- 1
- Muri iho i enei mea, na, he tuahine to Apoharama, to te tama a Rawiri ko Tamara te ingoa, he ataahua; a, i arohaina ia e Amanono tama a Rawiri.
- 2
- Na, ngaua kinotia ana a Amanono, no ka mate ia; he meatanga hoki ki tona tuahine ki a Tamara, he wahina hoki ia, ki te whakaaro a Amanono, he hē rawa ki te meatia tetahi mea ki a ia.
- 3
- Na, he hoa to Amanono, tona ingoa ko Ionarapa, he tama na Himea na tetahi o nga tuakana o Rawiri; he tangata mohio rawa ano hoki a Ionarapa.
- 4
- Na, ko tana meatanga mai ki a ia, He aha koe i penei ai te kiko-kore i tenei ata, i tenei ata, he tama nei hoki na te kingi? E kore ianei e whakaaturia mai e koe ki a au? Ano ra atu ko Amanono ki a ia, Ko Tamara ko te tuahine o Apoharama, o toku teina, e arohaina ana e ahau.
- 5
- Katahi a Ionarapa ka mea ki a ia, Takoto i runga i tou moenga, ka whakamatemate hoki, a ka tae mai tou pāpā kia kite i a koe, na, ka mea atu ki a ia, Kia haere mai toku tuahine a Tamara ki te whangai i a au ki te kai, ki te taka hoki i te kai i taku tirohanga, kia kite atu ai ahau, kia kai ai i ta tona ringa.
- 6
- Na, ka takoto a Amanono, ka whakamatemate; a, te taenga mai o te kingi kia kite i a ia, ka mea a Amanono ki te kingi, Tena kia haere mai a Tamara toku tuahine ki te hanga i etahi keke i taku tirohanga, kia rua, a ka kai ahau i ta tona ringa.
- 7
- Na, ka tono tangata atu a Rawiri ki te whare ki a Tamara, ka mea atu, Tena, haere ki te whare o tou tungane o Amanono ki te taka kai māna.
- 8
- Na, haere ana a Tamara ki te whare o tona tungane o Amanono, a, i te takoto tera: na, ka mau ia ki te paraoa, a, pokepokea ana, hangā ana hei keke i tana tirohanga, na, tunua ana e ia nga keke.
- 9
- Na, kua mau ia ki te paraipana, ringitia ana e ia ki tona aroaro: heoi ka whakaparahako tera ki te kai. Katahi a Amanono ka mea, Kia mawehe katoa atu nga tangata i a au. Na, ka mawehe katoa mai nga tangata i a ia.
- 10
- Na, ka mea a Amanono ki a Tamara, Maua ake te kai na ki te whare moenga, a, ma to ringa ahau e whangai. Na, ka mau a Tamara ki nga keke i hangā e ia, a, kawea ana ki a Amanono ki tona tungane ki te whare moenga.
- 11
- A, tana kawenga mai ki a ia kia kainga, na, ka hopu tera i a ia, ka mea, Haere mai, taua ka takoto tahi, e taku tuahine.
- 12
- Na, ko tana meatanga atu ki a ia, Kauaka, e toku tungane, kaua ahau e whakaititia, kahore hoki he mahi penei i roto i a Iharaira: kati ra tenei mahi wairangi.
- 13
- Ko au hoki, kei hea he hunanga mo toku whakama? ka rite ano hoki koe ki tetahi o te hunga wairangi o Iharaira. Engari ra korero atu ki te kingi; e kore hoki ahau e kaiponuhia e ia ki a koe.
- 14
- Heoi kihai ia i pai ki te whakarongo ki tona reo: na, he kaha rawa ia i a ia, a, whakaititia ana ia e ia, takotoria ana e ia.
- 15
- Na, nui whakaharahara te kino i kino ai a Amanono ki a ia; nui atu te kino i kino ai ia ki a ia i te aroha i aroha ai ia ki a ia. Katahi a Amanono ka mea ki a ia, Whakatika, haere.
- 16
- Na, ko te meatanga atu a tera ki a ia, Kahore he rawa: nui atu te kino o tenei tononga i a au i tera i meatia e koe ki a au. Heoi kihai ia i pai ki te whakarongo ki a ia.
- 17
- Na, ka karangatia e ia tana tangata i mahi nei ki a ia, a ka mea, Tonoa atu tenei wahine i toku aroaro ki waho, whakarawatia hoki te tatau i muri i a ia.
- 18
- Na, he kakahu purepure to te wahine, he pera hoki nga koroka i kakahuria ai nga tamahine wahina a te kingi. Na, ka kawea ia e tana tangata ki waho, a, whakarawatia ana te tatau i muri i a ia.
- 19
- Katahi ka opehia e Tamara he pungarehu ki runga ki tona mātenga, a, haea ana e ia tona kakahu purepure, taupokina iho ona ringa ki runga ki tona mātenga, haere ana, me te aue haere.
- 20
- Na, ka mea a Apoharama tona tungane ki a ia, I a koe to tungane a Amanono? Na, noho puku, e taku tuahine; ko to tungane hoki ia, kaua tou ngakau e mea iho ki tenei mea. Na, noho ana a Tamara, whakapouaru ana i roto i te whare o tona tungane o Apoharama.
- 21
- A, te rongonga o Kingi Rawiri i enei mea katoa, nui rawa tana riri.
- 22
- Heoi kahore a Apoharama kupu ki a Amanono, ahakoa pai, ahakoa kino: e mauahara ana hoki a Apoharama ki a Amanono, mona i whakaiti i tona tuahine i a Tamara.
- 23
- A, te takanga o nga tau e rua, na, he kai kutikuti hipi a Apoharama i Paara-hatoro, i te taha o Eperaima, a, karangatia ana e Apoharama nga tama katoa a te kingi.
- 24
- Katahi ka haere a Apoharama ki te kingi, a ka mea atu, Nana he kai kutikuti enei a to pononga, na, kia haere te kingi ratou ko ana pononga hei hoa mo to pononga.
- 25
- Na, ko te meatanga mai a te kingi ki a Apoharama, Kauaka e taku tamaiti, kaua matou katoa e haere atu, kei whakararua koe e matou. Heoi tohe ana ia ki a ia: otiia kihai tera i pai ki te haere; engari i manaaki i a ia.
- 26
- Na, ko te meatanga atu a Apoharama, A, kaua ano toku tuakana a Amanono e haere tahi matou? Na, ka mea mai te kingi, Kia haere ia i a koe hei aha?
- 27
- Na, ka tohe a Apoharama ki a ia, a ka tukua atu e ia a Amanono ratou ko nga tamariki katoa a te kingi hei hoa mona.
- 28
- Na, i whakahau tera a Apoharama i ana tangata, i mea, E kite koutou i te ngakau o Amanono e koa ana i te waina, a ka mea ahau ki a koutou, Patua a Amanono, na, me whakamate ia e koutou, kaua e wehi; he teka ianei naku koutou i whakahau atu? Kia uaua, kia toa.
- 29
- A, rite tonu ta nga tangata a Apoharama i mea ai ki a Amanono ki ta Apoharama i whakahau ai. Na, whakatika katoa ana nga tama a te kingi, a, eke ana ki tana muera, ki tana muera, rere ana.
- 30
- I a ratou ano i te ara, ka, tae te rongo ki a Rawiri, ka korerotia, Kua patua e Apoharama nga tama katoa a te kingi, kihai hoki tetahi o ratou i mahue.
- 31
- Katahi ka whakatika te kingi, a, haea ana e ia ona kakahu, takoto ana ki te whenua; me te tu ano ana tangata katoa, he mea haehae nga kakahu.
- 32
- Na, ka oho mai a Ionarapa te tama a Himea a te tuakana o Rawiri, ka ki mai, Kei mea toku ariki, ko nga taitamariki katoa, ko nga tama a te kingi kua whakamatea nei; engari ko Amanono anake i mate: ko ta Apoharama hoki tenei i karanga ai, he mea whakatakoto no te rangi ra ano i whakaiti ai tera i tona tuahine i a Tamara.
- 33
- Na, kaua te ngakau o toku ariki o te kingi e mea iho ki taua mea, e ki, Ko nga tama katoa a te kingi kua mate: kaore, ko Amanono anake i mate.
- 34
- Na, rere ana a Apoharama. A, te marangatanga ake o nga kanohi o te tamaiti e tutei atu ana, ka titiro, na, he nui te hunga e haere mai ana i te ara i te taha o te puke i tona tuara.
- 35
- Na, ko te kianga atua Ionarapa ki te kingi, Nana, ko nga tama a te kingi te haere mai nei; e rite tonu ana ki ta to pononga i mea ai.
- 36
- Mutu kau tana korero, na, ko te haerenga mai o nga tama a te kingi, a, nui atu to ratou reo ki te tangi; nui whakaharahara ano hoki te tangi i tangi ai te kingi ratou ko ana tangata katoa.
- 37
- Na, rere ana a Apoharama, haere ana ki a Taramai ki te tama a Amihuru, ki te kingi o Kehuru. Ko Rawiri ia, tangihia ana e ia tana tama i nga ra katoa.
- 38
- Heoi rere ana a Apoharama, haere ana ki Kehuru, e toru ona tau ki reira.
- 39
- Na, pau iho a Kingi Rawiri i te hiahia kia haere ki a Apoharama: kua marie hoki ia ki a Amanono, no te mea kua mate ke.
Address: 
Phone: 
Email: