- 1
- Na, kua korerotia ki a Ioapa, Nana, kei te tangi te kingi, kei te uhunga i a Apoharama.
- 2
- Na, puta ke ana te whakaoranga i taua ra hei tangihanga ma te iwi katoa; i rongo hoki te iwi i taua ra i te korero, e koingo ana te kingi ki tana tamaiti.
- 3
- Na, haere puku ana te iwi i taua ra ki te pa, pera tonu ratou me te hunga e haere puku ana i te whakama, ina rere i te whawhaitanga.
- 4
- Ko te kingi ia, taupoki tonu tona mata, nui atu te reo o te kingi ki te tangi, E Apoharama, e taku tamaiti, e Apoharama, e taku tamaiti, e taku tamaiti.
- 5
- Na, ka haere mai a Ioapa ki te kingi ki roto ki te whare, a ka mea, Kua whakama i a koe inaianei nga mata o o tangata katoa i ora ai koe i tenei ra, i ora ai hoki o tama, me o tamahine, i ora ai o wahine, i ora ai ano hoki o wahine iti,
- 6
- I a koe ka aroha nei ki o hoa riri, ka kino nei ki te hunga e aroha ana ki a koe. Kua whakaatu mai na hoki koe i tenei ra, he kore noa iho ki a koe nga rangatira me nga tangata: e mohio ana hoki ahau i tenei ra, kia ora kau ko Apoharama, a kia mate ko matou katoa i tenei ra, tika tonu ki tau titiro iho.
- 7
- Na, whakatika, puta atu ki waho, kia puaki tetahi kupu pai ki o tangata: ta te mea he oatitanga tenei naku i a Ihowa, Ki te kahore koe e puta ake, e kore tetahi tangata e noho ki a koe i tenei po: a, nui atu tenei kino ki a koe i nga kino katoa i pa ki a koe o tou taitamarikitanga ake, a mohoa noa nei.
- 8
- Katahi ka whakatika te kingi, a, noho ana i te kuwaha. Na, ka korerotia te korero ki te iwi katoa, Te kingi ra, e noho mai ra i te kuwaha. Na, haere ana te iwi katoa ki te aroaro o te kingi; kua whati hoki tera a Iharaira ki tona teneti, ki tona teneti.
- 9
- Na, ka puta ake he tautohetohenga i roto i nga tangata katoa, i roto i nga iwi katoa o Iharaira. I ki ratou, Na te kingi tatou i whakaora i roto i te ringa o o tatou hoa riri, nana hoki tatou i mawhiti ai i roto i te ringa o nga Pirihitini; heoi kua whati atu nei ia i te whenua i te wehi ki a Apoharama.
- 10
- Kua mate ano hoki i te whawhaitanga a Apoharama i whakawahia nei e tatou hei kingi mo tatou, na, he aha koutou tē kuihi ai kia whakahokia te kingi?
- 11
- Katahi a Kingi Rawiri ka tono tangata atu ki a Haroko raua ko Apiatara, ki nga tohunga, hei ki atu, Korero atu ki nga kaumatua o Hura, mea atu, He aha koutou i tauhiku ai ki te whakahoki i te kingi ki tona whare? kua tae atu na hoki te korero a Iharaira katoa ki te kingi ki tona whare.
- 12
- Ko oku teina nei koutou, ko oku wheua, me oku kikokiko, he aha koutou i tauhikuhiku ai ki te whakahoki i te kingi?
- 13
- Ma korua ano hoki e ki atu ki a Amaha, Ehara ianei koe i te wheua noku, i te kikokiko noku? ma te Atua e mea tenei mea ki a au me tetahi atu mea, ki te kahore e whakakahoretia a Ioapa, ko koe ka meinga hei rangatira ope ki toku aroaro i nga ra katoa.
- 14
- Na, kua anga mai i a ia te ngakau o nga tangata katoa o Hura; me te mea kotahi ano te tangata, a ka tono tangata mai ratou ki te kingi hei mea, Hoki mai koe, koutou ko o tangata katoa.
- 15
- Na, hoki atu ana te kingi, a ka tae ki Horano. I haere mai ano a Hura ki Kirikara, he haere mai ki te whakatau i te kingi, hei whakawhiti atu i te kingi i Horano.
- 16
- Na, hohoro tonu a Himei Peniamini tama a Kera, tera i Pahurimi, a, haere tahi ana me nga tangata o Hura ki raro ki te whakatau i a Kingi Rawiri.
- 17
- Kotahi mano ano hoki nga tangata o Peniamine hei hoa mona, me Tipa ano hoki tangata o te whare o Haora, ratou tahi ko ana tama kotahi tekau ma rima, me ana pononga e rua tekau; a, whiti atu ana ratou i Horano i mua i te kingi.
- 18
- A, i whiti atu ano he poti whakawhiti hei whakawhiti mo te whare o te kingi, hei mea ano hoki i nga mea e pai ana ki tana whakaaro. Na, ka takoto tapapa iho a Himei tama a Kera ki te aroaro o te kingi, i a ia ka whiti nei i Horano?
- 19
- A ka mea ki te kingi, Kaua toku ariki e whakairi hara ki a au, kaua ano hoki e maharatia te tutu o to pononga i te ra i puta mai ai toku ariki te kingi i Hiruharama; kaua te ngakau o te kingi e mea iho ki taua mea.
- 20
- E mohio ana hoki to pononga, i hara ahau. Koia ahau i haere mai ai inaianei, te tuatahi o te whare katoa o Hohepa, i haere mai ai hoki ki raro ki te whakatau i toku ariki i te kingi.
- 21
- Na, ka oho mai a Apihai te tama a Teruia, ka mea, E kore ianei a Himei e whakamatea mo tenei, mona i kanga i ta Ihowa i whakawahi ai?
- 22
- Ano ra ko Rawiri, Hei aha maku ta korua, e nga tama a Teruia, i mea ai korua ki te totohe ki a au i tenei ra? kia mate koia he tangata i roto i a Iharaira i tenei ra? kahore ianei ahau e mohio he kingi ahau i tenei ra no Iharaira?
- 23
- Na, ka mea te kingi ki a Himei, E kore koe e mate. Na, oati ana te kingi ki a ia.
- 24
- Na, ka haere mai a Mepipohete tama a Haora ki raro ki te whakatau i te kingi. Kihai ona waewae i whakapaia, kihai tona pahau i whakapaia, kihai ano hoki ona kakahu i horoia, no te ra ano i haere atu ai te kingi, a taea noatia te ra i hoki pai mai ai.
- 25
- A, tona taenga mai ki Hiruharama ki te whakatau i te kingi, ka mea te kingi ki a ia, He aha koe tē haere tahi ai tatou, e Mepipohete?
- 26
- Ano ra ko ia, Na taku pononga ahau i tinihanga, e toku ariki, e te kingi; i mea hoki to pononga, Me whakanoho e ahau tetahi kaihe maku, hei ekenga atu maku, ka haere ki te kingi; he kopa hoki to pononga.
- 27
- He whakapae teka tera nana i to pononga ki toku ariki ki te kingi; otiia rite tahi toku ariki te kingi ki te anahera a te Atua: na, mau e mea te mea e pai ana ki tau titiro iho.
- 28
- Kahore mai hoki i te hunga mate te whare katoa o toku pāpā i te aroaro o toku ariki o te kingi, heoi meatia ana e koe to pononga ki roto ki te hunga i kai ki to tepara. Na, he aha ake ra taku, e tika ai tetahi atu karanga maku ki te kingi?
- 29
- Na, ko te meatanga atu a te kingi ki a ia, Hei aha ake o korero i korerotia tonutia ai? Ko taku kupu tenei, Me wehe te mara ma korua ko Tipa.
- 30
- Na, ka mea a Mepipohete ki te kingi, Me tango ano hoki e ia te katoa, he mea hoki kua tae pai mai toku ariki, te kingi ki tona whare.
- 31
- A, i haere mai ano a Paratirai Kireari i Rokerimi, whiti tahi ana raua ko te kingi i Horano, he kawe i a ia ki tenei taha o Horano.
- 32
- Na, he koroheke rawa a Paratirai, e waru tekau ona tau, nana hoki i atawhai te kingi i tona nohoanga ki Mahanaimi; he tangata nui whakaharahara hoki ia.
- 33
- Na, ka mea te kingi ki a Paratirai, Me whiti tahi taua, a, maku koe e atawhai, me noho ki a au ki Hiruharama.
- 34
- Na, ko te meatanga atu a Paratirai ki te kingi, Kia hia ake nga ra hei oranga moku, e haere tahi ai ahau me te kingi ki runga ki Hiruharama?
- 35
- Ka waru tekau oku tau i tenei ra: e mohio ranei ahau he pai tenei he kino tera? e kitea ranei e to pononga te reka o taku kai, o taku ranei e inu ai; e rongo ranei ahau i te reo o nga tane o nga wahine ina waiata? a, kia meinga ano to pononga hei whakararuraru mo toku ariki mo te kingi hei aha?
- 36
- Me haere tahi to pononga me te kingi ki tawahi iti atu o Horano: he aha hoki tenei utu nui i homai ai ki a au e te kingi?
- 37
- Tukua to pononga kia hoki, kia mate ai ahau ki toku pa, kia tanumia ki te urupa o toku pāpā, o toku whaea; engari to pononga a Kimihama, kia whiti tahi ia me toku ariki me te kingi, a mau e mea ki a ia te mea e pai ana ki tau titiro iho.
- 38
- Na, ka mea te kingi, Me whiti tahi maua ko Kimihama, a, maku e mea ki a ia nga mea e pai ana ki tau titiro iho: ka oti ano hoki i a au āu mea katoa e kiia mai e koe ki a au.
- 39
- Na, whiti ana te iwi katoa i Horano. A, i whiti ano te kingi, a kihitia ana a Paratirai a te kingi, manaakitia ana, a, hoki ana tera ki tona wahi.
- 40
- Na, haere tonu ana te kingi ki Kirikara: i haere tahi ano hoki a Kimihama i a ia: na te iwi katoa o Hura, ratou ko te hawhe o te iwi o Iharaira te kingi i kawe.
- 41
- Na, ko te haerenga mai o nga tangata katoa o Iharaira ki te kingi, ka mea ki te kingi, He aha o matou teina, nga tangata o Hura i tahae ai i a koe, i whakawhiti ai hoki i te kingi, ratou tahi ko tona whare katoa, ko nga tangata katoa ano hoki a Rawiri, i Horano?
- 42
- Na, ka whakahokia atu e nga tangata katoa o Hura ki nga tangata o Iharaira, No te mea e tata ana te kingi ki a au: he aha ra koutou i riri ai ki a matou mo tenei mea. I kai ranei matou i tetahi mea a te kingi? i homai ranei e ia tetahi mea ki a matou?
- 43
- Na, ko te whakahokinga mai a nga tangata o Iharaira ki nga tangata o Hura; i mea ratou, Tekau nga wahi o te kingi kei a au, nui atu hoki i tou te wahi i taunga ai ahau ki a Rawiri: a, he aha ahau i whakahaweatia ai e koe? he aha tē waiho ai maku te kupu tuatahi mo te whakahoki i toku kingi. Otiia he tukaha rawa te kupu a nga tangata o Hura i te kupu a nga tangata o Iharaira.
Address: 
Phone: 
Email: