Acts Chapter 19 - Paipera Tapu 1868 | Te Paipera Tapu 1868

Acts Chapter 19 - Paipera Tapu 1868

1
I a Aporo ano i Koriniti, ka puta atu a Paora na nga wahi o runga, ka haere atu ki Epeha: a tupono atu ko etahi akonga,
2
Ka mea ia ki a ratou, Kua riro mai ranei te Wairua Tapu i a koutou i muri iho i to koutou whakaponotanga? Ano ra ko ratou ki a ia, Kiano matou i rongo noa he Wairua Tapu tenei.
3
Ka mea atu ia ki a ratou, I iriiria oti koutou ki roto ki te aha? Ka mea ratou, Ki roto ki ta Hoani iriiringa.
4
Na, ka mea a Paora, Ta Hoani iriiringa he iriiringa ripeneta, i mea ki te iwi, kia whakapono ratou ki tetahi e haere mai ana i muri i a ia, ara ki a Karaiti Ihu.
5
A ka rongo ratou, ka iriiria i runga i te ingoa o te Ariki o Ihu.
6
Na, ka pakia iho nga ringaringa o Paora ki runga ki a ratou, a ka tae mai te Wairua Tapu ki a ratou; na, ka korerotia e ratou nga reo, a ka poropiti.
7
A tata tonu ki te tekau ma rua aua tāngata katoa.
8
Na, ka tomo atu ia ki te whare karakia, ka korero maia atu, a e toru nga marama i korerorero ai, i kukume mai ai ki nga mea o te rangatiratanga o te Atua.
9
A ka pakeke etahi, ka whakateka, ka whakahawea ki taua ritenga i te aroaro o te mano, ka mawehe atu ia i roto i a ratou, ka wahi ke i nga akonga, ka korerorero i tenei ra i tenei ra i roto i te kura o tetahi tangata, ara o Tairanu.
10
Na, e rua ona tau i penei ai; a ka rongo katoa te hunga e noho ana i Ahia, nga Hurai, nga Kariki, i te kupu a te Ariki a Ihu.
11
Na, ehara i te merekara noa ake a te Atua i mea ai kia meatia e nga ringaringa o Paora.
12
I mauria mai hoki i tona tinana ki te hunga mate nga tauera, me nga aporona, a mutu ake o ratou mate, i puta mai ano hoki nga wairua kino i roto i a ratou.
13
Katahi ka anga etahi o nga Hurai haereere noa, he hunga pei wairua, ka whakahua i te ingoa o te Ariki o Ihu ki runga ki etahi i nga wairua kino, ka mea, He whakahua tenei na matou ki a koutou i a Ihu, i ta Paora e kauwhau nei.
14
Na, i pera ano nga tamariki tokowhitu a Hewa a tetahi Hurai, he tohunga nui ano ia.
15
Na, ko te whakahokinga mai a te wairua kino, ka mea, E mohio ana ahau ki a Ihu, e mohio ana ki a Paora; ko koutou ia, ko wai ra?
16
Na, ko te tupeketanga mai o te tangata, i a ia nei te wairua kino, ki a ratou, kua kaha i a ratou, taea ana ratou e ia, no ka oma tahanga ka oma mamae atu i taua whare.
17
A i mohiotia tenei e nga Hurai katoa, e nga Kariki, e noho ana i Epeha; ka tau te wehi ki a ratou katoa, a whakanuia ana te ingoa o te Ariki o Ihu.
18
A he tokomaha i haere mai o te hunga whakapono, i whaki, i whakakite i a ratou mahi.
19
He tokomaha ano hoki o te hunga i mahi i nga mahi tinihanga, i huihui mai i a ratou pukapuka, a tahuna ana ki te aroaro o te katoa: a ka tāua nga utu o aua pukapuka, ka kitea e rima tekau mano hiriwa.
20
Koia ano te nui o te tupu o te kupu a te Atua, ka kaha.
21
Ano ka rite enei mea, ka mea a Paora i roto i tona wairua, kia tika na Makeronia, na Akaia, kia haere ki Hiruharama; i mea ia, Ka tae atu ahau ki reira, ko Roma ano hoki taku e tiki ai e titiro.
22
A tokorua āna i tono atu ai ki Makeronia o te hunga e mahi ana ki a ia, ko Timoti raua ko Eratu; ko ia hoki, he roaroa iho tana noho ki Ahia.
23
A i taua wa kihai i nohinohi te ngangau i puta ake i taua tikanga.
24
Ko tetahi tangata hoki ko Rimitiriu te ingoa, he kai mahi hiriwa, nāna nei i hanga nga temepara hiriwa o Riana, a kihai i nohinohi nga utu i tika mai i tana mahi ki nga kai hanga;
25
Na, ka whakaminea ratou e ia me era kai mahi o nga pera, a ka mea atu, E mara ma, e mātau ana koutou, na tenei mahi a tatou rawa.
26
Na, e kite ana, e rongo ana koutou, ehara i te mea ko Epeha anake, engari he iti te wahi o Ahia katoa kua mahue atu nei i tenei Paora te kukume, te whakapeau ke i te tini o te tangata, e mea ana ia, Ehara enei i te Atua, e hangā nei e te ringa:
27
Na, ehara i te mea ko ta tatou nei wahi anake ka tata te kore noa iho; tera e whakakahoretia te temepara o to atua nui o Riana, a meake memeha noa iho tona nui, e karakiatia nei e Ahia katoa e te ao ano hoki.
28
Na, to ratou rongonga ai ka kī i te riri, ka karanga ake, ka mea, He nui a Riana, o nga Epehi.
29
Na, ka tutū te puehu o te pa katoa: a ka hopukia e ratou a Kaiu raua ko Aritaku, he hunga no Makeronia, he hoa haere no Paora, a kokiri ngatahi ana ki te whare matakitaki.
30
A i a Paora e mea ana kia tomo atu ki roto ki te iwi, kihai ia i tukua e nga akonga.
31
Na, ka unga tangata atu etahi o nga rangatira o Ahia, i pai nei ki a ia, ka mea atu kia kaua ia e tuku atu i a ia ki roto ki te whare matakitaki.
32
Heoi puta ke te karanga a etahi a etahi: raruraru ke hoki taua whakaminenga; te nuinga kihai i mātau ki te mea i huihui ai ratou.
33
Na, ka akiakina atu a Arehanera i roto i te tini, na nga Hurai ia i mea kia whakatika. A tawhiri ana te ringa o Arehanera, i mea hoki kia korerotia e ia te tikanga ki te iwi.
34
Heoi ka mātau ratou he Hurai ia, kotahi tonu te reo o te katoa ki te karanga, (a tata noa ki te rua o nga haora,) E nui ana a Riana o nga Epehi.
35
A ka marire iho te huihui i te kai whakarite, ka mea ia, E nga Epehi, ko wai te tangata e kore e mohiotia e ia ko te pa o nga Epehi te kai tiaki temepara o te atua nui o Riana, o te whakapakoko ano hoki i taka iho i a Hupita?
36
Na, ka kore nei enei mea e taea te whakorekore, erangi kia ata noho koutou, kaua hoki e hikaka te mahi.
37
Kua arahina mai nei hoki e koutou enei tāngata, ehara nei i te hunga tahae mea tapu, ehara ano hoki i te hunga kohukohu ki to koutou atua.
38
Na, ki te mea he kupu ta Rimitiriu ratou ko ona hoa mahi mo tetahi tangata, e taea te whakawa, tenei ano hoki nga kawana: ma ratou ano ratou e whakawa.
39
Na, ki te mea he mea ke ta koutou e whai na, waiho ma te runanga tika te ritenga.
40
Ko wai hoki ka tohu tera pea tatou e whakawakia mo tenei ngangautanga o naianei, kahore hoki he take e tika ai ta tatou korero mo tenei huihui.
41
Ano ka puaki enei kupu āna, ka tonoa atu e ia te whakaminenga.