Amos Chapter 3 - Paipera Tapu 1868 | Te Paipera Tapu 1868

Amos Chapter 3 - Paipera Tapu 1868

1
Whakarongo ki tenei kupu i korerotia e Ihowa mo koutou, e nga tamariki a Iharaira, mo te hapu katoa i kawea mai e ahau i te whenua o Ihipa, kua ki mai ia,
2
Ko koutou anake taku i mohio ai o nga hapu katoa o te ao: mo reira ka whiua koutou e ahau mo o koutou he katoa.
3
E haere tahi ano ranei te tokorua, ki te kore e whakaae ki a raua?
4
E hamama ranei te raiona i te ngahere i te mea kahore ana tupapaku? e puaki ranei te reo o te kuao raiona i tona kuhunga, ki te kore tetahi mea e mau i a ia?
5
E taka ranei te manu ki roto ki te mahanga i runga i te whenua i te mea kahore he ahere mona? e tangohia ake ranei e tetahi te mahanga i runga i te oneone, a hore rawa he mea e mau?
6
E tangi ranei te tētere ki te pa, a kahore te iwi e wehi? e puta ake ranei he kino i roto i te pa, a ehara i a Ihowa nana i mahi?
7
He pono e kore te Ariki a Ihowa e mahi noa iho i tetahi mea; engari ka whakakitea e ia tana whakaaro puku ki ana pononga, ki nga poropiti.
8
Kua hamama te raiona, ko wai e kore e wehi? kua korero a Ihowa te Ariki, ko wai e kore e poropiti?
9
Karanga nui atu i roto i nga whare kingi o Aharoro, i roto i nga whare kingi o te whenua o Ihipa, mea atu, Huihui koutou ki runga ki nga maunga o Hamaria, ka matakitaki ai ki nga ngangau nui i waenga o reira, ki nga tukinotanga ano hoki i waenga o reira.
10
Kahore nei hoki ratou e mohio ki te mahi i te tika, e ai ta Ihowa, e rongoatia ana hoki e ratou te mahi tutū me te pahua ki roto ki o ratou whare kingi.
11
Mo reira ko te kupu tenei a te Ariki a Ihowa, He hoa riri! ka karapotia ano hoki e ia te whenua, ka riro iho ano hoki i a ia tou kaha, a ka pahuatia o whare kingi.
12
Ko te kupu tenei a Ihowa, Ka rite ki ta te hepara tangohanga mai i nga waewae e rua i roto i te mangai o te raiona, i tetahi wahi ranei o te taringa, ka pena ano te tangohanga mai o nga tamariki a Iharaira e noho ana i Hamaria i te pito o te moenga, i Ramahiku ano hoki i te takotoranga.
13
Whakarongo, whakaaturia ano hoki e koutou i roto te whare o Hakopa, e ai ta te Ariki ta Ihowa, ta te Atua o nga mano.
14
Na, te ra e pa atu ai taku ki a Iharaira mo ana pokanga ketanga, ka pa atu ano taku ki nga aata o Pete-ere, a ka poutoa atu nga haona o te aata, ka taka atu ki te whenua.
15
Ka patua ano hoki e ahau te whare hotoke me te whare raumati, ka whakakahoretia ano hoki nga whare rei, ka whai mutunga ano hoki nga whare nui, e ai ta Ihowa.