- 1
- I reira ano ka korero ai a Ihowa ki a au, Haua mai e koe kia rua nga papa kohatu, kia rite ki o te timatanga, ka haere ake ai ki a au ki te maunga, hangā hoki e koe he aaka rakau:
- 2
- A, maku e tuhituhi ki nga papa nga kupu o nga papa o mua, i wahia ra e koe, a me hoatu e koe ki roto ki te aaka.
- 3
- Na, hangā ana e ahau he aaka, he hitimi te rakau, taraia ana hoki e ahau nga papa kohatu e rua, rite tonu ki o mua, na ka piki au ki te maunga me nga papa e mau i toku ringa.
- 4
- Na, ka tuhituhi ia ki nga papa, rite tonu ki to mua tuhituhinga, i nga ture kotahi tekau i korerotia mai e Ihowa ki a koutou i te maunga i waenganui o te ahi, i te ra o te huihuinga; a homai ana e Ihowa ki a au.
- 5
- Na, ka tahuri ahau, a heke iho ana i te maunga, a whaowhina ana nga papa ki roto ki te aaka i hanga e ahau, a kei reira ano ena mea, rite rawa ki ta Ihowa i ako mai ai ki a au.
- 6
- Na, ha haere atu nga tamariki a Iharaira i Peerota i to nga tamariki a Iakana, a, Mohera: a ka mate a Arona ki reira, a tanumia iho ki reira; na, ko tana tamaiti ko Ereatara te tohunga i muri i a ia.
- 7
- I haere atu ratou i reira, a, Kurekora; i Kurekora hoki, a, Iotopata, he whenua awa wai tena.
- 8
- I taua wa ano ka wehea mai e Ihowa te iwi o Riwai hei amo i te aaka o te kawenata o Ihowa, hei tu ki te aroaro o Ihowa, hei minita ki a ia, hei manaaki hoki i runga i tona ingoa, a, mohoa noa nei.
- 9
- No reira i kore ai tetahi wahi mo Riwai, me tetahi kāinga tuturu i roto i ona tuakana, i ona teina: ko tona kāinga tuturu ko Ihowa, e rite tonu ana ki to Ihowa ki ta tou Atua i korero ai ki a ia.
- 10
- A i noho ano ahau i te maunga, rite tahi ki nga rangi o mua, e wha tekau nga ra, e wha tekau hoki nga po; a i rongo mai ano a Ihowa ki a au i reira, kihai ano hoki a Ihowa i aro ki te whakamate i a koe.
- 11
- A ka mea mai a Ihowa ki a au, Whakatika, haere atu i to huarahi mua i te iwi, kia haere hoki ratou ki te tango i te whenua, i oati ai ahau ki o ratou matua kia hoatu ki a ratou.
- 12
- Na, he aha, e Iharaira, ta Ihowa to tou Atua e mea nei i a koe? Ehara oti i te wehi i a Ihowa i tou Atua, i te haere i ana haerenga katoa, i te aroha hoki ki a ia, i te mahi ano hoki ki a Ihowa ki tou Atua i runga i tou ngakau katoa, i runga ano hoki i tou wairua katoa,
- 13
- I te pupuri hoki i nga whakahaunga a Ihowa, me ana tikanga e whakahaua atu nei e ahau i tenei ra ki a koe hei pai mou?
- 14
- Nana, no Ihowa no tou Atua te rangi, me te rangi o nga rangi, te whenua me ona mea katoa.
- 15
- He ahakoa ra i ahuareka mai a Ihowa ki ou matua, i aroha ki a ratou, a ko o ratou uri i muri i a ratou, ara, koutou tana i whiriwhiri ai o nga iwi katoa; koia ano tenei inaianei.
- 16
- Kotia ra e koutou te kiri matamata o o koutou ngakau, kaua hoki e whakamarokia ano o koutou kaki.
- 17
- Ta te mea, ko Ihowa ko tou Atua ko ia te Atua o nga atua, me te Ariki o nga ariki, he Atua nui ia, he kaha, e wehingia ana, e kore nei e whakapai kanohi, e kore ano hoki e tango i te moni whakapati.
- 18
- E whakahaere ana i te tikanga mo te pani, mo te pouaru, e aroha ana ki te manene, e hoatu ana hoki i te taro i te kakahu ki a ia.
- 19
- Kia aroha ano koutou ki te manene; he manene hoki koutou i mua i te whenua o Ihipa.
- 20
- Ko Ihowa ko tou Atua tau e wehi ai, me mahi ano e koe ki a ia, me awhi atu ki a ia, me waiho ano hoki tona ingoa hei oati.
- 21
- Ko ia tau e whakamoemiti ai, ko ia hoki tou Atua, i mahi nei i enei mea nui mou, i enei mea whakawehi, i kite ra ou kanohi.
- 22
- Ko o mātua i heke atu ra ki Ihipa, e whitu tekau nga tangata, na, inaianei ka oti koe te mea e Ihowa e tou Atua kia rite ki nga whetu o te rangi te hira.
Address: 
Phone: 
Email: