Deuteronomy Chapter 11 - Paipera Tapu 1868 | Te Paipera Tapu 1868

Deuteronomy Chapter 11 - Paipera Tapu 1868

1
Mo reira kia aroha koe ki a Ihowa ki tou Atua, kia mau hoki ki ana whakatupatoranga, me ana tikanga, me ana whakariteritenga, me ana whakahaunga, i nga ra katoa.
2
A kia mohio koutou i tenei ra: hāunga ra a koutou tamariki, kahore hoki ratou i mohio, kahore ano hoki i kite i te whakawhiunga a Ihowa a to koutou Atua, i tona nui, i tona ringaringa kaha, me tona tākakau kua oti te whakamaro.
3
I ana merekara hoki, me ana mahi i meatia e ia i waenganui o Ihipa ki a Parao ki te kingi o Ihipa, ki tona whenua katoa hoki:
4
I tana hoki i mea ai ki te ope o Ihipa, ki o ratou hoiho, ki a ratou hariata; i a ia i mea ra i nga wai o te Moana Whero kia huri ki runga ki a ratou i to ratou whainga mai i a koutou, a hunā iho ratou e Ihowa, a, mohoa noa nei;
5
I nga mea hoki i mea ai ia ki a koutou i te koraha, a tae noa mai koutou ki tenei wahi;
6
I tana hoki i mea ai ki a Ratana raua ko Apirama, ki nga tamariki Eriapa tama a Reupena, i te koheratanga hoki o te mangai o te whenua, a horomia ana ratou, me nga tangata o o ratou whare, me o ratou teneti hoki, me a ratou mea katoa, i waenganui i a Iharaira katoa.
7
Ko o koutou kanohi ia kua kite i nga mahi nui katoa a Ihowa i mahi ai ia.
8
Ae ra, kia mau ki nga whakahaunga katoa e whakahau atu nei ahau ki a koe i tenei ra, kia kaha ai koutou, kia tae atu ai hoki, kia whiwhi ai ki te whenua e haere atu nei koutou ki reira ki te tango.
9
Kia roa ai hoki o koutou ra ki runga ki te whenua i oati ai a Ihowa ki ou matua kia hoatu ki a ratou, ki o ratou uri hoki, he whenua ia e rerengia ana e te waiu, e te honi.
10
Ta te mea, ehara te whenua, e haere atu nei koe ki reira ki te tango, i te pera me te whenua o Ihipa, me tera i mahue atu i a koe, e whakato ai koe i to purapura, e whakamakuku ai hoki ki to waewae, ano he kari otaota:
11
Kahore, he whenua pukepuke, he whenua raorao te whenua e haere atu nei koutou ki reira ki te tango, e inu hoki i te ua o te rangi hei wai.
12
He whenua e tirotirohia ana e Ihowa e tou Atua: kei reira tonu nga kanohi o Ihowa o tou Atua, no te timatanga o te tau, taea noatia te mutunga o to tau.
13
A ki te whakarongo marie koutou ki aku whakahaunga e whakahau atu nei ahau ki a koutou i tenei ra, ara, ki te aroha ki a Ihowa ki to koutou Atua, ki te whakapaua o koutou ngakau o koutou wairua ki te mahi ki a ia,
14
Na, ka hoatu e ahau te ua mo to koutou whenua i tona po ano, te ua mataati raua ko te ua o muri, a ka kohikohi koe i to witi, i to waina hoki, me to hinu.
15
A ka hoatu e ahau te tarutaru ki o parae ma o kararehe, a ka kai koe, ka makona.
16
Kia mahara koutou ki a koutou, kei mamingatia o koutou ngakau, kei peka ke hoki koutou, kei mahi koutou ki nga atua ke, kei koropiko atu ki a ratou;
17
A ka mura te riri a Ihowa ki a koutou, a ka tutakina e ia te rangi, a kore ake te ua, e kore ano hoki e tukua mai e te whenua ona hua; a ka hohoro koutou te mate atu i te whenua pai ka homai nei e Ihowa ki a koutou.
18
Engari, rongoatia atu enei kupu aku ki roto ki o koutou ngakau, ki roto hoki ki o koutou wairua, herea hoki hei tohu ki o koutou ringaringa; hei pare ano ena mea ki waenganui i o koutou kanohi.
19
Whakaakona atu hoki ena mea ki a koutou tamariki, korerotia ina noho koe i roto i tou whare, ina haere koe i te huarahi, ina takoto koe, ina whakatika ranei koe.
20
Tuhituhia ano hoki ki nga pou tatau o tou whare, ki o tatau hoki;
21
Kia tini ai o ra, me nga ra o a koutou tamariki, ki te whenua i oati ai a Ihowa ki ou mātua kia hoatu ki a ratou, kia rite ai ki nga ra o te rangi i runga i te whenua.
22
Ta te mea, ki te ata pupuri koutou i enei whakahaunga katoa e whakahau atu nei ahau ki a koutou kia mahia, ara, ki te aroha ki a Ihowa ki to koutou Atua, ki te haere hoki i ana huarahi, ki te awhi atu ki a ia;
23
Na, ka peia atu e Ihowa enei iwi katoa i tou aroaro, a ka riro mai i a koutou nga iwi e nui ana, e kaha ana i a koutou.
24
Mo koutou nga wahi katoa e takahia e te kapu o o koutou waewae: kei te koraha, kei Repanona hoki, kei te awa, kei te awa kei Uparati, a tae noa ki te moana ki te taha ki te weta, nga rohe ki a koutou.
25
E kore e tu mai tetahi tangata ki to koutou aroaro: ta te mea ka whakapangia e Ihowa e to koutou Atua to koutou wehi, me to koutou tuiri, ki te mata katoa o te whenua e takahia e koutou, ka rite ki tana i korero ai ki a koutou.
26
Titiro, ka hoatu nei e ahau ki to koutou aroaro i tenei ra te manaakitanga me te kanga:
27
Te manaakitanga, ki te rongo koutou ki nga whakahaunga a Ihowa a to koutou Atua, e whakahau atu nei ahau ki a koutou i tenei ra;
28
Te kanga hoki, ki te kahore koutou e rongo ki nga whakahaunga a Ihowa a to koutou Atua, a ka peka ke i te huarahi, e kiia atu nei e ahau ki a koutou i tenei ra, ki te whai ki nga atua ke, kihai nei i mohiotia e koutou.
29
A tenei ake, i te wa ano e kawea ai koe e Ihowa e tou Atua ki te whenua, ka haere atu nei koe ki reira ki te tango, na me hoatu e koe te manaakitanga ki runga ki Maunga Keritimi, me te kanga ki runga ki Maunga Epara.
30
Kahore ianei ena i tera taha o Horano i te taha o te huarahi e to ai te ra, i te whenua o nga Kanaani e noho ana i te mānia i te ritenga atu o Kirikara, i te taha o nga mānia i More?
31
Ka whiti atu nei hoki koutou Horano, ka haere atu ki te tango i te whenua e homai ana e Ihowa e to koutou Atua ki a koutou, a ka riro mai a reira i a koutou, a ka noho koutou ki reira.
32
Kia mahara hoki koutou kia mahi i nga tikanga katoa, me nga whakariteritenga e hoatu nei e ahau ki to koutou aroaro i tenei ra.