Acts Chapter 20 - Paipera Tapu 1868 | Te Paipera Tapu 1868

Acts Chapter 20 - Paipera Tapu 1868

1
Te mutunga o te ngangau, ka karangatia e Paora nga akonga, ka awhitia, a turia atu ana e ia haere ana ki Makeronia.
2
A ka haereerea e ia aua wahi, a ka maha ana kupu i whakahau ai i a ratou, haere ana ia ki Kariki;
3
A ka toru ona marama ki reira. I nga Hurai ano e whakatakoto whakaaro ana mona, i a ia meake rere ki Hiria, ka mea ia kia hoki ma Makeronia.
4
A i haere tahi ano i a ia a tae noa ki Ahia, a Hopate o Peria; a Aritaku raua ko Hekunu o Teharonika; a Kaiu o Rerepe, a Timoti; ratou ko Tikiku ko Toropimu o Ahia.
5
I haere enei i mua ki Toroa tatari ai i a matou.
6
Na, i te mutunga o nga ra o te taro rewena-kore ka rere atu matou i Piripai, a po rima ka tae atu ki a ratou ki Toroa; a e whitu nga ra i noho ai ki reira.
7
Na, i te ra tuatahi o te wiki, i te mea kua huihui nga akonga ki te whawhati taro, ka kauwhau a Paora ki a ratou, e mea ana hoki ki te haere i te aonga ake; a ka kumea roatia tana korero ā waenganui po ra ano.
8
Heoi he maha nga rama i te ruma i runga i te wahi i huihui ai ratou.
9
A i te matapihi e noho ana tetahi taitamariki, ko Utiku te ingoa, na, au tonu te moe i parangia ai ia: a ka roa tonu nei te kauwhau a Paora, na, ka pehia rawatia ia e te moe, a taka iho i te toru o nga whakapaparanga o nga ruma, tangohia rawatia ake kua mate.
10
Na, ka heke iho a Paora, a hinga ana ki runga ki a ia, awhi ana i a ia, ka mea, Kei ngangau koutou; kei roto hoki i a ia tona wairua.
11
Na, ka kake atu ano ia, ka whawhati taro, ka kai, a ka roa rawa te korerotanga a puao noa, ka haere.
12
Heoi arahina oratia atu ana e ratou taua taitamariki, kihai hoki i nohinohi te kao.
13
Na, ko matou kua riro i mua ki te kaipuke, a rere ana ki Aho, i mea kia utaina a Paora i reira: nāna hoki i whakarite, i mea ia kia ra uta.
14
A ka tutaki ki a matou ki Aho, ka utaina ia, a rere ana matou ki Mitirini.
15
Rere atu ana matou i reira, i te aonga ake ka taea te ritenga atu o Kio; ao ake ana ka u ki Hamo, a noho ana ki Torokiriuma; ao ake ano ka u ki Miretu.
16
I mea hoki a Paora kia rere i waho ake o Epeha, kei roa ia ki Ahia: i porangi hoki me kore e rokohanga atu ia e te ra o te Petekoha ki Hiruharama.
17
Na, ka tono tangata atu ia i Miretu ki Epeha, hei tiki i nga kaumatua o te hahi.
18
A, to ratou taenga mai ki a ia, ka mea ia ki a ratou, E mahara ana koutou ki taku tikanga i roto i a koutou i nga ra katoa, no te ra tuatahi iho ano o toku taenga mai ki Ahia,
19
Papaku noa iho te ngakau i mahi ai ahau ki te Ariki, he maha ia nga roimata, me nga whakamatautauranga i pa mai ki a au, i nga Hurai e whakatakoto whakaaro ana moku:
20
Kihai i puritia e ahau tetahi o nga mea pai, i whakakitea atu ano ki a koutou, i akona nuitia ki a koutou, i tenei whare hoki i tenei whare,
21
I kauwhautia hoki ki nga Hurai, ki nga Kariki, te ripeneta whaka-te-Atua, me te whakapono ki to tatou Ariki, ki a Ihu Karaiti.
22
Na, tenei ahau te haere nei ki Hiruharama, he hereherenga na te Wairua, kahore hoki e mohio ki nga mea e pa ki a au i reira:
23
Heoi ano ko te Wairua Tapu e whakaatu mai nei i tenei pa i tenei pa, e mea ana, e taria mai ana ahau e nga mekameka e nga mate.
24
Otiia kahore aku whakaaro ki tetahi o enei mea, e kore ano hoki ahau e ihupuku ki te ora, engari kia koa ahau ina taea taku e whai nei, me te mahi i homai ki a au e te Ariki e Ihu, ara kia whakaaturia te rongo pai o te aroha noa o te Atua.
25
Na, e mohio ana tenei ahau, heoi ano kitenga o toku mata e tetahi o koutou, e te hunga i kauwhau haere nei ahau i te rangatiratanga o te Atua i roto i a koutou.
26
Koia ahau ka mea nei ki a koutou aianei, Kahore oku poke i nga toto o tetahi tangata.
27
Kihai hoki ahau i manawapa ki te kauwhau i te whakaaro katoa a te Atua ki a koutou.
28
Na, kia tupato ki a koutou, ki te kahui katoa ano hoki i meinga ai koutou e te Wairua Tapu hei kai tirotiro, whangaia te hahi a te Atua, i hokona nei e ia ki ona ake toto.
29
E mohio ana hoki ahau ki tenei, ka riro ahau, tera e puta mai ki a koutou nga wuruhi nanakia, e kore nei e tohu i te kahui.
30
A ka whakatika ano etahi tāngata i roto i a koutou, hei korero i nga mea parori ke, kukume ai i nga akonga hei whai i a ratou.
31
Na, kia mataara, kia mahara ano ki nga tau e toru, kihai nei ahau i mangere i te po i te ao ki te whakatupato i tenei i tenei o koutou, me te tangi ano ahau.
32
Na, tenei ahau, e aku teina, te tuku atu nei i a koutou ki te Atua, ki te kupu hoki o tona aroha noa, e kaha nei ki te whakatupu ake, ki te hoatu hoki i tetahi wahi ki a koutou i roto i te hunga katoa kua oti te whakatapu.
33
Kihai i hiahiatia e ahau te hiriwa, te koura, te kakahu ranei, o tetahi.
34
E mohio ana ano koutou, na enei ringaringa i mahi nga mea i matea e ahau, e oku hoa.
35
I whakakite atu ahau i nga mea katoa ki a koutou, kia penei ano te mahi te atawhai i te hunga ngoikore, kia mahara hoki ki nga kupu a te Ariki a Ihu, ki tana i mea ai, Te whakawhiwhi, nui atu te hari i to te whiwhi.
36
Te mutunga o enei kupu, ka tukua ona turi ki raro, ka inoi tahi ia me ratou katoa.
37
He nui ano hoki te tangi o te katoa, hinga iho ratou ki runga ki te kakī o Paora, ka kihi i a ia;
38
I tino mamae pu hoki ratou i te kupu i mea ai ia, heoi ano to ratou kitenga i tona mata. Na, ka arahi ratou i a ia ki te kaipuke.