- 1
- E nga rangatira, hoatu ki nga pononga te mea e tika ana, te mea e rite ana; e mohio ana hoki koutou he Rangatira to koutou kei te rangi.
- 2
- Kia u ki te inoi, kia mataara tonu ki taua mea i runga i te whakawhetai;
- 3
- Me te inoi ano mo matou, kia whakapuaretia e te Atua he kuwaha korero ki a matou, hei korerotanga no te mea ngaro a te Karaiti, i hereherea nei ahau:
- 4
- Kia whakakitea atu e au, kia rite taku korero ki te mea i tika.
- 5
- Hei runga i te whakaaro mohio ta koutou whakahaere ki te hunga o waho, hokona te taima.
- 6
- Hei runga i te aroha noa ta koutou korero i nga wa katoa, he mea kinaki ki te tote, kia mātau ai koutou ki te tikanga mo te whakahoki kupu atu ki tenei tangata ki tenei tangata.
- 7
- Ma Tikiku e whakakite aku mea katoa ki a koutou; he teina aroha ia, he minita pono, he hoa pononga i roto i te Ariki:
- 8
- Ko te mea pu ano tenei i tonoa atu ai ia e ahau ki a koutou, kia mātau ai ia ki a koutou mea, hei whakamarie ano i o koutou ngakau;
- 9
- Tona hoa ko Onehimu, he teina pono, e arohaina ana, no koutou ano hoki. Ma raua e whakakite ki a koutou nga mea katoa o konei.
- 10
- He oha atu tenei ki a koutou na Aritaku, na toku hoa herehere, raua ko Maku iramutu o Panapa; (kua tae atu na hoki nga tikanga mona ki a koutou; ki te tae atu ia ki a koutou, kei a koutou he tukunga atu mona);
- 11
- Me Ihu ano hoki, tetahi ingoa ona ko Hutuha; no te kotinga ratou. Ko enei anake oku hoa mahi ki te rangatiratanga o te Atua, he oranga ngakau ano ratou ki a au.
- 12
- Tenei te oha atu ki a koutou a Epapara; no koutou ia, he pononga na te Karaiti, tohe tonu ia ki te inoi mo koutou, kia tu koutou he hunga tino tika, kī tonu i ta te Atua katoa i pai ai.
- 13
- Whakaae tonu atu au ki te nui o tona ngakau mo koutou, mo te hunga hoki i Raorikia, mo te hunga hoki i Hierapori.
- 14
- Tenei te oha atu nei ki a koutou a Ruka te rata aroha, raua ko Rimaha.
- 15
- Oha atu ki nga teina i Raorikia, ki a Naimapa hoki, te hahi ano hoki i tona whare.
- 16
- A ka korerotia tenei pukapuka ki a koutou, meinga kia korerotia ano hoki i roto i te hahi o nga Raorikia; korerotia ano hoki e koutou tera i Raorikia.
- 17
- Mea atu hoki ki a Arakipu, Kia mahara ki te mahi minita kua riro nei i a koe i roto i te Ariki, kia ata mahia marietia.
- 18
- Te ohatanga nei a Paora na toku ringaringa ake. Kia mahara ki oku mekameka. Kia tau te aroha noa ki a koutou. Amine.
Address: 
Phone: 
Email: