2nd Kings Chapter 9 - Paipera Tapu 1868 | Te Paipera Tapu 1868

2nd Kings Chapter 9 - Paipera Tapu 1868

1
Katahi a Eriha poropiti ka karanga ki tetahi o nga tamariki a nga poropiti, a ka mea ki a ia, Whitikiria tou hope, mauria atu ano hoki tenei pouaka hinu i tou ringa, ka haere ki Ramoto-kireara.
2
E tae koe ki reira, tirohia iho a Iehu tama a Iehohapata tama a Nimihi; katahi koe ka haere atu, ka mea i a ia kia whakatika i roto i ona tuakana, ka kawe ano hoki i a ia ki te ruma i roto.
3
Na, ka mau koe ki te pouaka hinu, ka riringi ki runga ki tona mātenga, ka mea atu, Ko te kupu tenei a Ihowa, Ka oti koe te whakawahi e ahau hei kingi mo Iharaira: ko reira koe uaki ai i te tatau, rere mai ai; kei whakaroa koe.
4
Na, haere ana taua taitamariki, ara, te taitamariki te poropiti, ki Ramoto-kireara.
5
A te taenga atu, na, ko nga rangatira o te ope e noho ana. Na, ka, mea ia, He kupu taku ki a koe, e te rangatira. Ano ra ko Iehu, ki a wai o matou katoa? Ano ra ko tera, Ki a koe, e te rangatira.
6
Na, whakatika ana ia, a, haere ana ki roto ki te whare. Na, ringitia ana e tera te hinu ki runga ki tona mātenga, me te ki atu ano ki a ia, Ko te kupu tenei a Ihowa Atua o Iharaira, Ka oti koe te whakawahi e au hei kingi mo ta Ihowa iwi, mo Iharaira.
7
Mau ano hoki e patu te whare o Ahapa, o tou ariki, kia whai utu ai ahau i te ringa o Ietepere mo nga toto o aku pononga, o nga poropiti, mo nga toto ano hoki o nga pononga katoa a Ihowa.
8
A ka ngaro te whare katoa o Ahapa: ka hautopea atu hoki e ahau nga mea o Ahapa e pi ana ki te taiepa, me nga mea ano hoki o Iharaira i tutakina atu, i mahue atu ranei.
9
A ka meinga e ahau te whare o Ahapa kia rite ki te whare o Ieropoama tama a Nepata, ki te whare ano hoki o Paaha tama a Ahia.
10
Ka kainga ano hoki a Ietepere e nga kuri ki te wahi o Ietereere, a, kahore he kai tanu mona. Na, uakina ana e ia te tatau, a rere ana.
11
Te putanga mai o Iehu ki waho ki nga pononga a tona ariki, ka mea tetahi ki a ia, He pai ranei? Na te aha tenei haurangi i haere mai ai ki a koe? Ano ra ko ia ki a ratou, E mohio ana ano koutou ki te tangata me ana korero.
12
Ano ra ko ratou, He teka. Tena, whakaaturia mai ki a matou. Na, ko tana meatanga atu, Koia ano tenei ana korero ki a au, Ko ta Ihowa kupu tenei, Ka oti koe te whakawahi e ahau hei kingi mo Iharaira.
13
Na, hohoro tonu ratou, kua mau ki tona kakahu, ki tona kakahu, wharikitia iho e ratou ki raro i a ia, ki runga ki te arawhata, whakatangihia ana te tētere, me te ki atu ano, Ko Iehu hei kingi.
14
Na, kua whakatupuria he hē e Iehu tama a Iehohapata tama a Nimihi mo Iorama. (Na, i puritia ai a Ramoto-kireara e Iorama ratou ko Iharaira katoa, he whakaaro ki a Hataere kingi o Hiria.)
15
Ko Kingi Iehorama ia i hoki ki Ietereere kia rongoatia ona tūnga, i tu ai ia i nga Hiriani i tana whawhaitanga ki a Hataere kingi o Hiria. Na, ko te meatanga ake a Iehu, Ki te whai ngakau koutou, kei puta atu tetahi ki waho, kei oma atu i roto i te pa, kei haere ki Ietereere whakaatu ai.
16
Na, eke ana e Iehu ki runga ki te hariata, a, haere ana ki Ietereere; kei reira hoki a Iorama e takoto ana. Kua riro mai ano hoki a Ahatia kingi o Hura ki raro, kia kite i a Iorama.
17
Na, i runga i te pourewa i Ietereere te kai tutei e tu ana, a ka kitea atu e ia te ropu a Iehu, i a ia e haere mai ana; na, ka mea, He ropu tangata tenei te tirohia atu nei e ahau. Na, ko te meatanga mai a Iehorama, Tikina he tangata eke hoiho ungā atu ki te whakatau i a ratou, hei mea atu, He pai ranei?
18
Na, haere ana tetahi kai eke hoiho ki te whakatau i a ia, a ka mea atu, Ko te kupu tenei a te kingi, He pai ranei? Ano ra ko Iehu, Hei aha mau te pai? Haere ake ki muri i a au. Na, ka korero mai te kai tutei; ka mea Kua tae atu te tangata ki a ratou; otiia kahore e hoki mai.
19
Na, ka ungā ano hoki e ia he kai eke hoiho. Te haerenga mai o tera ki a ratou, ka mea, Ko te kupu tenei a te kingi, He pai ranei? Ano ra ko Iehu, Hei aha mau te pai? Haere ake ki muri i a au.
20
Na, ka korero mai te kai tutei, ka mea mai, I tae atu ia ki a ratou; heoi kahore e hoki mai; te whiu ano hoki o te hariata, rite tonu ki te whiu a Iehu tama a Nimihi. He porangi rawa hoki tana whiu.
21
Na, ko te meatanga a Iehorama, Whakanohoia. Na, ka whakanohoia tona hariata; a, puta atu ana a Iehorama kingi o Iharaira raua ko Ahatia kingi o Hura i runga i tana hariata, i tana hariata, haere ana ki te whakatau i a Iehu, tutaki rawa atu ki a ia, kei te wahi o Napoto Ietereeri.
22
Na, te kitenga o Iehorama i a Iehu, ka mea atu, He pai ranei, e Iehu? Ano ra ko ia, Pai aha, i nga puremutanga a tou whaea a Ietepere, me ana mahi makutu, ka hua nei?
23
Na ka huri nga ringa o Iehorama, a rere ana, me te karanga atu ano ki a Ahatia, He tinihanga, e Ahatia!
24
Heoi whakapaua ana e Iehu tona kaha ki te kopere. Na, kua tu a Iehorama i waenga pu o ona ringa, a puta atu ana te pere i tona ngakau. Na, tapapa iho ia i runga i te hariata.
25
Katahi ka mea tera ki tetahi rangatira āna, ki a Pirikara, Tikina atu, makā atu ki te wahi o te mara a Napoto Ietereeri: kia mahara hoki, i a taua e haere ana i runga i te hoiho i muri i a Ahapa i tona pāpā, na ka whakapikaua ia e Ihowa, ki tenei pikaunga;
26
I kitea putia e ahau inanahi nga toto o Napoto, me nga toto o ana tama, e ai ta Ihowa; a ka utua ano koe e ahau ki tenei wahi, e ai ta Ihowa. Na tikina, makā atu ki taua wahi; kia rite ki te kupu a Ihowa.
27
A, te kitenga o Ahatia kingi o Hura, na, rere ana ia i te ara o te whare kāri. Heoi kei te whai ano a Iehu i a ia, a, whakaekea ana a ka mea, Patua ano hoki ia i runga i te hariata. Patua ana e ratou i te haerenga atu ki runga ki Kuru, ki tera i te taha o Ipireama. Na, rere ana ia ki Mekiro; a, mate iho i reira.
28
Na, ka kawea ia e ana tangata i runga i te hariata ki Hiruharama, tanumia atu ana ki roto ki tona urupa ki te taha o ona mātua, ki te pa o Rawiri.
29
No te tekau ma tahi o nga tau o Iorama tama a Ahapa i kingi ai a Ahatia ki Hura.
30
Na, ka haere mai a Iehu ki Ietereere; a, te rongonga o Ietepere, na, ka pania e ia tona mata, whakapaipai rawa tona mahunga, a, titiro mai ana i te matapihi.
31
A, te haerenga mai o Iehu ki te kuwaha, ka mea mai tera; I mau ranei te rongo ki a Timiri i patu nei i tona ariki?
32
Na, ka maranga ake ona kanohi ki te matapihi, ka mea, Ko wai toku? ko wai? Katahi ka titiro mai etahi unaka ki a ia, tokorua, tokotoru.
33
Na, ko tana kianga atu, Makā iho. Na, makā iho ana e ratou, a, patī ana ona toto ki te pakitara, ki nga hoiho ano hoki; a, takahia iho e ia.
34
Na, haere ana ia ki roto, kei te kai, kei te inu na, ko tana kianga atu, Tikina, tirohia taua wahine kua kangā nei, ka tanu ai; he tamahine kingi hoki
35
Na, haere ana ratou ki te tanu i a ia; heoi kihai i kitea, ko te angaanga anake, me nga waewae, me nga kapu o nga ringa.
36
Na, hoki mai ana ratou ki te korero ki a ia; a ka mea ia, Ko te kupu tenei a Ihowa, tana ra i korerotia e tana pononga e Iraia Tihipi, tana i ki ra, Ka kainga e nga kuri ki te wahi o Ietereere nga kikokiko o Ietepere;
37
A ka waiho te tinana o Ietepere hei whakawairakau i runga i te mata, o te parae i te wahi o Ietereere, a kahore noa iho e kiia, Ko Ietepere tenei.