Acts Chapter 9 - Paipera Tapu 1868 | Te Paipera Tapu 1868

Acts Chapter 9 - Paipera Tapu 1868

1
Ko haora ia, he whakawehi tonu, he patu ta tona ngakau mo nga akonga a te Ariki, a haere ana ki te tohunga nui;
2
Kei te tono pukapuka i a ia ki nga whakaminenga i Ramahiku, mo te tutaki rawa ake ki etahi tāngata e anga penei ana, nga tāne, nga wāhine; ka herea e ia, ka kawea ki Hiruharama.
3
I a ia ano e haere ana, a ka whakatata ki Ramahiku; na, whiti whakarere mai ana ki a ia he māramatanga no te rangi:
4
Hinga ana ia ki te whenua, ka rongo i tetahi reo e mea ana ki a ia, E Haora, e Haora, he aha tau e whakatoi nei i a au?
5
Ano ra ko ia, Ko wai koe, e te Ariki? Ka mea atu te Ariki, Ko Ihu ahau, e whakatoia nei e koe: ehara tau, te whana ki nga koikoi.
6
Na, wiri ana ia, ihiihi ana, ka mea, E te Ariki, kia aha ahau? Ano ra ko te Ariki ki a ia, Whakatika, tomo atu ki te pa, a ka korerotia ki a koe tau e mea ai.
7
Na, nga tāngata i haere tahi na ia, tu reo kore ana ratou, rongo kau ana ki te reo, kahore i kitea he tangata.
8
A, te whakatikanga ake o Haora i te whenua, te mawheratanga o ona kanohi, hore rawa ana tāngata i kite ai: na, ka arahina ringaringatia ia, a kawea ana ki Ramahiku.
9
A e toru ona ra kihai ia i kite, kihai i kai, kihai i inu.
10
Na, i Ramahiku tetahi akonga, ko Anania te ingoa; a ka puta mai te Ariki, ka mea ki a ia, E Anania. A ka mea tera, Tenei ahau, e te Ariki.
11
Ano ra ko te Ariki ki a ia, Whakatika, haere ki te ara e karangatia nei ko te Tika, ka rapu i roto i te whare o Hura ki tetahi tangata ko Haora te ingoa, no Tarahu: kei te inoi hoki ia,
12
A kua kite moemoea i tetahi tangata, ko Anania te ingoa, e tomo mai ana, e whakapa ana i tona ringaringa ki a ia, kia kite ai.
13
Na, ko te whakahokinga mai a Anania, E te Ariki, he tokomaha aku i rongo ai ki tenei tangata, ki te nui o ana kino i mea ai ki tou hunga tapu i Hiruharama:
14
A tenei ano kei a ia he tikanga i nga tohunga nui, kia herea katoatia te hunga e karanga ana ki tou ingoa.
15
Heoi ka mea atu te Ariki ki a ia, Haere: he mea whiriwhiringa ia naku, hei mau mo toku ingoa ki te aroaro o nga tauiwi, o nga kingi, o nga tamariki a Iharaira:
16
Ka whakakitea atu hoki e ahau ki a ia nga mea nui e mamae ai ia mo toku ingoa.
17
Na, haere ana a Anania, tomo ana ki roto ki te whare; ka whakapa i ona ringaringa ki a ia, ka mea, E taku teina, e Haora, na te Ariki na Ihu i puta ra ki a koe i te ara i haere mai na koe, nāna ahau i tono mai, kia kite ai koe, kia kī ai hoki i te Wairua Tapu.
18
Na, marere tonu iho etahi mea, ano he unahi, i ona kanohi, a kite tonu ake ia, ka whakatika, ka iriiria.
19
Na, ka kai ia, ka whai kaha. Na, noho ana a Haora ki nga akonga i Ramahiku i etahi ra.
20
A kauwhautia tonutia atu e ia a te Karaiti i roto i nga whare karakia, ko ia te Tama a te Atua.
21
A miharo tonu te hunga katoa i rongo, ka mea, Ehara ianei tenei i te kai whakangaro o te hunga i karanga ki tenei ingoa i Hiruharama, a ko te mea ano tenei i haere mai ai ia, kia herea ratou, kia arahina ki nga tohunga nui?
22
Heoi ka kaha haere a Haora, a whakapororarutia ana e ia nga Hurai e noho ana i Ramahiku, i a ia e whakakite ana ko te Karaiti ano tenei.
23
A ka maha nga ra ka pahure, ka runanga nga Hurai kia whakamatea ia:
24
Heoi i mātau ano a Haora ki to ratou whakapapanga mona. A whanga tonu ratou ki nga tatau i te ao i te po, kia whakamatea ia.
25
Na, ka mau nga akonga ki a ia i te po, a tukua iho ana e ratou, ra te taiepa i roto i te kete.
26
A, te taenga atu o Haora ki Hiruharama, ka whai kia uru ki roto ki nga akonga: otiia i wehi katoa ratou i a ia, kihai i whakapono he akonga ia.
27
Na, ka tango a Panapa i a ia, a arahina ana ki nga apotoro, a korerotia ana e ia ki a ratou tona kitenga i te Ariki i te ara, tana korerotanga hoki ki a ia, tona maia hoki ki te kauwhau i Ramahiku i runga i te ingoa o Ihu.
28
Na, ka noho ia i a ratou, haereere atu ana haereere mai ana i Hiruharama.
29
A maia rawa ia te kauwhau i runga i te ingoa o te Ariki o Ihu, korero ana totohe ana ki nga tāngata whaka-Kariki: otiia ka whakangakau ratou kia whakamatea ia.
30
A ka mohio nga tuakana, ka arahina ia ki raro ki Hiharia, a tonoa ana ki Tarahu.
31
Na, ka whai taanga manawa nga hahi, puta noa i Huria, i Kariri, i Hamaria, tupu ana te whakaaro; a haere ana i runga i te wehi o te Ariki, i te whakamarietanga ano hoki a te Wairua Tapu, ka whakatokomahatia.
32
A i a Pita e haereere ana ki nga kāinga katoa, ka haere ki raro ki nga tāngata tapu e noho ana i Raira.
33
A ka kitea i reira tetahi tangata, ko Ainia te ingoa, e waru ona tau i takoto ai i runga i te moenga, he pararutiki.
34
Na, ko te meatanga atu a Pita ki a ia, E Ainia, ka ora koe i a Ihu Karaiti: whakatika, wharikitia tou moenga. Na, whakatika tonu ake ia.
35
A i kite katoa i a ia te hunga e noho ana i Raira, i Harona, a tahuri ana ki te Ariki.
36
Na, i Hopa ano tetahi akonga e noho ana, ko Tapita te ingoa, te whakamaoritanga, ko Roka: he mahi tonu ta taua wahine i nga mahi pai, he atawhai rawa-kore.
37
A i aua ra, ka turorotia ia, ka mate rawa: a ka oti ia te horoi e ratou, ka whakatakotoria ki to runga ruma.
38
Na, e tata ana Raira ki Hopa, a, te rongonga o nga akonga, kei reira a Pita, ka tonoa atu e ratou tokorua nga tāngata ki a ia hei mea, kia kaua ia e whakaroa atu ki te haere mai ki a ratou.
39
Na, whakatika ana a Pita, haere tahi ana ratou. Tona taenga mai, ka arahina ki te ruma i runga: a i tona taha e tu ana nga pouaru katoa, e tangi ana, e whakakite ana i nga koti i nga kakahu i hangā e Roka, i a ia e noho ana i a ratou.
40
Na, ka tonoa atu ratou katoa e Pita ki waho, ka tukua ona turi, ka inoi; na, tahuri ana ia ki te tupapaku, ka mea, E Tapita, e ara. Na, ka titiro ona kanohi: a ka kite i a Pita, ka noho ki runga.
41
Na, hoatu ana e ia tona ringa ki a ia, whakaarahia ana e ia, a ka oti te karanga i nga tāngata tapu me nga pouaru, hoatu ora ana i a ia.
42
A ka rangona tenei puta noa i Hopa; he tokomaha hoki i whakapono ki te Ariki.
43
A he maha ona ra i noho ai ia ki Hopa, ki a Haimona kai mahi hiako.