atu ia ki te kingi hei mea atu, He aha i haea ai e koe ou kakahu? kia haere mai ra ia ki a au, a ka mohio ia he poropiti tenei kei a Iharaira.
- 9
- Na, haere mai ana a Naamana, me ona hoiho, me tana hariata, a, tu ana ki te tatau o te whare o Eriha.
- 10
- Na, ka ungā atu he tangata e Eriha ki a ia, hei mea, Haere, kia whitu nga horoinga ki Horano, a ka hoki mai ou kikokiko ki a koe, ka ma koe.
- 11
- Te tino riringa o Naamana, haere ana, ka mea, Nana, i ki ahau, Tera ia e puta mai, e tu, e karanga ki te ingoa o Ihowa, o tona Atua, ka whakahaere hoki i tona ringa ki te wahi, a ka whakaorangia te repera.
- 12
- Ehara ianei a Apana raua ko Parapara nga awa o Ramahiku i te pai atu i nga wai katoa o Iharaira? kaua ianei ahau e horoi ki era, kia ma ai ahau? Na, tahuri atu ana ia, haere riri atu ana.
- 13
- Katahi ka whakatata mai ana tangata, a ka korero ki a ia, ka mea, E taku pāpā, me i nui te mea i korerotia e te poropiti ra ki a koe, e kore ianei e meatia e koe, na, tera noa ake i a ia ka ki mai nei ki a koe, Horoi kia ma ai.
- 14
- Na, haere ana ia ki raro, a, e whitu ana rukuhanga ki Horano; pera tonu ia me ta te tangata a te Atua i korero ai, a, hoki mai ana ona kikokiko, ano he kikokiko no te tamaiti iti: na, kua ma.
- 15
- Na, hoki mai ana ia ki te tangata a te Atua, a ia me tana huihui katoa. Te taenga mai, ka tu ki tona aroaro, ka mea, Nana, katahi au ka mohio, kahore he Atua o nga whenua katoa, kei a Iharaira anake. Na, tena, kia tangohia e koe tetahi manaakitanga a to pononga.
- 16
- Ano ra ko tera, E ora ana a Ihowa kei tona aroaro nei au e tu nei, e kore e tangohia e ahau. Na, tohe ana tera ki a ia kia tangohia; heoi whakakahore tonu ia.
- 17
- Ano ra ko Naamana, E kore ianei tetahi oneone e homai ki to pononga hei te pikaunga ma nga muera e rua? e kore hoki to pononga e mea i te tahunga tinana, i te patunga tapu ranei, a muri ake ma etahi atua ke; engari ma Ihowa.
- 18
- Kia whakarerea noatia iho e Ihowa te hara o tenei mea a tou pononga, ara, ka haere toku ariki ki te whare o Rimono ki reira koropiko ai, a ka taupuhipuhi ano ia ki toku ringa, a ka koropiko ahau i roto i te whare o Rimono: ka koropiko ahau i roto i te whare o Rimono, kia whakarerea noatia iho e Ihowa te hara o tenei mea a to pononga.
- 19
- Ano ra ko tera ki a ia, Haere marie. Na, mawehe atu ana ia i a ia; he iti nei te wahi.
- 20
- Na, ko te meatanga ake a Kehati kai mahi a Eriha, a to te Atua tangata, Na, kua ata hanga nei toku ariki ki tenei Hiriani, ki a Naamana, kihai i tangohia i tona ringa nga mea i kawea mai nei e ia: e ora ana a Ihowa ka oma atu ahau ki te whai i a ia, ka tangohia ano hoki e ahau etahi mea i a ia.
- 21
- Na, kei te whai a Kehati i a Naamana. A, te kitenga o Naamana i a ia e whai mai ana i muri i a ia, na, ka marere iho i te hariata ki te whakatau i a ia, a ka mea atu, He pai ranei?
- 22
- Ano ra ko tera, He pai. I ungā mai ahau e toku ariki hei ki atu,Tenei etahi taitamariki tokorua kua tae mai ki a au i Maunga Eperaima no nga tamariki a nga poropiti, tena tetahi taranata hiriwa kia homai e koe ma raua; kia rua ano hoki nga whakarua kakahu.
- 23
- Na, ko te meatanga a Naamana, Whakaaetia mai nga taranata e rua kia tangohia e koe. Na, tohea ana ia e ia, a, takaia ana e ia nga taranata hiriwa e rua ki roto ki nga pēke e rua, me nga whakarua kakahu e rua, a, hoatu ana ki ona tangata tokorua hei mau ki tona aroaro.
- 24
- A, tona taenga atu ki te puke, ka tangohia e ia i o raua ringa, a, whakatakotoria ana ki te whare. Na, tukua atu ana e ia aua tangata, a, haere ana raua.
- 25
- Na, haere ana ia ki roto, a, tu ana ki te aroaro o tona ariki. Na, ko te meatanga a Eriha ki a ia, I hea koe, e Kehati? Ano ra ko ia, Kahore noa iho to pononga i haere ki tetahi wahi.
- 26
- Na, ko tana meatanga atu ki a ia, Kihai ianei toku ngakau i haere tahi i a koe i te tahuritanga mai a taua tangata i runga i tona hariata ki te whakatau i a koe? Ko te wa ianei tenei mo te tango moni, mo te tango kakahu, mara oriwa, mara waina, hipi, kau, pononga tane, pononga wahine?
- 27
- Na, tera e piri te repera o Naamana ki a koe, ki tou uri ano hoki, a, ake ake. Na, haere atu ana ia i tona aroaro, he repera, ma tonu, ano he hukarere.
Address: 
Phone: 
Email: