- 1
- I te toru o nga tau o Hairuha kingi o Pahia, i whakakitea mai he mea ki a Raniera, nona nei te ingoa i karangatia, ko Peretehatara, tika tonu ano te kupu, he roa ia te mea i whakaritea: i mātauria ano e ia te mea, i mātauria ano hoki te mea i puta mai.
- 2
- I aua rangi i te tangi ahau a Raniera, e toru nga tino wiki.
- 3
- Kihai tetahi kai e minaminatia ana i kainga e ahau, kihai ano te kikokiko, te waina ranei, i tapoko ki roto ki toku mangai, kihai rawa ano hoki ahau i whakawahi i a au, a taka noa nga tino wiki e toru.
- 4
- Na, i te rua tekau ma wha o nga ra o te marama tuatahi i te taha ahau o te awa nui, ara, o Hirekere;
- 5
- Na, te anganga ake o oku kanohi, ka kite ahau, na, ko tetahi tangata he kakahu rinena tona, tona hope he mea whitiki ki te koura para-kore no Upuhata:
- 6
- Tona tinana rite tonu ki te perira, tona mata rite tonu ki te ahua o te uira, ona kanohi kei nga rama ahi te rite, ona ringaringa, ona waewae, rite tonu te kara ki to te parahi kua oti te whakakanapa, te reo o ana kupu, ano ko te reo o te mano.
- 7
- Ko ahau anake ko Raniera i kite i te mea i puta mai ra: kihai hoki oku hoa i kite i te mea i puta mai; engari i tau te wiri nui ki runga ki a ratou, a rere ana ratou ki te piri.
- 8
- A, mahue iho ko ahau anake. Na ka kite ahau i tenei mea nui; kihai ano hoki i mahue tetahi kaha i roto i a au: i puta ke hoki toku ataahua, kore iho, kahore hoki he kaha i mau i a au.
- 9
- I rongo ano ia ahau i te reo o ana kupu: a, i taku rongonga ai i te reo o ana kupu, na, i te moe ahau, au tonu, me taku tapapa ano, toku mata anga tonu ki te whenua.
- 10
- Na, kua pa tetahi ringaringa ki a au, a whakaarahia ana ahau ki runga ki oku turi, ki runga ano i nga kapu o oku ringaringa.
- 11
- Na, ko tana meatanga mai ki a au, E Raniera, e te tangata e arohaina nuitia ana, kia mohio koe ki nga kupu ka korerotia atu nei e ahau ki a koe, e tu ano ki runga, kua ungā mai hoki ahau inaianei ki a koe. Na, i tana korerotanga mai i tenei kupu ki a au, ka tu au, wiri tonu ano ahau.
- 12
- Katahi tera ka ki mai ki a au, Kaua e wehi, e Raniera, no te mea no te rangi tuatahi ano i anga ai te ngakau ki te mātau, ki te whakawhiu ano hoki i a koe ki te aroaro o tou Atua, i rangona ai o kupu, na o kupu ano hoki ahau i haere mai ai.
- 13
- Otiia i turia mai ahau e te rangatira o nga kingitanga o Pahia, e rua tekau ma tahi nga ra, na, kua tae mai a Mikaera tetahi o nga tino rangatira hei awhina moku, a noho ana ahau i reira i nga kingi o Pahia.
- 14
- Na, kua tae mai nei ahau kia mātau ai koe ki nga mea e pa ki tou iwi i nga ra whakamutunga: mo a nga rangi hoki e takoto ake nei te mea i puta mai ra.
- 15
- Na, i a ia e korero mai ana i enei kupu ki a au, ka anga atu toku mata ki te whenua, kahore hoki aku kupu.
- 16
- Na, kua pa mai tetahi ki oku ngutu, tona ahau kei to nga tama a te tangata: katahi ka puaki toku mangai, a ka korero ahau, ka mea ki tera i tu ki toku aroaro, E toku ariki, kua tahuri oku pouritanga ngakau ki a au: na te mea hoki i puta mai ra, kahore hoki he kaha e mau ana i roto i a au.
- 17
- Ma te aha hoki e ahei ai i te pononga a tenei ariki oku te korero ki tenei ariki oku? ko au nei hoki, kore tonu iho he maunga o te kaha i roto i a au, kihai ano i mahue he manawa i roto i a au.
- 18
- Na, kua pa mai ano tetahi ki a au, tona ahua rite tonu ki to te tangata, a whakakahangia ana ahau e ia.
- 19
- I mea mai ano ia, Kaua e wehi e te tangata e arohaina nuitia ana, ka mau te rongo ki a koe, kia kaha, ae ra, kia kaha. Na, i a ia e korero ana ki a au, kua kaha ahau. Na, ko taku meatanga ake, Kia korero mai toku ariki; kua oti nei hoki ahau te whakakaha e koe.
- 20
- Katahi tera ka ki mai, E mohio ana ranei koe ki te mea i haere mai ai ahau ki a koe? na, akuanei ahau hoki atu ai ki te whawhai ki te rangatira o Pahia. Ka puta atu ahau, na, ka haere mai te rangatira o Kariki.
- 21
- Me whakaatu atu ano ia e ahau ki a koe te mea i tuhituhia ki te karaipiture pono: kahore hoki tetahi e whakakaha ana i a ia ano hei hoa moku ki enei mea, ko to koutou rangatira anake ko Mikaera.
Address: 
Phone: 
Email: