2nd Samuel Chapter 21 - Paipera Tapu 1868 | Te Paipera Tapu 1868

2nd Samuel Chapter 21 - Paipera Tapu 1868

1
Na, ka puta he mate-kai i nga ra o Rawiri, e toru nga tau, to tetahi tau aki tonu iho ki to tetahi tau; a ka rapua te tikanga e Rawiri i te aroaro o Ihowa. Na, ko te meatanga mai a Ihowa, Mo ta Haora ratou ko tona whare whakaheke toto; mona i whakamate i nga Kipeoni.
2
Katahi te kingi ka karanga ki nga Kipeoni, a ka mea ki a ratou, (na, ehara nga Kipeoni i nga tamariki a Iharaira; engari no nga oranga o nga Amori, no era i oati atu ra nga tamariki a Iharaia: na, whaia ana e Haora kia patua, he hae nona, he whakaaro hoki ki nga tamariki a Iharaia ratou ko Hura.)
3
Na, ka mea a Rawiri ki nga Kipeoni, Ko te aha taku e mea ai ki a koutou? he aha hoki taku whakamarietanga e manaakitia ai e koutou te kāinga tupu o Ihowa?
4
Na, ko te meatanga mai a nga Kipeoni ki a ia, Kaua he hiriwa, kaua he koura ma matou i a Haora ratou ko tona whare; kaua ano hoki e whakamatea tetahi tangata o Iharaira hei meatanga māu ki a matou. Ano ra ko ia, Ka meatia e ahau ta koutou e ki mai ai.
5
Katahi ratou ka mea ki te kingi, Te tangata i whakamoti nei i a matou, i whakatakoto whakaaro nei mo matou kia ngaro, kei waiho ki tetahi o nga rohe a Iharaira.
6
Kia tokowhitu nga tangata o roto o ana tama e homai ki a matou, a, ma matou ratou e tarona, hei mea ki a Ihowa ki Kipea o Haora i whiriwhiria nei e Ihowa. Na, ka mea te kingi, Me hoatu e ahau.
7
Otiia i tohungia e te kingi a Mepipohete te tama a Honatana tama a Haora, he whakaaro ki te oati a Ihowa i whakatakotoria e raua, e Rawiri raua ko Honatana tama a Haora.
8
Na, ka mau te kingi ki nga tama tokorua a Ritipa tamahine a Aia i whanau nei i a raua ko Haora, ara, ki a Aramoni raua ko Mepipohete, ki nga tama tokorima ano hoki a Mikara, tamahine a Haora i whanau nei i a raua ko Atariere tama a Paratirai Mohorati:
9
A, hoatu ana ki nga ringa o nga Kipeoni, a, taronatia ana e ratou ki runga ki te pukepuke, i te aroaro o Ihowa: na, hinga ngatahi ana ratou tokowhitu. No nga ra o te kotinga ratou i whakamatea ai, no nga ra tuatahi, i te timatanga o te kotinga parei.
10
Katahi ka mau a Ritipa tamahine a Aia ki te kakahu taratara, a, wharikitia ana hei mea mona ki runga ki te kamaka i te timatanga o te kotinga, a, heke noa he wai no te rangi ki runga ki a ratou, kihai ano hoki i tukua e ia he manu no te rangi kia noho ki runga i te awatea, he kirehe ranei no te parae i te po.
11
A, i korerotia ki a Rawiri taua meatanga a Ritipa tamahine a Aia, wahine iti a Haora.
12
A, i haere ano a Rawiri, a, tikina ana e ia nga wheua o Haora, nga wheua ano hoki o Honatana o tana tama i nga tangata o Iapehe-kireara, na ratou nei hoki aua wheua i tango puku mai i te waharoa o Pete-heana i te wahi i whakairihia ai e nga Pirihitini i te ra i patua ai a Haora e nga Pirihitini ki Kiripoa,
13
A, kawea mai ana e ia i reira nga wheua o Haora, me nga wheua o Honatana o tana tama: i kohia mai ano hoki e ratou nga wheua o te hunga i whakatarea.
14
A, tanumia ana e ratou nga wheua o Haora raua ko Honatana ko tana tama ki te whenua o Peniamine ki Heraha ki te urupa o Kihi o tona pāpā: a ka oti i a ratou nga mea katoa i whakahaua e te kingi, na, muri iho ka marie mai te Atua ki te whenua.
15
Na, ka whawhai ano nga Pirihitini ratou ko Iharaira, a, haere ana a Rawiri, ratou ko ana tangata ki raro, whawhai ana ki nga Pirihitini: otiia ka ruha haere a Rawiri.
16
Na, ko Ihipi-penopo, no nga uri o Rapa, te taimaha o tona tao, e toru rau hekere parahi te taimaha, he mea hou te hoari, whitiki rawa ki a ia; ka mea ia kia patua a Rawiri.
17
Na, pikitia ana ia e Apihai tama a Teruia, a, patua iho te Pirihitini, whakamatea iho. No reira i oati ai nga tangata a Rawiri ki a ia, i mea ai, Kati rawa tou haere tahi tatou ki te whawhai, kei keto i a koe te rama a Iharaira.
18
A, muri iho ka whawhai ano ki nga Pirihitini ki Kopo, a, na Hipekai Huhati i patu a Hape, no nga uri o Rapa.
19
Na, ka whawhai ano nga Pirihitini ki Kopo, a, na Erehanana tama a Iaare-orekimi o Pete-rehema i patu te teina o Koriata o Kata, te kakau o tona taoroa, rite tonu ki te rakau a te kai whatu.
20
A, i whawhai ano ki Kata. Na, ko tetahi tangata roa e ono nei nga maihao o tetahi ringa, o tetahi ringa, e ono ano hoki nga maikara o tetahi waewae, o tetahi waewae e rua tekau ma wha nei te maha, he uri ano hoki ia no Rapa.
21
I tana whakataranga i a Iharaira, na, patua ana ia e Honatana tama a Himea tuakana o Rawiri.
22
He uri enei tokowha no Rapa i Kata, a, hinga ana i te ringa o Rawiri, i te ringa ano hoki o ana tangata.