- 1
- Na, i muri i tenei ka mate te kingi o nga tamariki a Amona, a, ko Hanunu ko tana tama te kingi i muri i a ia.
- 2
- Katahi ka mea a Rawiri, Ka puta taku aroha ki a Hanunu tama a Nahaha, ka rite ano ki te whakaputanga aroha mai a tona pāpā ki a au. Na, tonoa ana e Rawiri ana tangata hei kawe i tana whakamarie ki a ia mo tona pāpā. A ka tae mai nga tangata a Rawiri ki te whenua o nga tamariki a Amona.
- 3
- Na, ka mea mai nga rangatira o nga tamariki a Amona ki a Hanunu ki to ratou ariki, Ki tau whakaaro he whakahonore na Rawiri i tou pāpā i tonoa mai ai e ia nga kai whakamarie ki a koe? he teka ianei he titiro i te pa, he tutei, he whakangaro te mea i tonoa mai ai e Rawiri ana tangata ki a koe?
- 4
- Na, ka mau a Hanunu ki nga tangata a Rawiri, a heua ana e ia tetahi taha o o ratou pahau, tapahia ana hoki e ia o ratou kakahu ki waenga, a, tae noa iho ki o ratou pāpā, a, tonoa atu ana ratou.
- 5
- A ka korerotia ki a Rawiri, na, ka tono tangata ia ki te whakatau i a ratou; he nui hoki te whakama o aua tangata; i mea ano hoki te kingi, Hei Heriko koutou noho ai, kia tupu ra ano o koutou pahau. Ko reira hoki mai ai.
- 6
- A, te kitenga o nga tamariki a Amona e piro ana ratou ki a Rawiri, na, ka tono tangata mai nga tamariki a Amona hei utu i nga Hiriani o Pete-rehopo, i nga Hiriani ano hoki o Topa, e rua tekau nga mano, he hunga haere i raro, i te kingi ano hoki o Maaka, kotahi mano tangata, i to Ihi-topo, kotahi tekau ma rua mano tangata.
- 7
- A, te rongonga o Rawiri, na, ka tonoa e ia a Ioapa ratou ko te ope katoa, ko nga tangata marohirohi.
- 8
- Na, ka puta mai nga tamariki a Amona ki waho, a whakatakotoria ana o ratou ngohi ki te kuwaha o te keti: a, ko nga Hiriani o Topa, o Rehopo, me nga tangata o Ihi-topo, o Maaka, he ngohi ano to ratou i te parae.
- 9
- A, te kitenga o Ioapa e akina ana a mua, a muri ano hoki ona e te hoa riri, na, ka whiriwhiria e ia etahi i roto i te hunga whiriwhiri katoa o Iharaira, a whakaritea ana e ia hei tu i nga Hiriani:
- 10
- Ko te nuinga atu hoki o te iwi i tukua e ia ki te ringaringa o Apihai o tona teina, a whakatikaia ana e tera hei tu i nga tamariki a Amona.
- 11
- I mea ano ia, Ki te kaha nga Hiriani i a au, na, me awhina mai ahau e koe; a, ki te kaha nga tamariki Amona i a koe, na, me haere atu ahau ki te awhina i a koe.
- 12
- Kia maia, kia maia tatou; me whakaaro ki to tatou iwi, ki nga pa o to tatou Atua, a, ma Ihowa e mea te mea e pai ana ki tana titiro iho.
- 13
- A, te whakatatanga o Ioapa ratou ko tona nuinga ki te whawhai ki nga Hiriani, na, rere ana ratou i tona aroaro.
- 14
- A, te kitenga o nga tamariki a Amona kua rere nga Hiriani, na, ka rere ano ratou i te aroaro o Apihai, a, haere ana ki te pa. Na, hoki mai ana a Ioapa i nga tamariki a Amona, a haere ana ki Hiruharama.
- 15
- A, te kitenga o nga Hiriani kua patua ratou e Iharaira, na, ka huihui ratou.
- 16
- A ka tono tangata atu a Hararetere ki te tiki i nga Hiriani i tera taha o te awa: a, haere mai ana ratou ki Herama, ko Hopaka ano hoki rangatira o te ope a Hararetere i mua i a ratou.
- 17
- A ka korerotia ki a Rawiri, na, ka huihuia e ia a Iharaira katoa, a, whiti ana ki tera taha o Horano haere ana ki Herama. Na, ka whakatikaia e nga Hiriani o ratou ngohi hei tu i a Rawiri, a ka whawhai ki a ia.
- 18
- Na, ka rere nga Hiriani i te aroaro o Iharaira, a, patua iho o nga Hiriani e Rawiri nga tangata o nga hariata e whitu nga rau, e wha tekau mano ano hoki nga hoia eke hoiho; i patua ano hoki e ia a Hopaka te rangatira o ta ratou ope, a, mate iho ia ki reira.
- 19
- A, te kitenga o nga kingi katoa, o nga apa o Hararetere, kua patua ratou e Iharaira, na, ka houhia e ratou te rongo ki a Iharaira, a ka meinga hei apa mo ratou. Heoi wehi ana nga Hiriani, a mutu ake to ratou awhina i nga tamariki a Amona.
Address: 
Phone: 
Email: