- 1
- Na haimona Pita, na te pononga na te Apotoro a Ihu Karaiti, ki te hunga kua whiwhi ki te whakapono utu nui, ki te penei ano me to matou nei, he meatanga na te tika o to tatou Atua, ara o te Kai whakaora o Ihu Karaiti:
- 2
- Kia whakanuia te aroha noa me te rangimarie ki a koutou, i runga i te matauranga ki te Atua, ki a Ihu hoki ki to tatou Ariki;
- 3
- Kua homai na hoki e tona kaha Atua ki a tatou nga mea katoa mo te ora, mo te karakia pai, i te mea ka mātau nei ki te Kai karanga i a tatou i runga i te kororia i te pai:
- 4
- Na enei hoki i riro mai ai i a tatou nga kupu whakaari, he mea nui whakaharahara, he mea utu nui; ma enei hoki koutou ka whiwhi ai ki te ahua Atua, i a koutou ka mawhiti mai nei i ta te hiahia pirau, i tenei i te ao nei.
- 5
- Mo reira nei hoki, me whakapau rawa o koutou uaua, a honoa iho te pai ki runga ki to koutou whakapono; ki runga hoki ki te pai ko te matauranga;
- 6
- Ki runga ki te matauranga ko te pēhi o te hiahia; a ki runga ki te pēhi o te hiahia ko te manawanui; ki runga ki te manawanui ko te tikanga o te karakia;
- 7
- Ki runga ki te karakia pai ko te atawhai ki nga teina; ki runga ki te atawhai ki nga teina ko te aroha.
- 8
- Ki te mea hoki kei a koutou enei mea, a e nui ana, ka meinga koutou kia kaua e mangere kia kaua e hua kore i runga i te matauranga ki to tatou Ariki ki a Ihu Karaiti.
- 9
- Te tangata hoki kahore nei i a ia enei mea, he matapo, he atarua, kua wareware ki te horoinga o ona hara o mua.
- 10
- Mo konei, e aku teina, kia puta o koutou uaua ki te whakapumau i to koutou karangatanga i to koutou whiriwhiringa: ki te penei hoki ta koutou mahi e kore rawa koutou e tapepa:
- 11
- Penei hoki ka whiwhi nui koutou ki te tapokoranga ki te rangatiratanga mutunga kore o to tatou Ariki, ara o te Kai whakaora o Ihu Karaiti.
- 12
- Mo reira ano e kore ahau e mangere ki te whakamahara tonu i a koutou ki enei mea, kua mātau nei ano koutou, kua oti ano te whakau ki runga ki tenei mea pono.
- 13
- Ki toku whakaaro hoki, i a au e noho ana i tenei tapenakara, he mea tika ano kia whakaoho ahau i a koutou, kia whakamahara;
- 14
- E mohio ana hoki ahau e kore e wheau ka mahue tenei tapenakara aku, ka pera ano me ta to tatou Ariki ta Ihu Karaiti i whakakite mai ai ki a au.
- 15
- Ka puta ano hoki toku uaua kia mau tonu ai to koutou mahara ki enei mea, i muri i taku haerenga atu.
- 16
- Ehara hoki i te mea he whai ta matou i nga kupu i titoa e te whakaaro tinihanga, i te mea e whakapuakina ana e matou ki a koutou te kaha me te haerenga mai o to tatou Ariki o Ihu Karaiti, engari he kai titiro ano matou ki tona nui.
- 17
- I riro mai hoki he honore he kororia ki a ia i te Atua Matua, i te putanga mai o taua reo ki a ia i roto i te kororia nui rawa, Ko taku Tama tenei i aroha ai, ko taku i ahuareka atu ai.
- 18
- I rongo ano matou ki tenei reo e puta mai ana i te rangi, i a matou i tona taha i runga i te maunga tapu.
- 19
- A tenei ano kei a tatou te kupu poropiti, he mea e nui atu ana te u; pai tonu ki te anga ta koutou whakaaro ki reira, he rama hoki e tiaho ana i te wahi pouri, kia puao ra ano te ra, kia ara ra ano te whetu o te ata i roto i o koutou ngakau:
- 20
- Ko tenei ta koutou e mohio ai i te tuatahi, kahore he poropititanga o te Karaipiture nona ake ona tikanga.
- 21
- Ehara hoki i te mea na te tangata i pai ake i puta mai ai te poropititanga i mua, engari he mea whakamahara na te Wairua Tapu i korero ai nga tāngata tapu a te Atua.
Address: 
Phone: 
Email: